ଦାରିଙ୍ଗବାଡି,୧୩।୧୨(ଅରୁଣ ସାହୁ):ଓଡିଶାର କଶ୍ମୀର କୁହାଯାଉଥିବା ଦାରିଙ୍ଗବାଡି ରେ ଶନିବାର ତୃତୀୟ ଦିନରେ ମଧ୍ୟ ତୁଷାରପାତ ହୋଇଛି। ଶୀତର ପ୍ରଭାବରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ବ୍ଲକ ଅଞ୍ଚଳର ସିମନବାଡି, ବାଡାବାଙ୍ଗା, ସିଆଙ୍ଗବାଲି, ଗ୍ରୀନବାଡିର କିଳାବାଡି, ପ୍ଳିହେରୀ, କଫିବଗିଚା, କଲେଜ ପଡିଆ, ଶ୍ରୀପଙ୍କା, ବାଡ଼ିପଦର, ଡବେରୀ, କିରିକୁଟି, ଦାସିଙ୍ଗବାଡ଼ି ଆଦି ଅଞ୍ଚଳରେ ପ୍ରବଳରୁ ଅତି ପ୍ରବଳ ତୁଷାରପାତ ହୋଇଛି। ଫଳରେ ଜନଜୀବନ ଅସ୍ତବ୍ୟସ୍ତ ସହ ତୁଷାରପାତ ଦେଖିବାକୁ ଲୋକଙ୍କ ଭିଡ଼ ଜମିଛି। ତେବେ ଏହି ତୁଷାରପାତ ପୂର୍ବଦିନ ଅପେକ୍ଷା ଶନିବାର ଶୀଘ୍ର ସକାଳ ସାଢେ ୭ଟା ସୁଦ୍ଧା ତରଳି ଯାଇଥିବା ଜଣାପଡିଛି। ଖୋଲା ଘାସ ପଡିଆ, ଧାନ ବିଲ ଓ ପାଣି ରହିଥିବା ଖୋଲା ଜମି ନିକଟରେ ଏହି ତୁଷାରପାତ ହୋଇଛି। କୌଣସି ଜନଗହଳିପୂର୍ଣ୍ଣ ଅଞ୍ଚଳରେ ଏହି ତୁଷାରପାତ ହୋଇ ନ ଥିବା ଜଣାପଡିଛି। ତାପମାତ୍ରା ଦିନକୁ ଦିନ ହ୍ରାସ ପାଇବାରେ ଲାଗିଥିବାବେଳେ ଦକ୍ଷିଣ ପବନ ବୋହୁଥିବାରୁ ଏହି ତୁଷାରପାତ ହେଉଥିବା ବିଜ୍ଞାନ ଶିକ୍ଷକ ତଥା କିରିକୁଟି ସିଆରସିସି ରାକେଶ କୁମାର ସାହୁ ମତ ପ୍ରକାଶ କରିଛନ୍ତି ଏହି ଶୀତ ସମୟରେ ସମସ୍ତେ ନିଜ ସୱାସ୍ଥ୍ୟପ୍ରତି ଧ୍ୟାନ ଦେବାକୁ ସେ ପରାମର୍ଶ ଦେଇଛନ୍ତି। ଶୀତର ମଜା ନେବାକୁ ଦାରିଙ୍ଗବାଡି ର ଇକୋ ରିଟ୍ରିଟ ସମେତ ବିଭିନ୍ନ ହୋଟେଲ, ଲଡଜ ଗୁଡିକରେ ପର୍ଯ୍ୟଟକ ରାତ୍ରିଯାପନ କରି ପ୍ରାତଃ ଭ୍ରମଣ କରି ମଜା ନେଉଥିବା ଜଣାପଡିଛି।
Dharitri – Odisha’s No.1 Odia Daily
