୨୦୨୭ ଆଇପିଏଲର ସମ୍ପୂର୍ଣ୍ଣ ସିଜନରୁ ବାଦ ପଡ଼ିବେ ପାଟ କମିନ୍ସ? ସଙ୍କେତ ଦେଲେ SRH ଅଧିନାୟକ

ନୂଆଦିଲ୍ଲୀ,୨୨।୧୧: ସନରାଇଜର୍ସ ହାଇଦ୍ରାବାଦର ଜଣେ ଖେଳାଳି ପାଟ କମିନ୍ସଙ୍କ ସହ ହୋଇଥିବା ଏକ ଆଲୋଚନା ବିଷୟରେ ଜଣାଇଛନ୍ତି, ଯେଉଁଥିରେ କମିନ୍ସ ୨୦୨୭ ଆଇପିଏଲରେ ନିଜର ଅଂଶଗ୍ରହଣ ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ଉଲ୍ଲେଖଯୋଗ୍ୟ ଯେ, ବ୍ୟସ୍ତବହୁଳ କାର୍ଯ୍ୟସୂଚୀ ଏବଂ ଦିନିକିଆ ବିଶ୍ୱକପ ପାଇଁ ପ୍ରସ୍ତୁତି ଦର୍ଶାଇ ମିଚେଲ ଷ୍ଟାର୍କ ଏବଂ ଟ୍ରାଭିସ ହେଡ ଆଗାମୀ ଆଇପିଏଲ ସିଜିନରୁ ଓହରି ଯାଇଛନ୍ତି। ଯେଉଁଠାରେ ଏହି ଖେଳାଳିମାନଙ୍କୁ ସେମାନଙ୍କ ଫ୍ରାଞ୍ଚାଇଜିଗୁଡ଼ିକ ଦଳରୁ ବାଦ ଦେଇଥିଲେ, ସେଠାରେ ସନରାଇଜର୍ସ ହାଇଦ୍ରାବାଦ (SRH) ପାଟ କମିନ୍ସଙ୍କୁ ଦଳରେ ବଜାୟ ରଖିଛିଯାହା ସ୍ପଷ୍ଟ ଭାବରେ ସୂଚିତ କରୁଛି ଯେ ସେ ଏଥିରେ ଅଂଶଗ୍ରହଣ କରିବେ। ଏହି ପରିପ୍ରେକ୍ଷୀରେ, ଏକ ନୂତନ ଖବର ସାମ୍ନାକୁ ଆସିଛି।
ପାଟ କମିନ୍ସ ସନରାଇଜର୍ସ ହାଇଦ୍ରାବାଦର ଅଧିନାୟକ ଅଟନ୍ତି। ଫ୍ରାଞ୍ଚାଇଜି ତାଙ୍କୁ ଦଳରେ ବଜାୟ ରଖିବା ନିଷ୍ପତ୍ତିରୁ ଏହା ସ୍ପଷ୍ଟ ହେଉଛି ଯେ ସେ ୨୦୨୭ ଆଇପିଏଲରେ ଖେଳିବାକୁ ଇଚ୍ଛୁକ ଅଛନ୍ତି। ରିପୋର୍ଟ ଅନୁଯାୟୀ, କମିନ୍ସ ନିଜର ଅଂଶଗ୍ରହଣ ନେଇ ସ୍ପଷ୍ଟ କରିସାରିଛନ୍ତି, ତେବେ ସେ କେବଳ କିଛି ନିର୍ଦ୍ଦିଷ୍ଟ ମ୍ୟାଚରେ ଖେଳିପାରନ୍ତି ବୋଲି ସଙ୍କେତ ଦେଇଛନ୍ତି।
ଦଳର ଜଣେ ବରିଷ୍ଠ ଖେଳାଳି ‘କ୍ରିକବଜ’ (Cricbuzz) ସହ କଥାବାର୍ତ୍ତା ବେଳେ ପାଟ କମିନ୍ସଙ୍କ ସହ ହୋଇଥିବା ଆଲୋଚନା ବିଷୟରେ ଜଣାଇଛନ୍ତି। ସେ କହିଛନ୍ତି, ‘ମୁଁ କମିନ୍ସଙ୍କ ସହ କଥା ହୋଇଥିଲି ଏବଂ ସେ ନିଶ୍ଚିତ କରିଛନ୍ତି ଯେ ସେ ଆଇପିଏଲ (IPL) ପାଇଁ ଭାରତ ଆସିବେଯଦି ପୂରା ସିଜିନ ପାଇଁ ନୁହେଁ, ତେବେ ଅନ୍ତତଃ କିଛି ମ୍ୟାଚ ପାଇଁ ସେ ନିଶ୍ଚିତ ଭାବେ ଆସିବେ।’
ଉଲ୍ଲେଖଯୋଗ୍ୟ ଯେ, ଗତ ଆଇପିଏଲ ସିଜିନରେ ମଧ୍ୟ ପାଟ କମିନ୍ସ କିଛି ମ୍ୟାଚ ଖେଳିପାରି ନଥିଲେ, କାରଣ ସେତେବେଳେ ‘କ୍ରିକେଟ ଅଷ୍ଟ୍ରେଲିଆ’ ତାଙ୍କୁ ଖେଳିବା ପାଇଁ ଅନୁମତି ଦେଇନଥିଲା। ଶେଷରେ ସେ ମୋଟ ୮ଟି ମ୍ୟାଚ ଖେଳିଥିଲେ। ତାଙ୍କ ଅନୁପସ୍ଥିତିରେ ଇଶାନ କିଶନ ଦଳର ଦାୟିତ୍ୱ ସମ୍ଭାଳିଥିଲେ।

Dharitri – Odisha’s No.1 Odia Daily

Share