ଦେବଗଡ଼,୧୬ା୮(ଶଶାଙ୍କ ଶେଖର ଝାଙ୍କର): ପୋଲ ଉପରେ ବନ୍ୟାଜଳ ପ୍ରବାହିତ ହେଉଥିବା ବେଳେ ଆମ୍ବୁଲାନ୍ସ ଯାଇ ନ ପାରିବାରୁ ଜଣେ ଗର୍ଭବତୀ ମହିଳାଙ୍କୁ ହଟହଟା ହେବାକୁ ପଡ଼ିଛି। ଦେବଗଡ଼ ଜିଲା ବାରକୋଟ ବ୍ଲକ କାଳିଆପାଳ ଗ୍ରାମରେ ରବିବାର ସକାଳୁ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ବାରକୋଟ ବ୍ଲକରେ ଶନିବାର ରାତି ପ୍ରବଳରୁ ଅତି ପ୍ରବଳ ବର୍ଷା ହୋଇଥିଲା। ଏହାର ପ୍ରଭାବରେ କାଳିଆପାଳ ଗ୍ରାମ ନିକଟରେ ଥିବା ଟାଙ୍କୁଜୁରା ନାଳରେ ବନ୍ୟାଜଳ ପ୍ରବାହିତ ହେଉଥିବା ବେଳେ ପୋଲ ଉପରେ ପ୍ରାୟ ୩ ଫୁଟର ପାଣି ରହିଥିଲା। ଏହି ସମୟରେ କାଳିଆପାଳ ଗ୍ରାମର ସନ୍ତୋଷ ନାୟକଙ୍କ ସ୍ତ୍ରୀ ପଦ୍ମିନୀ ଶବରଙ୍କ ଗର୍ଭଯନ୍ତ୍ରଣା ଆରମ୍ଭ ହୋଇଥିବାରୁ ପରିବାର ଲୋକେ ୧୦୮ ଆମ୍ବୁଲାନ୍ସକୁ ଡାକିଥିଲେ। ମାତ୍ର ପୋଲ ଉପରେ ପ୍ରାୟ ୩ ଫୁଟର ବନ୍ୟାପାଣି ଥିବାରୁ ଗାଁକୁ ଆମ୍ବୁଲାନ୍ସ ଯାଇ ନ ପାରି ଅଧା ରାସ୍ତାରେ ଅଟକି ରହିଥିଲା। ଫଳରେ ଏକ ଅଟୋ ରିକ୍ସା ସାହାଯ୍ୟରେ ଗର୍ଭବତୀ ମହିଳାଙ୍କୁ ପୋଲର ଅପରପାର୍ଶ୍ୱକୁ ଅଣାଯାଇଥିବା ବେଳେ ପରିବାର ଲୋକେ ଏବଂ ସମ୍ପର୍କୀୟ ତାଙ୍କୁ କାନ୍ଧରେ ବୋହି ନାଳ ଅତିକ୍ରମ କରିଥିଲେ। ଏଭଳି ସମସ୍ୟା ଯୋଗୁ ଗର୍ଭବତୀ ମହିଳା ଠିକ୍ ସମୟରେ ଡାକ୍ତରଖାନାରେ ପହଞ୍ଚି ପାରି ନ ଥିଲେ।
ଅନ୍ୟପଟେ ମହିଳାଙ୍କୁ ଆମ୍ବୁଲାନ୍ସରେ ନିଆଯାଉଥିବା ବେଳେ ଆମ୍ବୁଲାନ୍ସ ଭିତରେ ସେ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ। ପରେ ୧୦୮ ଆମ୍ବୁଲାନ୍ସର ଇଏମଟି କେଦାର ସାହୁ, ଚାଳକ ଗୌତମ ପ୍ରଧାନ ଏବଂ ସହଯୋଗୀ ସିପୁନ ସାହୁଙ୍କ ସହାୟତାରେ ପ୍ରସୂତି ମହିଳା ଏବଂ ନବଜାତ ଶିଶୁପୁତ୍ରକୁ ସୁରକ୍ଷିତ ଭାବେ ବାରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିବା ବେଳେ ଉଭୟଙ୍କ ସ୍ବାସ୍ଥ୍ୟାବସ୍ଥା ସ୍ବାଭାବିକ ଥିବା ଜଣାପଡ଼ିଛି। ତେବେ ପୋଲ ଉପରେ ବନ୍ୟାଜଳ ପ୍ରବାହିତ କେବଳ ଆଜିର ସମସ୍ୟା ନୁହେଁ। ପ୍ରତିବର୍ଷ ବର୍ଷା ଆସିଲେ ଲୋକେ ଏଭଳି ସମସ୍ୟାର ସମ୍ମୁଖୀନ ହେଉଥିବା ବେଳେ ଏହାର ସ୍ଥାୟୀ ସମାଧାନ ପାଇଁ ବିଭାଗୀୟ କର୍ତ୍ତୃପକ୍ଷ
ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
