ନୂଆଦିଲ୍ଲୀ,୨୮।୧୧: ଶ୍ରଦ୍ଧା ହତ୍ୟା ମାମଲା ଭଳି ଦିଲ୍ଲୀରେ ଆଉ ଏକ ହତ୍ୟାକାଣ୍ଡ ସାମ୍ନାକୁ ଆସିଛି। ତ୍ରିଲୋକପୁରୀର ପାଣ୍ଡବନଗର ପୋଲିସ ଷ୍ଟେଶନ ଅଞ୍ଚଳରୁ ଖଣ୍ଡବିଖଣ୍ଡିତ ମୃତଦେହ ଉଦ୍ଧାର ହେବା ପରେ ପୋଲିସ ଏହି ଘଟଣାର ଖୁଲାସା କରିଛି। ମୃତକ ଜଣଙ୍କ ବିହାରର ଅଞ୍ଜନ ଦାସ ବୋଲି ପୋଲିସ କହିଛି। ସେ ଦୀର୍ଘ ଦିନ ଧରି ଦିଲ୍ଲୀରେ ରହୁଥିଲେ। ତେବେ ଏହି ମାମଲାରେ ମୃତକଙ୍କ ସ୍ତ୍ରୀ ପୁନମ ଏବଂ ତାଙ୍କ ସାବତ ପୁଅ ଦୀପକକୁ ପୋଲିସ ଗିରଫ କରିଛି। ଡିସିପି ଅମିତ ଗୋୟାଲଙ୍କ କହିବା ଅନୁଯାୟୀ, ଜୁନ୍ ୫ରେ ରାମଲିଲା ମଇଦାନରେ ଶରୀରର ଅଙ୍ଗଗୁଡ଼ିକ ଉଦ୍ଧାର କରାଯାଇଥିଲା। ତେବେ ଶରୀରକୁ ଚିହ୍ନଟ କରିବାରେ ବହୁ ଅସୁବିଧା ହୋଇଥିବା ଡିସିପି କହିଛନ୍ତି। ଯାଞ୍ଚ ପରେ ମୃତଦେହ ଅଞ୍ଜନଙ୍କ ବୋଲି ସ୍ପଷ୍ଟ ହୋଇଥିଲା।
ସୂଚନାଯୋଗ୍ୟ, ପୂର୍ବ ସ୍ବାମୀ ଦୀପକ କଲ୍ଲୁଙ୍କ କର୍କଟ ରୋଗରେ ମୃତ୍ୟୁ ପରେ ୨୦୧୭ରେ ପୁନମ ଅଞ୍ଜନଙ୍କୁ ଦ୍ୱିତୀୟ ବିବାହ କରିଥିଲେ। ପୁନମଙ୍କର ପୂର୍ବରୁ ୨ ସନ୍ତାନ ଥିଲେ। ଅଞ୍ଜନ ମଧ୍ୟ ବିବାହିତ ଥିଲେ ଏବଂ ବିହାରରେ ତାଙ୍କର ୮ ସନ୍ତାନ ଅଛନ୍ତି। ଅନ୍ୟପକ୍ଷେ, ଅଞ୍ଜନ ପୁନମଙ୍କ ଅଳଙ୍କାର ବିକ୍ରି କରି ବିହାରକୁ ଟଙ୍କା ପଠାଇଥିଲେ। ଏଥିପାଇଁ ଉଭୟଙ୍କ ମଧ୍ୟରେ ବାରମ୍ବାର ଝଗଡା ହେଉଥିଲା। ଏହାସହିତ ଅଞ୍ଜନ ପୁନମଙ୍କ ପୂର୍ବ ଝିଅ ଏବଂ ବୋହୂଙ୍କ ପ୍ରତି ଖରାପ ନଜର ଥିବା ସନ୍ଦେହ ମଧ୍ୟ କରୁଥିଲେ। ସେଥିପାଇଁ ମା-ପୁଅ ତାଙ୍କୁ ଜୀବନରୁ ମାରିବଦେବାକୁ ଯୋଜନା କରିଥିଲେ। ମେ’୩୦ରେ ମଦ୍ୟପାନରେ ନିଶା ବଟିକା ଦେଇଥିଲେ। ପରେ ଅଞ୍ଜନ ଚେତାଶୂନ୍ୟ ହୋଇପଡିଥିଲେ। ଏହାର ସୁଯୋଗ ନେଇ ପୁଅ ଦୀପକ ତାଙ୍କ ଗଳା ଚିପି ହତ୍ୟା କରିଥିଲେ। ତା’ପରଦିନ ମୃତଦେହକୁ ପ୍ରାୟ ୧୦ଖଣ୍ଡ କରି ବିଭିନ୍ନ ସ୍ଥାନରେ ଫୋପାଡି ଥିଲେ। ଜୁନ ୫ ତାରିଖ ବିଳମ୍ବିତ ରାତିରେ ପୋଲିସ ପ୍ରଥମେ ମୃତଦେହର ଗୋଡ ଜବତ କରିଥିଲା। ପୋଲିସ ଘଟଣାର ତଦନ୍ତ ପରେ ହତ୍ୟାକାଣ୍ଡର ଫର୍ଦ୍ଦାଫାଶ କରିଛି। ହତ୍ୟାରେ ମା’ପୁଅଙ୍କୁ ପୋଲିସ ଗିରଫ କରିଛି। ତେବେ ଏହି ମାମଲାର ଅଧିକ ତଥ୍ୟ ପାଇବା ଦୁହିଁଙ୍କୁ ରିମାଣ୍ଡରେ ନେବ ବୋଲି ଜଣାପଡିଛି।
