ହୋଟେଲରେ ଖାଇବା ସମୟରେ ଗ୍ରାହକ ସାଲାଡ୍ ଖାଇବା ପାଇଁ ଖୁବ୍ ପସନ୍ଦ କରିଥାନ୍ତି। ଆଜିକାଲି ଲୋକଙ୍କ ଚାହିଦାକୁ ଦେଖି ସାଲାଡ୍ର ମୂଲ୍ୟ ବି ବଢ଼ିଗଲାଣି। କାରଣ ସାଲାଡ୍ ସ୍ବାସ୍ଥ୍ୟପକ୍ଷେ ବହୁତ ଲାଭଦାୟକ। କିଛି ଲୋକ ଭିନ୍ନ ଭିନ୍ନ କିସମର ସାଲାଡ୍ ଡାଏଟ୍ରେ ସାମିଲ କରୁଛନ୍ତି।
ଲୋକଙ୍କ ଚାହିଦାକୁ ଦୃଷ୍ଟିରେ ରଖି ପୁଣେରେ ରହୁଥିବା ଜଣେ ମହିଳା ସାଲାଡ୍ ବିକି ଏଥିରୁ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି। ମେଘା ବାଫ୍ନା ନାମକ ଏହି ମହିଳା ଜଣକ ୨୦୧୭ରେ ନିଜର ବେପାର ଆରମ୍ଭ କରିଥିଲେ। ସେ ନିଜ ଘରେ ସାଲାଡ୍ ପ୍ରସ୍ତୁତ କରି ପ୍ରଥମେ ସୋସିଆଲ ମିଡିଆରେ ସାଙ୍ଗମାନଙ୍କ ସହ ଶେୟାର କରୁଥିଲେ। ପରେ ତାଙ୍କୁ ଧୀରେ ଧୀରେ ଅର୍ଡର ମିଳିବା ଆରମ୍ଭ ହୋଇଥିଲା। ମେଘାଙ୍କୁ ପ୍ରଥମ ଦିନ ତାଙ୍କର ୫ ଜଣ ସାଙ୍ଗ ଅର୍ଡର ଦେଇଥିଲେ। ମେଘାଙ୍କ ଦ୍ୱାରା ପ୍ରସ୍ତୁତ ସାଲାଡ ଲୋକଙ୍କୁ ଖୁବ୍ ପସନ୍ଦ ଆସୁଛି। ଧୀରେ ଧୀରେ ତାଙ୍କ ବେପାର ମଧ୍ୟ ବଢିଚାଲିଛି।
ଆଜି ମେଘା ଜଣେ ସଫଳ ବ୍ୟବସାୟୀ। ୩୦୦୦ ଟଙ୍କାରୁ ବେପାର ଆରମ୍ଭ କରିଥିା ମେଘା ଆଜିର ସମୟରେ ସେ ୨୨ ଲକ୍ଷ ଟଙ୍କା ରୋଜଗାର କରୁଛନ୍ତି। ମେଘା ପ୍ରତିଦିନ ସକାଳ ସାଢ଼େ ୪ରୁ ଉଠି ସାଲାଡ୍ ପ୍ୟାକେଟ୍ ପ୍ରସ୍ତୁତ କରିଥାନ୍ତି। ପରିବା ଆଣନ୍ତି। ମସଲା ପ୍ରସ୍ତୁତ କରନ୍ତି। ପ୍ରତି କାମ ସେ ନିଜେ କରିଥାନ୍ତି। ଅନେକ ଥର କ୍ଷତି ସହିଥିଲେ ମଧ୍ୟ ସେ ବେପାର ଛାଡ଼ି ଦେଇନାହାନ୍ତି। ଯାହା ଆଜି ତାଙ୍କୁ ପ୍ରତିଷ୍ଠିତ ବ୍ୟବସାୟୀର ପରିଚୟ ଦେଇଛି। ଲକ୍ଡାଉନ୍ ପୂର୍ବରୁ ତାଙ୍କର ୨୦୦ ଗ୍ରାହକ ଥିଲେ। ବର୍ତ୍ତମାନ ଏହି ସଂଖ୍ୟା ବଢ଼ିଚାଲିଛି। ମେଘା କୁହନ୍ତି, ଇଚ୍ଛାଶକ୍ତି ଥିଲେ କେହି କୌଣସି କାର୍ଯ୍ୟରେ ହାରିବେ ନାହିଁ। ବେପାର ମାନ୍ଦା ପରେ ମଧ୍ୟ ସେ କାମ ଛାଡ଼ି ଦେଇ ନାହାନ୍ତି। ଯେଉଁଥିପାଇଁ ସେ ଆଜି ଏହି ଜାଗାରେ ପହଞ୍ଚିଛନ୍ତି।
