ଗୁଆହାଟୀ,୧ା୧୦: ଆଇସିସି ମହିଳା ଦିନିକିଆ ବିଶ୍ୱକପ୍ ଆରମ୍ଭ ହୋଇଯାଇଛି। ଟୁର୍ନାମେଣ୍ଟର ଉଦ୍ଘାଟନୀ ମ୍ୟାଚ୍ରେ ଆୟୋଜକ ଭାରତ ଡିଏଲ୍ଏସ୍ ମେଥଡରେ ୫୯ ରନ୍ରେ ଶ୍ରୀଲଙ୍କାକୁ ପରାସ୍ତକରି ବିଜୟ ସହ ଅଭିଯାନ ଆରମ୍ଭ କରିଛି।
ଅଲ୍ରାଉଣ୍ଡ ପ୍ରଦର୍ଶନ ପାଇଁ ଦୀପ୍ତି ଶର୍ମାଙ୍କୁ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା। ମ୍ୟାଚ୍ ପୂର୍ବରୁ ଭାରତରେ ଅନୁଷ୍ଠିତ ବିଶ୍ୱକପ୍ରେ ଭାରତୀୟ ମହିଳା ଦଳର ନେତୃତ୍ୱ ନେଇଥିବା ପୂର୍ବତନ ଅଧିନାୟିକା ଡାଏନା ଇଡୁଲଜି(୧୯୭୮), ପ୍ରମିଳା ଭଟ(୧୯୯୭) ଓ ମିଥାଲି ରାଜ୍(୨୦୧୩)ଙ୍କୁ ସମ୍ବର୍ଦ୍ଧିତ କରାଯାଇଥିଲା। ଭାରତୀୟ ଦଳ ଆସନ୍ତା ୫ ତାରିଖରେ କଲମ୍ବୋଠାରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ଭେଟିବ।
ପ୍ରଥମେ ବ୍ୟାଟିଂ କରିଥିବା ଭାରତ ୨୫ ଓଭର ସୁଦ୍ଧା ୨ ଉଇକେଟ ହରାଇ ୧୨୦ ରନ୍ କରିଥିଲା। ହେଲେ ପରବର୍ତ୍ତୀ ଦୁଇ ଓଭରରେ ହର୍ଲିନ୍ (୪୮ ରନ୍, ୬ ଚୌକା), ଜେମିମା ରୋଡ୍ରିଗୁଏଜ୍(୦), ହରମନପ୍ରୀତ୍(୨୧ ରନ୍, ୨ ଚୌକା) ଓ ରିଚା ଘୋଷ୍ (୨) ଆଉଟ୍ ହୋଇଥିଲେ। ଫଳରେ ୨୭ ଓଭର ଶେଷବେଳକୁ ୧୨୪ ରନ୍ରେ ୬ ଉଇକେଟ ହରାଇ ଦଳ ସଙ୍କଟରେ ପଡ଼ିଥିଲା। ଏଭଳି ପରିସ୍ଥିତିରେ ଦୀପ୍ତି ଶର୍ମା ୫୩(୩ ଚୌକା) ଓ ଅମନଜୋତ କୌର ୫୭(୫ ଚୌକା ଓ ୧ ଛକା) ସପ୍ତମ ଉଇକେଟରେ ୧୦୩ ରନ ଯୋଡ଼ିଥିଲେ।
ଶେଷଆଡ଼କୁ ସ୍ନେହ ରାଣା ୧୫ ବଲରେ ଦ୍ରୁତ ୨ (୨ ଲେଖାଏ ଚୌକା ଓ ଛକା) ରନ୍ କରିଥିଲେ। ଭାରତ ନିର୍ଦ୍ଧାରିତ ୪୭ ଓଭରରେ ୮ ଉଇକେଟ ହରାଇ ୨୬୯ ରନ କରିଥିଲା। ଶ୍ରୀଲଙ୍କା ପକ୍ଷରୁ ଇନୋକା ରାନାଓ୍ବିରା ୪ ଓ ଉଦେଶିକା ପ୍ରବୋଧନି ୨ ଉଇକେଟ ନେଇଥିଲେ।
ଡିଏଲ୍ଏସ୍ ମେଥଡରେ ଶ୍ରୀଲଙ୍କା ଆଗରେ ୨୭୧ ରନ୍ର ଟାର୍ଗେଟ ରଖାଯାଇଥିଲା। ଜବାବରେ କ୍ରମାଗତ ବ୍ୟବଧାନରେ ଉଇକେଟ ହରାଇବାରୁ ଶ୍ରୀଲଙ୍କା ୪୫.୪ ଓଭରରେ ୨୧୧ ରନ୍ରେ ଅଲଆଉଟ୍ ହୋଇଯାଇଥିଲା। ଦଳ ପାଇଁ ଅଧିନାୟିକା ଚମାରି ଆଥାପାଥଥୁ ୪୩, ନୀଳାକ୍ଷୀ ଡି ସିଲ୍ଭା ୩୫ ଓ ହର୍ଷିତା ସମରବିକ୍ରମା ୨୯ ରନ୍ କରିଥିଲେ। ଭାରତ ପକ୍ଷରୁ ଦୀପ୍ତି ୩ ଉଇକେଟ ନେଇଥିବା ବେଳେ ଶ୍ରୀଚରଣୀ ଓ ସ୍ନେହ ୨ଟି ଲେଖାଏ ଉଇକେଟ ନେବାରେ ସକ୍ଷମ ହୋଇଥିଲେ।
