ଦାରିଙ୍ଗବାଡ଼ି,୧୨।୫(ଡି.ଏନ୍.ଏ.): ରଖେ ହରି ତୋ ମାରେ କିଏ। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ଦାରିଙ୍ଗବାଡ଼ି ତିନିଛକ ବଜାର ଉପରେ। ଦାରିଙ୍ଗବାଡ଼ି ତିନିଛକ ବଜାର ଉପରେ ଏକ ୩ ମହଲା କୋଠାର ନିର୍ମାଣ କାର୍ଯ୍ୟ ଚାଳିଥିବା ବେଳେ ଜଣେ ଶ୍ରମିକ ୩୦ ଫୁଟ ଉଚ୍ଚରୁ ଖସିପଡି ୧୧ କେଭି ବିଦ୍ୟୁତ ତାର ଉପରେ ପଡିଯାଇଥିଲେ। ବିଦ୍ୟୁତ୍ ତାର ସଂସ୍ପର୍ଶରେ ଆସି ଶ୍ରମିକ ଜଣକ ଗୁରୁତର ହୋଇଛନ୍ତି। ଆହତ ଜଣକ ହେଲେ ଉକ୍ତ ଅଞ୍ଚଳର କାଳୁ ପ୍ରଧାନ (୩୦)। ତାଙ୍କୁ ସ୍ଥାନୀୟ ଲୋକ ଉଦ୍ଧାର କରି ପ୍ରଥମେ ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରେ ଓ ବ୍ରହ୍ମପୁର ଏମ୍କେଜିସି ମେଡିକାଲକୁ ସ୍ଥାନାନ୍ତର କରାଯାଇଥିଲା।
ପ୍ରକାଶ ଯେ, କାଳୁ ୩ ମହଲା କୋଠାରେ କାର୍ଯ୍ୟ କରୁଥିଲେ। ଅସାବଧାନତାରୁ ସେ ୩୦ ଫୁଟ ଉଚ୍ଚରୁ ଖସି ପଡି କୋଠାକୁ ଲାଗିଥିବା ୧୧ କେଭି ବିଦ୍ୟୁତ୍ ତାର ଉପରେ ପଡ଼ିଯାଇଥିତ୍ଲେ। ଫଳରେ ତାଙ୍କ ଶରୀରର ଅଧିକାଂଶ ସ୍ଥାନ ପୋଡ଼ିଯାଇଛି। ତାର ଛିଣ୍ଡି ଯିବାରୁ କାଳୁ ତଳେ ଥିବା ବାଲି, ପଥର, ଗଦାରେ ପଡ଼ି ଗୁରୁତର ହୋଇପଡ଼ିଥିଲେ । ଖବରପାଇ ଦାରିଙ୍ଗବାଡ଼ି ବିଦ୍ୟୁତ୍ ବିଭାଗର କନିଷ୍ଠ ଯନ୍ତ୍ରୀ ଶିବପ୍ରସାଦ ନାୟକ ଦାରିଙ୍ଗବାଡ଼ି ପୋଲିସକୁ ଜଣାଇଥିଲେ। ପୋଲିସ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ଗୁରୁତର ଆହତ କାଳୁଙ୍କ ସ୍ବାସ୍ଥ୍ୟବସ୍ଥା ପଚାରି ବୁଝିବା ସହ ଘଟଣାର ତଦନ୍ତ ଚଳାଇଛି। ଏନେଇ ଆଇଆଇସି କୌଶିକ ମାଝି ସୂଚନା ଦେଇଛନ୍ତି। ଏହି ଘଟଣାକୁ ନେଇ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି।
