ମହାକାଳପଡ଼ା,୨୫।୫(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଜମ୍ବୁ ପଞ୍ଚାୟତ ଭାଟେଣି ଗାଁରେ ଗ୍ରାମ୍ୟ ପାନୀୟ ଜଳ ଯୋଗାଣ ପ୍ରକଳ୍ପ ବିଭାଗ ପକ୍ଷରୁ ବସୁଧା ଯୋଜନାରେ ୬୫ ଲକ୍ଷ ଟଙ୍କା ବ୍ୟୟରେ ୧୫୦ ଫୁଟ୍ ଉଚ୍ଚତା ବିଶିଷ୍ଟ ଓଭର ହେଡ୍ ପାଣି ଟାଙ୍କି ନିର୍ମାଣ କାର୍ଯ୍ୟ ଚାଲିଛି। ହେଲେ ନିର୍ମାଣ କାର୍ଯ୍ୟରେ ନିୟୋଜିତ ହୋଇଥିବା ନୟାଗଡ଼ ଜିଲାର ଶରଣକୁଳ ଅଞ୍ଚଳର କେତେଜଣ ଶ୍ରମିକଙ୍କର ଜୀବନ ସୁରକ୍ଷା ପ୍ରତି ବିପଦ ରହିଛି ବୋଲି ଅଭିଯୋଗ ହେଉଛି। ଓଭର୍ ହେଡ୍ ପାଣି ଟାଙ୍କି ଉପରେ ବିପଦପୂର୍ଣ୍ଣ ଭାବେ ଶ୍ରମିକମାନେ କାମ କରୁଛନ୍ତି। ମୁଣ୍ଡରେ ନାହିଁ ସେଫ୍ଟି ହେଲମେଟ କିମ୍ବା ହ୍ୟାଙ୍ଗିଙ୍ଗ୍ ଲାଇଫ ଜ୍ୟାକେଟ। ଶ୍ରମିକମଙ୍କ ସୁରକ୍ଷାକୁ ଦୃଷ୍ଟିରେ ରଖି ପାଣି ଟାଙ୍କି ଚାରି ପାଖରେ ଜାଲ ଘେରା ଦେବାର ବ୍ୟବସ୍ଥା ଥିଲେ ମଧ୍ୟ ଏହାକୁ ଅଣଦେଖା କରାଯାଇଛି। କାର୍ଯ୍ୟରତ ସମୟରେ ଶ୍ରମିକଙ୍କର ଯଦି କିଛି ଅଘଟଣ ହୁଏ ତେବେ ଉତ୍ତରଦାୟୀ କିଏ ରହିବ ବୋଲି ସ୍ଥାନୀୟ ଲୋକେ କହିଛନ୍ତି। ପ୍ରବଳ ଗୁଳୁଗୁଳି ସାଙ୍ଗକୁ ସୁରକ୍ଷା ପ୍ରତି ଧ୍ୟାନଦେବାକୁ ଦାୟିତ୍ୱରେ ଥିବା ବିଭାଗୀୟ ଅଧିକାରୀଙ୍କ ସରଜମିନ ତଦନ୍ତ କରିବାକୁ ସ୍ଥାନୀୟ ଲୋକମାନେ ଦାବି କରିଛନ୍ତି। ତେବେ ସେହିପରି ଏହି ନିର୍ମାଣ କାର୍ଯ୍ୟରେ ପଶ୍ଚିମବଙ୍ଗର ମୁର୍ଷିଦାବାଦ ଜିଲାର କେତେଜଣ ଶ୍ରମିକ ନିୟୋଜିତ ଥିବା ଦେଖିବାକୁ ମିଳିଛି।
ସୂଚନାଯୋଗ୍ୟ ଦୁଇବର୍ଷ ପୂର୍ବେ, ବ୍ଲକର କଳାଗଢ଼ ଗ୍ରାମସ୍ଥିତ ମେଗା ପାନୀୟ ଜଳ ପ୍ରକଳ୍ପର ସୁଉଚ୍ଚ ଓଭର ହେଡ ପାଣି ଟାଙ୍କିରେ କାର୍ଯ୍ୟରତ ଶ୍ରମିକଙ୍କ ଖସି ପଡ଼ି ମୃତ୍ୟୁ ଘଟିଥିଲା। ହେଲେ ବିଭାଗର ଏ ପର୍ଯ୍ୟନ୍ତ ଚେତା ପଶିଲା ନାହିଁ। ସେହିପରି ବ୍ଲକର ବିଭିନ୍ନ ପଞ୍ଚାୟତରେ ମେଗା ପାନୀୟ ଜଳ ପ୍ରକଳ୍ପ ଓ ବସୁଧା ଯୋଜନାରେ ନିର୍ମାଣ ହେଉଥିବା ପାଣି ଟାଙ୍କିରେ କାର୍ଯ୍ୟରତ ଶ୍ରମିକମାନଙ୍କ ସୁରକ୍ଷା ପାଇଁ ଆବଶ୍ୟକ ସାମଗ୍ରୀ ପିନ୍ଧି କାର୍ଯ୍ୟ କରୁଛନ୍ତି କି ନାହିଁ ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେବାକୁ ବୁଦ୍ଧିଜୀବୀ ମହଲରେ ଦାବି ହେଉଛି। ଏ ସମ୍ପର୍କରେ ମହାକାଳପଡ଼ା ବ୍ଲକ ପାନୀୟ ଜଳ ଯୋଗାଣ ପ୍ରକଳ୍ପ କନିଷ୍ଠ ଯନ୍ତ୍ରୀ ସୁବ୍ରତ କୁମାର ସାହୁଙ୍କୁ ପଚାରିବାରେ ଏହାର ସରଜମିନ୍ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
