ନୂଆଦିଲ୍ଲୀ,୧୭।୧୦: ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ ପାଇଁ ଭାରତୀୟ କ୍ରିକେଟ ଟିମ୍ ପାକିସ୍ତାନ ଗସ୍ତ କରିବ କି ଏଷବ ଏମିତି ପ୍ରଶ୍ନ ଉଙ୍କି ମାରିଛି। ବର୍ତ୍ତମାନ ଭାରତୀୟ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଏସସିଓ ବୈଠକ ପାଇଁ ପାକିସ୍ତାନ ଗସ୍ତରେ ଅଛନ୍ତି। ଏହି ସମୟରେ ଆଇସିସି ଚାମ୍ପିଅନ୍ସ ଟ୍ରଫି ଏବଂ ଭାରତର ଆଭିମୁଖ୍ୟ ଉପରେ ଦୁଇ ଦେଶ ମଧ୍ୟରେ କୌଣସି ଆଲୋଚନା ହୋଇଥିଲା କି? ଏହି ପ୍ରଶ୍ନର ଉତ୍ତରରେ ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧିର ଜୟସୱାଲ କହିଛନ୍ତି ଯେ ବୈଦେଶିକ ମନ୍ତ୍ରୀଙ୍କ ପାକିସ୍ତାନ ଗସ୍ତ ସମୟରେ କ୍ରିକେଟ ସମ୍ପର୍କରେ କୌଣସି ଆଲୋଚନା ହୋଇନାହିଁ। ଏହାର ସ୍ପଷ୍ଟ ଅର୍ଥ ହେଉଛି ପାକିସ୍ତାନର ମାଟିରେ ଚାମ୍ପିଅନ୍ସ ଟ୍ରଫି ନ ଖେଳିବା ପାଇଁ ଭାରତର ନିଷ୍ପତ୍ତି ଏବେ ବି ସ୍ଥିର ରହିଛି।
ଆଇସିସି ଚାମ୍ପିଅନ୍ସ ଟ୍ରଫିରେ ଭାରତ ନିଜର ଆଭିମୁଖ୍ୟ ସ୍ପଷ୍ଟ କରିଛି। ଭାରତ ସ୍ପଷ୍ଟ ଭାବେ କହିଛି ଯେ ଭାରତୀୟ କ୍ରିକେଟ ଦଳ ପାକିସ୍ତାନ ଗସ୍ତ କରିବ ନାହିଁ। ଭାରତ ପକ୍ଷରୁ ଏକ ପରାମର୍ଶ ମଧ୍ୟ ଦିଆଯାଇଛି ଯେ ଯଦି ଏକ ନିରପେକ୍ଷ ସ୍ଥାନରେ ଏହି କାର୍ଯ୍ୟକ୍ରମ ଆୟୋଜିତ ହୁଏ ତେବେ ଭାରତ ପ୍ରସ୍ତୁତ ଅଛି। ଏଥି ସହିତ ପାକିସ୍ତାନ କ୍ରମାଗତ ଭାବରେ ଭାରତକୁ ନିବେଦନ କରୁଛି ଯେ ଭାରତ ପାକିସ୍ତାନର ମାଟିକୁ ଆସି ଚାମ୍ପିଅନ୍ସ ଟ୍ରଫିରେ ଭାଗ ନେବା ଉଚିତ, କିନ୍ତୁ ଆତଙ୍କବାଦ ଏବଂ କଥାବାର୍ତ୍ତା କିମ୍ବା କ୍ରିକେଟ ଏକାଠି ଖେଳିପାରିବ ନାହିଁ ବୋଲି ଭାରତ ସରକାର ମଧ୍ୟ ସ୍ପଷ୍ଟ ଭାବେ ସ୍ପଷ୍ଟ କରିଆସୁଛନ୍ତି। ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏସସିଓ ବୈଠକ ସମୟରେ ମଧ୍ୟ ଆତଙ୍କବାଦ ପ୍ରସଙ୍ଗକୁ ଉଚ୍ଚ ସ୍ବରରେ ଉଠାଇ ପାକିସ୍ତାନର ମାଟିକୁ ଯାଇ ନିଜ ଭାଷାରେ ଏହାର ଜବାବ ଦେଇଥିଲେ।
