ବରଗଡ଼,୫।୪(ପ୍ରେମାନନ୍ଦ ଖମାରୀ): ରୋଜଗାର ପାଇଁ ମଧ୍ୟପ୍ରଦେଶ ଯାଇ ହାତ ହରାଇ ଫେରିଥିବା ରୀନା ମହାନନ୍ଦଙ୍କୁ ତାଙ୍କ ବିଜେପୁର ନିକଟ ପଡ଼ା ଗ୍ରାମକୁ ଯାଇ ବରଗଡ଼ ମହିଳା ସମିତିର ଏକ ପ୍ରତିନିଧି ଦଳ ଭେଟି ତାଙ୍କ ସମ୍ପର୍କରେ ପଚାରି ବୁଝିଥିଲେ। ଏହି ଅବସରରେ ସମିତି ପକ୍ଷରୁ ତାଙ୍କୁ ଆର୍ଥିକ ସହାୟତା ପ୍ରଦାନ କରାଯାଇଥିଲା ।
ସେଠାରୁ ଫେରି ପ୍ରତିନିଧି ଦଳ ବରଗଡ଼ରେ ଜିଲାପାଳଙ୍କୁ ଭେଟି ପୀଡ଼ିତା ରୀନାଙ୍କ ସମ୍ପର୍କରେ ଅବଗତ କରାଇଥିଲେ।
ରୀନାଙ୍କ ଅସ୍ତ୍ରୋପଚାର ହୋଇ ବାମ ହାତ ହରାଇଥିବା ଆଘାତ ଜନିତ ପୀଡା ଅତ୍ୟଧିକ ଥିବା ସାଙ୍ଗକୁ ତାଙ୍କୁ ଜ୍ୱର ହେଉଥିବାରୁ ସମିତି ପକ୍ଷରୁ ଚିନ୍ତା ପ୍ରକଟ କରାଯାଇଛି। ଉଚିତ ଚିକିତ୍ସା ବ୍ୟବସ୍ଥା ସ୍ବରୂପ ତାଙ୍କୁ ବୁର୍ଲା ଭିମ୍ସାରକୁ ସ୍ଥାନାନ୍ତର କରି ତାଙ୍କ ସମ୍ପୂର୍ଣ୍ଣ ଚିକିତ୍ସା ଖର୍ଚ୍ଚ ଜିଲା ପ୍ରଶାସନ ବହନ କରିବାକୁ ସମିତି ପକ୍ଷରୁ ଜିଲା ପ୍ରଶାସନକୁ ଅନୁରୋଧ କରାଯାଇଛି।
ଜିଲାପାଳ ତୁରନ୍ତ ବିଜେପୁର ବିଡ଼ିଓଙ୍କୁ ରୀନାଙ୍କ ଆବଶ୍ୟକ ଚିକିତ୍ସା ସେବେ ଯୋଗାଇ ଦେବାକୁ ଫୋନ ଯୋଗେ ନିର୍ଦ୍ଦେଶ ଦେଇ ଯାହା ଆବଶ୍ୟକ ସବୁ କରାଯିବ ବୋଲି ପ୍ରତିଶ୍ରୁତି ଦେଇଥିଲେ।
ଜିଲାପାଳଙ୍କ କାର୍ଯ୍ୟାଳୟ ବାହାରେ ବିଜେପୁର ବିଧାୟକ ସନତ ଗଡତିଆଙ୍କୁ ମହିଳା ସମିତିର ପ୍ରତିନିଧି ଦଳ ଭେଟି ଘଟଣା ସମ୍ପର୍କରେ ଅବଗତ କରାଇଥିଲେ । ସେ ମଧ୍ୟ ଆବଶ୍ୟକ ଦାୟୀତ୍ୱ ତୁଲାଇବେ ବୋଲି ପ୍ରତିଶ୍ରୁତି ଦେଇଥିଲେ । ବରଗଡ଼ ମହିଳା ସମିତି ପକ୍ଷରୁ ଘଟଣାର ପୋଲିସ ପ୍ରଶାସନ ସ୍ବତନ୍ତ୍ର ଭାବେ ତଦନ୍ତ କରି ଘଟଣାର ରହସ୍ୟ ଉନ୍ମୋଚନ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରାଯାଇଛି। ଏପରିକି ଗରିବ ପରିବାରକୁ ମୁଖ୍ୟମନ୍ତ୍ରୀ ସ୍ବତନ୍ତ୍ର ଆର୍ଥିକ ସହାୟତା ଯୋଗାଇ ଦେବାକୁ ସମିତି ପକ୍ଷରୁ ଅନୁରୋଧ କରାଯାଇଛି। ପ୍ରତିନିଧି ଦଳରେ ସମିତିର ସଭାନେତ୍ରୀ ଅଞ୍ଜନା ଦାସ, ସମ୍ପାଦିକା ସୁଧାଂଶୁବାଲା ଦାସ, ବରିଷ୍ଠ ସଦସ୍ୟା ମମତା ମିଶ୍ର ଏବଂ ମନ୍ଦାକିନୀ ପତି ପ୍ରମୁଖ ସାମିଲ ଥିଲେ।
