ହାଟଡିହୀ,୧୧l୧(ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡ଼ିହୀ ତହସିଲ ଅଧୀନ ଗେଡ଼ମା ପଞ୍ଚାୟତ ଜଳସରପୁର ଗ୍ରାମରେ ଏକ ସରକାରୀ ଜମିରେ ହୋଇଥିବା ଆବାସ ଘର ଉଚ୍ଛେଦ ବେଳେ ଅଭାବନୀୟ ଘଟଣା ଘଟିଛି। ଉଚ୍ଛେଦକୁ ବିରୋଧ କରି ଜଣେ ମହିଳା(ଘର ମାଲିକ) ବିଷ ପିଇ ଗୁରୁତର ହୋଇଛନ୍ତି। ଚିକିତ୍ସା ପାଇଁ ତାଙ୍କୁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଛି।
ମିଳିଥିବା ସୂଚନା ମୁତାବକ, ଗ୍ରାମର ପ୍ରେମଲତା ନାୟକଙ୍କ ଜମି ସମ୍ମୁଖରେ ଥିବା ସରକାରୀ ଜାଗା (ଖାତା ନଂ. ୪୧୫ ଏବଂ ପ୍ଲଟ ନଂ. ୧୧୭୧)କୁ ଗ୍ରାମର ରଞ୍ଜନ ଧଳ ଜବରଦଖଲ କରିଥିଲେ। ଫଳରେ ପ୍ରେମଲତା ନିଜ ଜମିକୁ ଯିବା ଆସିବା କରିବାରେ ବ୍ୟାଘାତ ସୃଷ୍ଟି ହେଉଥିଲା। ଏ ବାବଦରେ ପ୍ରେମଲତା ୨୦୨୩ରେ ଥାନା ଓ ବ୍ଲକ୍ ପ୍ରଶାସନ ନିକଟରେ ଅଭିଯୋଗ କରିଥିଲେ। କୌଣସି ପଦକ୍ଷେପ ନିଆ ନ ଯିବାରୁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କେସ ନଂ. ଡବ୍ଲ୍ୟୁ.ପି.(ସି)୧୯୬୬୯/୨୦୨୩ର ଶୁଣାଣି କରି ଏକ ଫାଇନାଲ ଅର୍ଡର ପାସ କରିବା ପାଇଁ ହାଇକୋର୍ଟ ହାଟଡ଼ିହୀ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଏନେଇ ଗୁରୁବାର ତହସିଲ କର୍ମଚାରୀ ଏବଂ ନନ୍ଦିପଦା ପୋଲିସ ଉପସ୍ଥିତିରେ ରଞ୍ଜନଙ୍କ ଗୃହ ଉଚ୍ଛେଦ କରାଯାଇଥିଲା। ଏହି ସମୟରେ ରଞ୍ଜନଙ୍କ ସ୍ତ୍ରୀ କନକଲତା ବିଷ ପିଇ ଦେଇଥିଲେ। ତାଙ୍କୁ ଚିକିତ୍ସା ପାଇଁ ପ୍ରଥମେ ଶାଳନିଆ ସିଏଚ୍ସି ଏବଂ ପରେ ଭଦ୍ରକ ମେଡିକାଲ ନିଆଯାଇଛି।
ସୂଚନା ଯୋଗ୍ୟ, କନକଲତା ସରକାରୀ ଜମିରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଏକ ଗୃହ ନିର୍ମାଣ କରି ଦୀର୍ଘ ବର୍ଷ ହେବ ପରିବାର ସହ ବସବାସ କରୁଥିଲେ। ଏନେଇ ନନ୍ଦିପଦା ଥାନା ଅଧିକାରୀ ରବିନ୍ଦ୍ର କୁମାର ପାତ୍ର କହିଛନ୍ତି, ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଗୃହ ଉଚ୍ଛେଦ କରାଯାଇଥିଲା। ସେହି ସମୟରେ ମହିଳା ଜଣଙ୍କ ବିଷ ପିଇଦେଇଥିଲେ। ତାଙ୍କୁ ତୁରନ୍ତ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା।
