ଭୁବନେଶ୍ୱର,୧୬।୪ (ବ୍ୟୁରୋ): ଶନିବାର ଚୈତ୍ର ପୂର୍ଣ୍ଣିମାରେ ‘ଗୋଲାପୀ ଜହ୍ନ’ (ପିଙ୍କ୍ ମୁନ୍) ଆକାଶରେ ଚମକିବ। ଏ ନେଇ ସୋସିଆଲ ମିଡିଆରେ ଭାଇରାଲ ହେଉଛି। ତେବେ ଏହାର ସତ୍ୟତା ଉପରେ ପଠାଣିସାମନ୍ତ ପ୍ଲାନେଟାରିୟମ ଉପନିର୍ଦ୍ଦେଶକ ଶୁଭେନ୍ଦୁ ପଟ୍ଟନାୟକ ତାଙ୍କ ମତ ରଖିଛନ୍ତି। ସେ କହିଛନ୍ତି, ଏହା କେବଳ ଏକ ନାମକରଣ, ଯାହାକି ଉତ୍ତର ଆମେରିକାର ଅଧିବାସୀମାନେ ଏପ୍ରିଲ ମାସରେ ପୂର୍ଣ୍ଣଚନ୍ଦ୍ରକୁ ଏପରି ନାମକରଣ କରିଥିଲେ। ହିନ୍ଦୁମାନେ ଏହି ପୂର୍ଣ୍ଣିମାକୁ ହନୁମାନ ଜୟନ୍ତୀ ଭାବେ ପାଳନ କରନ୍ତି। ସେହିପରି ବୌଦ୍ଧଧର୍ମାବଲମ୍ବୀଙ୍କ ପାଇଁ ଏହି ପୂର୍ଣ୍ଣିମା ବିଶେଷ କରି ଶ୍ରୀଲଙ୍କାରେ ‘ବକ୍ ପୋୟା’ ନାମରେ ପରିଚିତ। ତେବେ ବିଭିନ୍ନ ସଭ୍ୟତା ତଥା ଧର୍ମରେ ପୂର୍ଣ୍ଣଚନ୍ଦ୍ରକୁ ଏପରି ଭିନ୍ନଭିନ୍ନ ନାମକରଣ କରାଯାଇଛି। ଉତ୍ତର ଆମେରିକାର ଅଧିବାସୀମାନେ ଏପ୍ରିଲରେ ପୂର୍ଣ୍ଣଚନ୍ଦ୍ରକୁ ଏପରି ନାମକରଣ କରିବାର କାରଣ ହେଲା, ଏହି ସମୟରେ ବସନ୍ତଋତୁର ଆଗମନରେ ‘ମସ୍ ଫ୍ଲକ୍ସ’ ନାମକ ଏକ ଲତାରେ ଗୋଲାପୀ ରଙ୍ଗର ଫୁଲ ଚାରିଆଡ଼େ ଦେଖାଯାଏ। ସେଥିପାଇଁ ଉତ୍ତର ଆମେରିକାର ବାସିନ୍ଦା ଏପ୍ରଲ ମାସର ପୂର୍ଣ୍ଣଚନ୍ଦ୍ରକୁ (ପିଙ୍କ ମୁନ୍) ବା ଗୋଲାପୀ ଚନ୍ଦ୍ର ନାମକରଣ କରିଥିଲେ, ଯାହା ଏବେ ମଧ୍ୟ କିଛି ସ୍ଥାନରେ ପ୍ରଚଳିତ ହେଉଛି। ଏହାର ଚନ୍ଦ୍ରର ରଙ୍ଗ ସହ କୌଣସି ସମ୍ପର୍କ ନାହିଁ। ତେଣୁ ସୋସିଆଲ ମିଡିଆରେ ପ୍ରଚାରିତ ହେଉଥିବା ଏପ୍ରିଲ୍ ୧୬ ତାରିଖ ଶନିବାର ପୂର୍ଣ୍ଣିମାରେ ‘ପିଙ୍କ୍ ମୁନ୍ ’ଦେଖାଯିବ ଏବଂ ରାତିରେ ଆକାଶ ଚମକିବାରେ କୌଣସି ସତ୍ୟତା ନାହିଁ।
