ସପ୍ତାହରେ ୪ ଦିନ ହୋଇପାରେ କାର୍ଯ୍ୟଦିବସ
9:07 amFebruary 10, 2021 / 21

ନୂଆଦିଲ୍ଲୀ: ସପ୍ତାହରେ ୪ ଦିନ କାମ କରିବା ଲାଗି ନିୟମ ଆସିପାରେ। ଏ ନେଇ କମ୍ପାନୀଗୁଡ଼ିକୁ ସରକାର ଅନୁମତି ପ୍ରଦାନ କରିପାରନ୍ତି। ଏହା କାର୍ଯ୍ୟକାରୀ ହେଲେ କର୍ମଚାରୀଙ୍କୁ ଶିଫ୍ଟ ସମୟ ବଢ଼ାଯାଇପାରିବ। ସପ୍ତାହରେ ୪୮ ଘଣ୍ଟା କାର୍ଯ୍ୟ ସମୟ ଜାରି ରହିବ। ଦୈନିକ ୧୨ ଘଣ୍ଟା ହିସାବରେ ୪ ଦିନ, ୧୦ ଘଣ୍ଟା ହିସାବରେ ୫ ଦିନ କିମ୍ବା ୮ ଘଣ୍ଟା ହିସାବରେ ୬ ଦିନ କାମ କରିବାର ସୁଯୋଗ ମିଳିବ ବୋଲି ଶ୍ରମ ସଚିବ ଅପୂର୍ବ ଚନ୍ଦ୍ରା ସୋମବାର କହିଛନ୍ତି। କର୍ମଚାରୀ କିମ୍ବା ନିଯୁକ୍ତିଦାତାଙ୍କୁ ଏ ନେଇ ବାଧ୍ୟ କରାଯିବ ନାହିଁ। ଏ ନେଇ ନମନୀୟତା ରଖାଯିବ। ପରିବର୍ତ୍ତିତ କାର୍ଯ୍ୟଶୈଳୀକୁ ନେଇ ଏଭଳି ବ୍ୟବସ୍ଥା କରାଯାଉଛି। ଶ୍ରମ କୋଡ୍‌ର ଅଂଶ ବିଶେଷ ଭାବେ ଏହାକୁ ଆରମ୍ଭ କରାଯାଉଛି। ନୂଆ ସାପ୍ତାହିକ କାର୍ଯ୍ୟଦିବସ ନିୟମ ଲାଗୁହେବା ଆଗରୁ କେଉଁଟିକୁ ଗ୍ରହଣ କରିବାକୁ ହେବ ସେ ନେଇ ନିଯୁକ୍ତିଦାତାଙ୍କୁ ନିଶ୍ଚିତ କରାଇବାକୁ ହେବ ବୋଲି ଚନ୍ଦ୍ରା କହିଛନ୍ତି।