ନୂଆଦିଲ୍ଲୀ, ୧୯।୮: ଭାରତୀୟ ମହିଳା ହକି ଟିମ ମଙ୍ଗଳବାର ଏକ ଐତିହାସିକ ବିଜୟ ହାସଲ କରିଛି। ନେଦରଲାଣ୍ଡ୍ସର ଆମଷ୍ଟେଲଭନ୍ରେ ଖେଳାଯାଇଥିବା ମ୍ୟାଚରେ ଭାରତୀୟ ଟିମ ଦକ୍ଷିଣ ଆଫ୍ରିକାକୁ ୬-୧ ଗୋଲ୍ରେ ପରାସ୍ତ କରିଛି। ବିଶ୍ୱକପ ଇତିହାସରେ ଏହା ଭାରତୀୟ ମହିଳା ଟିମର ସବୁଠାରୁ ବଡ଼ ବିଜୟ। ଏହି ବିଜୟ ପରେ ଭାରତର ନକଆଉଟ ପର୍ଯ୍ୟାୟକୁ ଯିବାର ସମ୍ଭାବନା ବଢ଼ିଛି। ତେବେ ମ୍ୟାଚ ଶେଷ ହେବାର କିଛି ସେକେଣ୍ଡ ପୂର୍ବରୁ ଭାରତୀୟ ଖେଳାଳି ଇଶିକା ଚୌଧୁରୀ ଆହତ ହେବାରୁ ଟିମର ଚିନ୍ତା ବଢ଼ିଯାଇଛି।
ଏହି ମ୍ୟାଚରେ ଦକ୍ଷିଣ ଆଫ୍ରିକା ପକ୍ଷରୁ ୫୬ତମ ମିନିଟ୍ର ପ୍ରଥମ ଗୋଲ ଦିଆଯାଇଥିଲା। ଏହା ପୂର୍ବରୁ ଭାରତ ୬ଟି ଗୋଲ୍ରେ ଆଗୁଆ ଥିଲା। ମ୍ୟାଚ ଶେଷ ହେବାକୁ ଏକ ମିନିଟ୍ରୁ କମ ସମୟ ବାକି ଥିବା ବେଳେ ମଇଦାନରେ ଏକ ଭୟଙ୍କର ଦୁର୍ଘଟଣା ଘଟିଥିଲା।
ଇଶିକା ଚୌଧୁରୀ ବଲକୁ ଅଟକାଇବା ସହ ଡିଫେନ୍ସ କରିବାକୁ ଚେଷ୍ଟା କରୁଥିବା ବେଳେ ଦକ୍ଷିଣ ଆଫ୍ରିକାର ଜଣେ ଖେଳାଳିଙ୍କ ହକି ଷ୍ଟିକ୍ର ପଛ ଅଂଶ ଦ୍ରୁତ ଗତିରେ ତାଙ୍କ କପାଳରେ ଲାଗିଥିଲା। ଧକ୍କା ଏତେ ଜୋର୍ରେ ଥିଲା ଯେ ତାଙ୍କ କପାଳରୁ ରକ୍ତ ବାହାରିବା ଆରମ୍ଭ ହୋଇଥିଲା।
ହକି ଷ୍ଟିକ ଲାଗିବା ମାତ୍ରେ ଇଶିକା ଚୌଧୁରୀ ମଇଦାନରେ ପଡ଼ିଯାଇଥିଲେ। ତୁରନ୍ତ ମେଡିକାଲ ଟିମ ମଇଦାନରେ ପହଞ୍ଚିଥିଲା। ଟିସ୍ୟୁ ଏବଂ କପଡ଼ା ସାହାଯ୍ୟରେ ସପୋର୍ଟ ଷ୍ଟାଫ ଓ ଫିଜିଓ ତାଙ୍କ କପାଳରୁ ବାହାରୁଥିବା ରକ୍ତକୁ ବନ୍ଦ କରିଥିଲେ। ଏହି ଘଟଣା ସମୟରେ ଭାରତୀୟ ଟିମର ଅନ୍ୟ ଖେଳାଳିମାନେ ମଧ୍ୟ ଚିନ୍ତିତ ଓ ବିଚଳିତ ନଜର ଆସିଥିଲେ।