ରାଉରକେଲା,୧୧।୧୧(ସଂଗୀତା ଜେନା) ମଙ୍ଗଳବାର ଭୋର ସମୟରେ ରାଉରକେଲା କୋଏଲ ନଗର ଅଞ୍ଚଳରେ ଏକ ଗୋଠ ଛଡା ଦନ୍ତା ହାତୀ ପଶି ଜଣେ ମହିଳାଙ୍କୁ ଦଳି ଦେଇଥିବା ସୂଚନା ମିଳିଛି। ଘଟଣାସ୍ଥଳରେ ମହିଳା ଜଣଙ୍କ ମୃତ୍ୟୁବରଣ କରିଛନ୍ତି। ମୃତକ ହେଉଛନ୍ତି କୋଏଲ ନଗର ସି ୮୩ରେ ରହୁଥିବା ପୂର୍ଣ୍ଣିମା ଦସ୍ତିଦାର(୭୯)। ଏ ନେଇ ମୃତକଙ୍କ ଝିଅ କୋଏନା ଦସ୍ତିଦାର ଥାନାରେ ଏତଲା ଦେଇଛନ୍ତି। ପ୍ରତ୍ୟକ୍ଷ ଦର୍ଶୀଙ୍କ ଅନୁଯାୟୀ, ଉକ୍ତ ହାତୀକୁ ବନବିଭାଗ ବନ୍ଧମୁଣ୍ଡା ଆଡୁ ଗୋଡାଇ ଆଣୁଥିଲା। ଡାକବାଜି ଯନ୍ତ୍ରରେ ଘୋଷଣା ଓ ବିଜୁଳି କାଟ କରାଯାଇଥିଲା। ମୃତକ ଫୁଲ ତୋଳିବାକୁ ଉଠିଥିଲେ। ସେ ତାଙ୍କ ଘର ଠାରୁ କିଛି ଦୂରରେ ଫୁଲ ତୋଳୁଥିଲେ। ହାତୀ ତାଙ୍କୁ ଶୁଣ୍ଢରେ ଟେକି କଚାଡି ଦେବା ପରେ ଛାତିରେ ଚଢିଯାଇଥିଲା। ମୃତଦେହକୁ ଆଇଜିଏଚ ମର୍ଗ ହାଉସରେ ରଖାଯାଇଛି। ବ୍ୟବଚ୍ଛେଦ ପରେ ଅପରାହ୍ନରେ ମୃତଦେହକୁ ପରିବାରକୁ ଦିଆଯିବ ବୋଲି ପୋଲିସ କହିଛି। ସୂଚନା ଯୋଗ୍ୟ, ହାତୀ ଆକ୍ରମଣ ବେଳେ ମୃତକଙ୍କ ଝିଅ ଓ ଅନ୍ୟ ୪ଜଣ ବ୍ୟକ୍ତି ଦୌଡ଼ି ପଳାଇ ନିଜ ପ୍ରାଣ ବଞ୍ଚଇଥିଲେ। ହାତୀ ଏନ ଏ ସି ମାର୍କେଟ ଭିତରେ ପଶିବା ସହ ପାଚେରୀ ମଧ୍ୟ ଭାଙ୍ଗିଛି। ଏହି ଘଟଣାକୁ ନେଇ ସ୍ଥାନୀୟ ଲୋକ ଭୟଭୀତ ଅଛନ୍ତି।
