ଆଜିର ସମୟରେ ଲୋକମାନେ ଫିଟ୍ନେସ୍ ବିଷୟରେ ବହୁତ ସଚେତନ। ଅଧିକାଂଶ ଲୋକ ଫିଟ୍ ରହିବା ପାଇଁ ନାନା ଉପାୟ ଅବଲମ୍ବନ କରୁଛନ୍ତି। ଭବିଷ୍ୟତରେ ସେପରି ରୋଗବ୍ୟାଧି ନ ହେବ ସେଥିପ୍ରତି ବିଶେଷ ଧ୍ୟାନ ଦେଉଛନ୍ତି। ଏବେ ସୋସିଆଲ ମିଡିଆରେ ଓଜନ ହ୍ରାସର ଅନେକ କାହାଣୀ ଶେୟାର କରାଯାଉଛି। କିଛି ଲୋକ ଏହି ପଦ୍ଧତିଗୁଡ଼ିକର ସହଜ ଉପାୟ ଅବଲମ୍ବନ କରି ଓଜନ ହ୍ରାସ କରିବାକୁ ଚେଷ୍ଟା କରୁଛନ୍ତି।
କାନାଡାର ଆଣ୍ଟାରିଓରେ ରହୁଥିବା ଆଲିସ ସୋସିଆଲ ମିଡିଆରେ ନିଜର ଓଜନ ହ୍ରାସ ବିଷୟରେ ଏକ କାହାଣୀ ଶେୟାର କରିଛନ୍ତି। ସେ କହିଛନ୍ତି, ଓଜନ କମାଇବାକୁ ଘିଅ ଏବଂ ଲହୁଣୀ ଖାଇଥାନ୍ତି। ଏମିତି ଖାଇ ସେ ନିଜ ଓଜନ ୫୦ କିଲୋଗ୍ରାମ କମାଇଛନ୍ତି। ଖାଲି ଏତିକି ନୁହେଁ ଓଜନ କମାଇବା ପାଇଁ ତାଙ୍କୁ ବ୍ୟାୟାମ କରିବାର ମଧ୍ୟ ଆବଶ୍ୟକତା ପଡ଼ି ନ ଥିଲା। କେବଳ ଗୋଟିଏ ଡାଏଟ ଅନୁସରଣ କରି ସେ ଏତେ ଓଜନ ହ୍ରାସ କଲେ ଯେ, ତାଙ୍କ ସ୍ବାମୀ ମଧ୍ୟ ତାଙ୍କ ନୂଆ ଚେହେରା ଦେଖି ବିଶ୍ୱାସ କରିପାରିଲେ ନାହିଁ।
ଓଜନ ହ୍ରାସ କରିବା ଚିନ୍ତା ଆଲିସଙ୍କ ମନରେ କେବେ ଆସି ନ ଥିଲା। ଏହାର କାରଣ ଥିଲା ତାଙ୍କ ସ୍ବାମୀ ଦେଇଥିବା ପ୍ରେମ। ତାଙ୍କ ସ୍ବାମୀ ତାଙ୍କୁ ସବୁବେଳେ ସୁନ୍ଦର ବୋଲି କହୁଥିଲେ। କିନ୍ତୁ ଯେତେବେଳେ ସେ ୨୦୨୦ରେ ତାଙ୍କ ବିବାହ ଗାଉନ ପିନ୍ଧିଥିଲେ ତାହା ତାଙ୍କୁ ହୋଇ ନ ଥିଲା। ସେହିଦିନଠାରୁ ସେ ଓଜନ ହ୍ରାସ କରିବା ପାଇଁ ଚାହୁଁଥିଲେ।
ଆଲିସ କହିଛନ୍ତି, ସେ ଚିକେନ, ମାଛ, ଦହି, ପନିର, ଲହୁଣୀ ଏବଂ ଘିଅ ସହିତ ଡାର୍କ ଚକୋଲେଟ ଖାଉଥିଲେ। ଏସବୁ ଖାଦ୍ୟ ଖାଇବା ପରେ ମଧ୍ୟ ତାଙ୍କର ଓଜନ ହ୍ରାସ ପାଇଲା। ପ୍ରାୟ ଦୁଇ ବର୍ଷ ହେଲାଣି ଆଲିସ ତାଙ୍କ ଓଜନ କମାଇ ଚାଲିଛନ୍ତି। ଲୋକମାନେ ବି ତାଙ୍କ ଓଜନ ହ୍ରାସ ଦ୍ୱାରା ଅନୁପ୍ରାଣୀତ ହୋଇ ସେହି ଉପାୟ ସବୁ ଅବଲମ୍ବନ କରୁଛନ୍ତି।
