ଭୁବନେଶ୍ୱର,୧୫।୩(ସ୍ପୋର୍ଟ୍ସ ବ୍ୟୁରୋ): ସୁଶ୍ରୀ ଦିବ୍ୟଦର୍ଶନୀଙ୍କ ଚମତ୍କାର ବୋଲିଂ ଓ ପରେ ମାଧୁରୀ ମେହେଟ୍ଟା ଏବଂ ସରିତା ମେହେରଙ୍କ ଦମ୍ଦାର ବ୍ୟାଟିଂ ବଳରେ ଓଡ଼ିଶା ସିନିୟର ମହିଳା ଦିନିକିଆ ଟ୍ରଫିରେ ୯ ଉଇକେଟରେ ହାଇଦ୍ରାବାଦ୍କୁ ପରାସ୍ତ କରିଛି। ସୁରଟ୍ର ସି.କେ. ପିଥାଓ୍ବାଲା ଗ୍ରାଉଣ୍ଡରେ ରବିବାର ଟସ୍ ଜିତି ଓଡ଼ିଶା ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ହାଇଦ୍ରାବାଦ୍ ୪୬.୪ ଓଭରରେ ୧୫୯ ରନକରି ଅଲଆଉଟ ହୋଇଥିଲା। ଜବାବରେ ଓଡ଼ିଶା ୪୨.୧ ଓଭରରେ ମାତ୍ର ଗୋଟିଏ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରିନେଇଥିଲା।
୧୬୦ ରନ ଟାର୍ଗେଟର ପିଛା କରି ଓଡ଼ିଶା ଅତି ସହଜରେ ବିଜୟୀ ହୋଇଥିଲା। ଦଳ ତରଫରୁ ସରିତା ମେହେର ୧୦୩ଟି ବଲର ସମ୍ମୁଖୀନ ହୋଇ ୬୧ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ସେହିପରି କାଜଲ ଜେନା ୪୮ ବଲରୁ ୩୨ ରନ ସଂଗ୍ରହ କରିଥିଲେ। ମାଧୁରୀ ମେହେଟ୍ଟା ୧୦୫ଟି ବଲର ସମ୍ମୁଖୀନ ହୋଇ ୬୦ ରନର ଅର୍ଦ୍ଧଶତକୀୟ ପାଳି ଖେଳି ଅପରାଜିତ ରହି ଦଳକୁ ଜିତାଇଥିଲେ।
ପ୍ରଥମେ ବ୍ୟାଟିଂ କରିଥିବା ହାଇଦ୍ରାବାଦ ତରଫରୁ ମମ୍ଥା କାନୋଜିଆ ୩୪, ଜି. ତ୍ରିଶା ୩୨, ଅନୁରାଧା ନାଏକ ୩୧ରନ ସଂଗ୍ରହ କରିଥିଲେ। ବୋଲିଂରେ ଓଡ଼ିଶା ତରଫରୁ ସୁଶ୍ରୀ ୮.୫ ଓଭର ବୋଲିଂ କରି ୩୪ ରନ ବ୍ୟୟ କରିବା ସହ ସର୍ବାଧିକ ୪ ଉଇକେଟ ଅକ୍ତିଆର କରିଥିଲେ। ସେହିପରି ମଧୁସ୍ମିତା ବେହେରା ୧୦ ଓଭର ବୋଲିଂ କରି ୩୭ ରନ ବ୍ୟୟ କରି ୩ ଓ ପ୍ରିୟାଙ୍କା ପ୍ରିୟଦର୍ଶନୀ ୯ ଓଭର ବୋଲିଂ କରି ୨୧ ରନ ବ୍ୟୟ କରି ୨ ଉଇକେଟ ଅକ୍ତିଆର କରିଥିଲେ। ଓଡ଼ିଶା ତା’ର ପରବର୍ତ୍ତୀ ମ୍ୟାଚ୍ରେ ୧୬ ତାରିଖ ମଙ୍ଗଳବାର ସୁରଟ୍ର ଖୋଲଭାଡ ଜିମ୍ଖାନା ଗ୍ରାଉଣ୍ଡରେ ତ୍ରିପୁରାକୁ ଭେଟିବ।
ସଂକ୍ଷିପ୍ତ ସ୍କୋର:
ହାଇଦ୍ରାବାଦ୍ ୪୬.୪ ଓଭରରେ ୧୫୯ ଅଲଆଉଟ୍
(ମମ୍ଥା- ୩୪, ତ୍ରିଶା- ୩୨, ଅନୁରାଧା- ୩୧, ସୁଶ୍ରୀ- ୪/୩୪, ମଧୁସ୍ମିତା- ୩/ ୩୭, ପ୍ରିୟଙ୍କା- ୨/୨୧)।
ଓଡ଼ିଶା ୪୨.୩ ଓଭରରେ ୧୬୦/୧
(ମାଧୁରୀ- ୬୦, ସରିତା- ୬୧, କାଜଲ- ୩୨)।
