ନୂଆଦିଲ୍ଲୀ,୧୮।୯: ସାଉଦି ଆରବ ଓ ପରମାଣୁ ଅସ୍ତ୍ରଧାରୀ ପାକିସ୍ତାନ ବୁଧବାର ‘ଷ୍ଟ୍ରାଟେଜିକ ମ୍ୟୁଚୁଆଲ ଡିଫେନ୍ସ ଏଗ୍ରିମେଣ୍ଟ’ ସ୍ୱାକ୍ଷର କରିଛନ୍ତି, ଯେଉଁଥିରେ ଉଲ୍ଲେଖ ଅଛି ଯେ “ଯେ କୌଣସି ଦେଶ ଉପରେ ଆକ୍ରମଣକୁ ଉଭୟ ଦେଶ ଉପରେ ଆକ୍ରମଣ ଭାବେ ଗଣାଯିବ।” ଏହି ନାଟୋ ଶୈଳୀର ଚୁକ୍ତିକୁ ପାକିସ୍ତାନ ଭାରତ ବିରୋଧରେ ରଣନୈତିକ ପ୍ରତିବନ୍ଧକ ଭାବେ ଦେଖୁଛି। ତେବେ ବିଶେଷଜ୍ଞମାନେ କହୁଛନ୍ତି, ଏହା ଭାରତ ଅପେକ୍ଷା ଇସ୍ରାଏଲକୁ ଲକ୍ଷ୍ୟ କରି ଏକ ରାଜନୈତିକ ପ୍ରଦର୍ଶନ।
ସାଉଦି ଅଧିକାରୀମାନେ ସ୍ପଷ୍ଟ କରିଛନ୍ତି ଯେ ଏହି ଚୁକ୍ତି କୌଣସି ନିର୍ଦ୍ଦିଷ୍ଟ ଦେଶ ବିରୋଧରେ ନୁହେଁ ଏବଂ ଭାରତ ସହ ସମ୍ପର୍କ “ପୂର୍ବ ଅପେକ୍ଷା ଅଧିକ ଦୃଢ଼”। ୨୦୨୪-୨୫ରେ ଭାରତ-ସାଉଦି ବାଣିଜ୍ୟ ୪୧.୮୮ ବିଲିୟନ ଡଲାର ଥିବା ବେଳେ ପାକିସ୍ତାନ-ସାଉଦି ବାଣିଜ୍ୟ ମାତ୍ର ୩-୪ ବିଲିୟନ ଡଲାର। ତେଣୁ ସାଉଦି ଭାରତ ବିରୋଧରେ ଯୁଦ୍ଧରେ ଯୋଗ ଦେବାର ସମ୍ଭାବନା କମ୍।
ଇସ୍ରାଏଲର କତାର ଉପରେ ସମ୍ପ୍ରତି ହମାସ ନେତାଙ୍କୁ ଲକ୍ଷ୍ୟ କରି ଆକ୍ରମଣ ପରେ ଏହି ଚୁକ୍ତି ମଧ୍ୟପ୍ରାଚ୍ୟରେ ଇସ୍ରାଏଲ ବିରୋଧରେ ଏକଜୁଟ ଇସ୍ଲାମିକ ମୋର୍ଚ୍ଚା ଗଠନର ସଙ୍କେତ ବୋଲି ବିଶେଷଜ୍ଞମାନେ ମତ ଦେଇଛନ୍ତି। ଏହା ପାକିସ୍ତାନକୁ ସାଉଦିର ହୁତି ସମସ୍ୟା ଭଳି ମଧ୍ୟପ୍ରାଚ୍ୟ ସଂଘର୍ଷରେ ଜଡ଼ିତ କରିପାରେ। ଭାରତ ଏହି ଚୁକ୍ତିର ଜାତୀୟ ଓ ଆଞ୍ଚଳିକ ନିରାପତ୍ତା ଉପରେ ପ୍ରଭାବ ଅଧ୍ୟୟନ କରିବ ବୋଲି କହିଛି।
