ନବରଙ୍ଗପୁର/ରାଇଘର, ୨୫।୧(ବି.ପ୍ର./ଡି.ଏନ୍.ଏ.): ନବରଙ୍ଗପୁର ପୋଲିସ ମେନପୁର ନୂଆପଡ଼ା ଡିଭିଜନର ଜଣେ ମହିଳା ମାଓବାଦୀ ଓ ତାଙ୍କ ସମର୍ଥକଙ୍କୁ ଗିରଫ କରିଛି। ଏନେଇ ମଙ୍ଗଳବାର ଏକ ଖବରଦାତା ସମ୍ମିଳନୀରେ ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ରାଜେଶ ପଣ୍ଡିତ ସୂଚନା ଦେଇଛନ୍ତି। ଗିରଫ ମହିଳା ମାଓବାଦୀ ହେଲେ ଛତିଶଗଡ଼ ରାଜ୍ୟ ସୁକ୍ମା ଜିଲା ଗୋରିଆସ ଥାନା ଅଧୀନ ମଟୋଡ଼ି ଗାଁର ପୋଜେ ମାଣ୍ଡବୀ ଓରଫ ଅନୀତା(୨୫)। ଅନ୍ୟପକ୍ଷରେ ସହଯୋଗୀ ଜଣକ ହେଲେ ନୂଆପଡ଼ା ଜିଲା ସେନାପଲି ଥାନା ଅଞ୍ଚଳର ସମୁଦ୍ର ବାଘ। ସେ କ୍ୱାକ୍ ଭାବେ କାମ କରନ୍ତି। ପୋଜେ ମାଣ୍ଡବୀଙ୍କ ଦେହ ଅସୁସ୍ଥ ଥିବାରୁ ତାଙ୍କୁ ଚିକିତ୍ସା ପାଇଁ ନିଆଯାଉଥିବାବେଳେ ରାଇଘର ହାତୀଗାଁ ସଂରକ୍ଷିତ ଜଙ୍ଗଲରୁ ସିଆର୍ପିଏଫ୍, ଏସ୍ଓଜି ଓ ଡିଭିଏଫ୍ ଯବାନମାନେ କୋମ୍ବିଂ ଅପରେଶନ କରି ସେମାନଙ୍କୁ ଗିରଫ କରିଛନ୍ତି ବୋଲି ଖବରଦାତା ସମ୍ମିଳନୀରେ ସୂଚନା ଦିଆଯାଇଛି।
୨୦୧୦ରେ ମାଓବାଦୀ ନେତା ରମେଶଙ୍କ ସହଯୋଗୀ ଭାବେ ପୋଜେ କାମ କରୁଥିଲେ। ପରେ ୨୦୧୦ରୁ ୨୦୧୩ ବଡ଼ଚଟିଆ ଏଲ୍ଓସିରେ କାମ କରୁଥିବାବେଳେ ତାଙ୍କୁ ମେନପୁର ନୂଆପଡ଼ା ଡିଭିଜନଙ୍କୁ ବଦଳି କରାଯାଇଥିଲା। ଏହାପରେ ମୁରଲୀ ଓରଫ ସଂଗ୍ରାମ ଓରଫ ମାଳା ରାଜିରେଡ୍ଡୀଙ୍କ ସହଯୋଗୀ ଭାବେ ପୋଜେ କାମ କରୁଥିଲେ। ସେ ୩୦୩ ରାଇଫଲ ପରିଚାଳନା କରୁଥିଲେ। ୨୦୧୯ରେ ଗୁଡୁ ଓରଫ ଜୟରାମଙ୍କ ସୁରକ୍ଷାରେ ତାଙ୍କୁ ନିୟୋଜିତ କରାଯାଇଥିଲା। ପୋଜେ ନୂଆପଡ଼ା, କଳାହାଣ୍ଡି, ଗରିଆବନ୍ଦ, ଜିଲାରେ ଅନେକ ମାଓବାଦୀ କାର୍ଯ୍ୟକଳାପରେ ସମ୍ପୃକ୍ତ ଥିଲେ। ନୂଆପଡ଼ା ଅଞ୍ଚଳରେ ହୋଇଥିବା ବିଭିନ୍ନ ଫାୟାରିଂ କେସ୍ରେ ପୋଜେଙ୍କ ନାଁ ରହିଛି। ନବରଙ୍ଗପୁର ଜିଲାରେ ପୋଷ୍ଟର ମରା କାମରେ ସେ ଜଡ଼ିତ ଥିବା ଖବରଦାତା ସମ୍ମିଳନୀରେ ଡିିଆଇଜି ସୂଚନା ଦେଇଛନ୍ତି। ସମୁଦ୍ର ବାଘ ୨୦୧୭ରୁ ମାଓବାଦୀଙ୍କ ସହଯୋଗୀଭାବେ ଜଡ଼ିତ ଅଛନ୍ତି ବୋଲି ଡିଆଇଜି ଖବରଦାତା ସମ୍ମିଳନୀରେ କହିଛନ୍ତି। ଏହି ଖବରଦାତା ସମ୍ମିଳନୀରେ ନବରଙ୍ଗପୁର ଏସ୍ପି ଏସ୍. ସୁଶ୍ରୀ ଓ ସିଆର୍ପିଏଫ୍ ୧୨ ବାଟାଲିୟନ କମାଣ୍ଡାଣ୍ଟ ଏନ୍. କେ.କେ. ପ୍ରସାଦ ଉପସ୍ଥିତ ଥିଲେ।
