କେନ୍ଦୁଝର,୧୪ା୩ (ସ୍ବ.ପ୍ର/ଡି.ଏନ.ଏ.): କେନ୍ଦୁଝର ଜିଲା ପରିଷଦ ସଭାପତି ନିର୍ବାଚନ ରବିବାର ଶାନ୍ତିଶୃଙ୍ଖଳାରେ ଶେଷ ହୋଇଛି। ୩୧ ନଂ. ଜୋନ୍ରୁ ନିର୍ବାଚିତ ଜିଲା ପରିଷଦ ସଭ୍ୟା ତଥା ବିଜେଡି ପ୍ରାର୍ଥୀ ସାଗରିକା ସାହୁ ସଭାପତି ଭାବେ ବିଜୟଲାଭ କରିଛନ୍ତି। ୩୭ ଜିଲା ପରିଷଦ ଆସନ ବିଶିଷ୍ଟ ଏହି ପରିଷଦରେ ଜଣେ ପ୍ରାର୍ଥୀଙ୍କ ଦେହାନ୍ତ ଯୋଗୁ ନିର୍ବାଚନ ହୋଇ ନ ଥିବାବେଳେ ଅବଶିଷ୍ଟ ୩୬ ଜୋନ୍ ପାଇଁ ନିର୍ବାଚନ ଅନୁଷ୍ଠିତ ହୋଇଥିଲା। ସେଥିରୁ ବିଜେଡି ୩୩ ଏବଂ ଭାଜପା ୩ଟି ଅକ୍ତିଆର କରିଥିଲା। ଚଳିତଥର ଜିଲା ପରିଷଦ ସଭାପତି ପଦ ଅଣସଂରକ୍ଷିତ ରହିଥିବାରୁ ଅଧ୍ୟକ୍ଷ ପଦ ପାଇଁ ବହୁ ଆଶାବାଦୀ ଥିଲେ। ତେବେ ଶେଷ ମୁହୂର୍ତ୍ତରେ ବିଜେଡି ଜଣେ ମହିଳାଙ୍କୁ ସୁଯୋଗ ଦେଇଛି। ଅପରପକ୍ଷେ ଭାଜପା ପ୍ରାର୍ଥୀ ଭାବେ ୩ ନଂ. ଜୋନ୍ର ସଭ୍ୟା ଅସୀମା ମିଶ୍ର ପ୍ରତିଦ୍ୱନ୍ଦ୍ୱିତା କରିଥିଲେ। ସେ ୩ଟି ଭୋଟ୍ ପାଇଥିବା ବେଳେ ସାଗରିକା ୩୩ ଖଣ୍ଡ ଭୋଟ୍ ପାଇ ଜିତିଛନ୍ତି।
୧୯୯୭ରେ ପ୍ରଥମ ଜିଲା ପରିଷଦ ନିର୍ବାଚନରେ କେନ୍ଦୁଝର ଜିଲା ପରିଷଦ ସଭାପତି ପଦବୀ ଅସଂରକ୍ଷିତ ରହିଥିବା ବେଳେ ଏକ ନାଟକୀୟ ଭଙ୍ଗୀରେ ହରିଚନ୍ଦନପୁର ବ୍ଲକରୁ ନିର୍ବାଚିତ ଦେବକୀ ନନ୍ଦନ ମହାନ୍ତି ସଭାପତି ଭାବେ ଦାୟିତ୍ୱ ନିର୍ବାହ କରିଥିଲେ। ସେ କଂଗ୍ରେସ ଦଳରୁ ବିଜୟଲାଭ କରିଥିଲେ। ୨୦୦୨ରେ ଏହି ପଦବୀ ଆଦିବାସୀ ମହିଳାଙ୍କ ପାଇଁ ସଂରକ୍ଷିତ ରହିଥିଲା। ସାହାରପଡ଼ା ବ୍ଲକରୁ ନିର୍ବାଚିତ ମମିତା ନାଏକ ଭାଜପାରୁ ବିଜୟଲାଭ କରି ସଭାପତି ହୋଇପାରିଥିଲେ। ୨୦୦୭ରେ ବାଂଶପାଳ ବ୍ଲକରୁ ନିର୍ବାଚିତ ଜିଲା କଂଗ୍ରେସ କମିଟି ସଭାପତି ବନବିହାରୀ ପହି ଧର୍ମଗୁଳାରେ ଜିଲା ପରିଷଦ ସଭାପତି ପଦ ହାତେଇ ପାରିଥିଲେ। ୨୦୧୨ ନିର୍ବାଚନରେ ପାଟଣା ବ୍ଲକରୁ ବିଜେଡି ଟିକେଟରେ ନିର୍ବାଚିତ ଶାରୀଲତା ପୃଷ୍ଟି ଜିଲା ପରିଷଦ ସଭାପତି ହେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ମନୋନୀତ ହୋଇ ପାଞ୍ଚବର୍ଷ ପୂରଣ କରିଥିଲେ। ୨୦୧୭ରେ ଏହି ପଦବୀ ଅନୁସୂଚିତ ଜାତି ମହିଳାଙ୍କ ପାଇଁ ସଂରକ୍ଷିତ ଥିଲା। ସଦର ବ୍ଲକରୁ କମଳିନୀ ପାତ୍ର ଜିଲା ପରିଷଦ ସଭାପତି ପଦ ହାସଲ କରିଥିଲେ। ଦୀର୍ଘ ୧୫ବର୍ଷ ପରେ ଏହି ଗୁରୁତ୍ୱପୂର୍ଣ୍ଣ ଆସନଟି ଅସଂରକ୍ଷିତ ହୋଇଥିଲେ ମଧ୍ୟ ବିଜେଡି ଜଣେ ମହିଳାଙ୍କୁ ସୁଯୋଗ ଦେଇଛି। ବିଜେଡି କ୍ରମାଗତ ୩ ଥର ମହିଳା ପ୍ରାର୍ଥୀଙ୍କୁ ପ୍ରାଧାନ୍ୟ ଦେଇଛି।
