ବେଲପଡା,୨୪ା୧୦(ଡି.ଏନ.ଏ.): ପ୍ରଥମେ ପ୍ରେମ ତା ପରେ ଘର ଲୋକଙ୍କ ସହମତିରେ ବିବାହ ହୋଇଥିଲା। ସାଇପଡିଶା ଓ ବନ୍ଧୁ ବାନ୍ଧବଙ୍କୁ ଭୋଜିଭାତ ବି ଦିଆଯାଇଥିଲା। କିଛିଦିନ ଠିକ୍ଠାକ ଚାଲିଲା ପରେ ସବୁ ଯେମିତି ବିଗିଡି ଗଲା। ଅପଣାର କରିଥିବା ସ୍ତ୍ରୀଙ୍କୁ ରାଜସ୍ଥାନର ଜଣଙ୍କୁ ୧ ଲକ୍ଷ ୮୦ ହଜାର ଟଙ୍କାରେ ବିକ୍ରି କରିଦେଲେ ସ୍ବାମୀ। ଏପରି ଏକ ଘଟଣା ଘଟିଛି ବଲାଙ୍ଗୀର ଜିଲା ବେଲପଡା ଥାନା ଅନ୍ତର୍ଗତ ସୁଲେକେଲା ଗ୍ରାମରେ ।
ସୁଲେକେଲା ଗ୍ରାମର ରାଜେଶ ରଣାଙ୍କର ସଇଁତଳା ଥାନା ଟିକ୍ରାପଡା ଗ୍ରାମର ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ଗଢି ଉଠିଥିଲା। ପରେ ତାଙ୍କୁ ନିଜ ଘର ସୁଲେକେଲାକୁ ନେଇ ଆସିଥିଲେ ରାଜେଶ। ଝିଅ ନିଜ ଜାତିର ହୋଇଥିବାରୁ ପରିବାର ଲୋକେ ତାଙ୍କୁ ଆପଣାଇ ନେଇଥିଲେ। ଉଭୟ ପରିବାର ବନ୍ଧୁବାନ୍ଧବ ଓ ସାହି ପଡିଶାଙ୍କ ଉପସ୍ଥିତିରେ ସେମାନଙ୍କୁ ପୁଅବୋହୂର ମାନ୍ୟାତା ଦେଇଥିଲେ। ଝିଅ ଘର ପକ୍ଷରୁ ମଧ୍ୟ ଯୌତୁକ ମଧ୍ୟ ଦିଆଯାଇଥିଲା।
ବିବାହର କିଛିଦିନ ପରେ ଗତ ଜୁଲାଇ ମାସରେ ରାଜେଶ ନବବିବାହିତା ସ୍ତ୍ରୀଙ୍କୁ ନେଇ ବାହାର ରାଜ୍ୟକୁ ଦାଦନ ଖଟିବାକୁ ଯାଇଥିଲେ। ଅଗଷ୍ଟ ୨୭ରେ ଝିଅ ତାଙ୍କ ବାପାଙ୍କୁ ଫୋନ କରି ସେ କେଉଁ ସ୍ଥାନରେ ଅଛନ୍ତି ଜାଣିପାରୁ ନ ଥିବା କହିଥିଲେ। ତାଙ୍କର ପ୍ରବଳ ମୁଣ୍ଡ ବିନ୍ଧୁଥିବା କହିଥିଲେ। ଫୋନ ପାଇବା ପରେ ମହିଳାଙ୍କ ବାପା ଜ୍ୱାଇଁ ରାଜେଶଙ୍କ ସହ ଯୋଗାଯୋଗ କରିଥିଲେ। ହେଲେ ସେ କୁଆଡେ ପଳାଇ ଯାଇଥିବା ରାଜେଶ ତାଙ୍କ ଶ୍ୱଶୁରଙ୍କୁ କହିଥିଲେ। ଅଗଷ୍ଠ ୨୮ତାରିଖରେ ମହିଳାକୁ ଉଦ୍ଧାର କରିବା ପାଇଁ ବଲାଙ୍ଗୀର ଏସ୍ପିଙ୍କୁ ଅନୁରୋଧ କରିଥିଲେ। ତପତ୍ରତା ପ୍ରକାଶ କରି ବେଲପଡା ଥାନା ପୋଲିସ ରାଜେଶଙ୍କ ସ୍ତ୍ରୀର ମୋବାଇଲ କଲ ରେକର୍ଡ ଯାଞ୍ଚ କରି ରାଜସ୍ଥାନରେ ରହୁଥିବା ଜାଣିବାକୁ ପାଇଥିଲା । ଏସ୍ପିଙ୍କ ନିର୍ଦ୍ଦେଶକ୍ରମେ ବେଲପଡା ପୋଲିସର ଏକ ଟିମ ରାଜସ୍ଥାନ ରାଜ୍ୟ ବାରାନ ଜିଲା ମନଝେଲା ଗ୍ରାମର ଜଣଙ୍କ ଘରେ ରାଜେଶଙ୍କ ସ୍ତ୍ରୀ ରହୁଥିବା ଠାବ କରିଥିଲା। ରାଜସ୍ଥାନ ପୋଲିସ ସହାୟତାରେ ଚଢାଉ କରି ମହିଳାଙ୍କୁ ଉଦ୍ଧାର କରି ବେଲପଡା ଆଣିଥିଲେ। ସ୍ବାମୀ ରାଜେଶ ତାଙ୍କୁ ୧ଲକ୍ଷ ୮୦ ହଜାର ଟଙ୍କାରେ ବିକ୍ରି କରିଦେଇଥିବା ଉଦ୍ଧାର ପରେ ଯୁବତୀ ଜଣକ କହିଥିଲେ। ଯୁବତୀଙ୍କ ବାପାଙ୍କ ଅଭିଯୋଗ କ୍ରମେ ବେଲପଡା ଥାନାରେ ଏକ ମାମଲା(୨୨୬/୨୧)ରଜୁ କରି ପୋଲିସ ରାଜେଶଙ୍କୁ ଗିରଫ କରିଥିଲା। ଶନିବାର ତାଙ୍କୁ କୋର୍ଟ ଚାଲାଣ କରାଯାଇଥିବା ଆଇଆଇସି ବୁଲୁ ମୁଣ୍ଡା କହିଛନ୍ତି।
