ସାତମାଇଲ୍, ୨୫।୫(ଡି.ଏନ୍.ଏ.) ଭଙ୍ଗା ଦଦରା ଘର। କେଇ ଖଣ୍ଡ ବାଉଁଶ ଭରସାରେ ଛିଡ଼ା ହୋଇଛି। ଉପରେ ପଡ଼ିଛି ଚିରାକୋତରା ଜରିପାଲ। ଦିନରେ ସୂର୍ଯ୍ୟ, ରାତିରେ ଆତଜାତ ହେଉଛି ଜହ୍ନ। ସାମାନ୍ୟ ବର୍ଷା ହେଲେ ଘରେ ଲହଡ଼ି ଖେଳୁଛି ପାଣି। ବତୁରି ଯାଉଛି ଚୁଲି। ଦଲକାଏ ପବନ ବହିଲେ କି କଳାହାଣ୍ଡିଆ ମେଘ ଉଠାଇଲେ ଦାଉଁଦାଉଁ ହୋଇଯାଉଛି ଛାତି। ୪ ପ୍ରାଣୀଙ୍କୁ ସାହାରା ଦେଉଥିବା ଏହି ଆଶ୍ରୟ ଟିକକ ଯଦି ଚାଲିଯାଏ, ତେବେ ଭେଳା ବୁଡ଼ିଯିବ। କେଉଁଠି ରହିବେ, କେମିତି ଚଳିବେ ଏହାକୁ ନେଇ ଚିନ୍ତାରେ ଦିନ କାଟୁଛନ୍ତି ବୃଦ୍ଧା କଲ୍ୟାଣୀ ସେନାପତି। ପରିଣତ ବୟସରେ ଦିବ୍ୟାଙ୍ଗ ପୁଅ, ବୋହୂ ଏବଂ ନାତିଙ୍କ ବୋଝ ବୋହି ଚାଲିଥିବା ଏହି ସ୍ବାମୀହରା ମହିଳା ପରିବାରକୁ ବଞ୍ଚାଇ ରଖିବା ପାଇଁ ସଂଘର୍ଷ ଚଳାଇଥିବାବେଳେ ଭଙ୍ଗାଦଦରା ଘରୁ କୋହଭରା କଣ୍ଠରେ ପ୍ରଶାସନକୁ ପ୍ରଶ୍ନ ପଚାରିଛନ୍ତି ‘କ’ଣ ମରିବା ପରେ ଆବାସ ଦେବ କି’।
ଜିଲାର ପ୍ରମୁଖ ଶିଳ୍ପ କରିଡର ଓଡ଼ାପଡ଼ା ବ୍ଲକ। ଏଠାରେ ଗଢ଼ି ଉଠିଛି ବହୁ ନାମୀଦାମୀ କମ୍ପାନୀ। ଶିଳ୍ପାଞ୍ଚଳ ହୋଇଥିବାରୁ ସରକାରଙ୍କ ଫୋକ୍ସରେ ସବୁବେଳେ ରହି ଆସିଛି ଏହି ବ୍ଲକ। ଗମନାଗମନ, ଶିକ୍ଷା, ସ୍ବାସ୍ଥ୍ୟର ବିକାଶ ଲାଗି ସର୍ବଦା ଉକ୍ତ ବ୍ଲକକୁ ଜିଲା ପ୍ରଶାସନ ଅଗ୍ରାଧିକାର ଦେଇ ଆସୁଥିବା କହୁଥିବାବେଳେ ମୋଟଙ୍ଗା ଥାନା ଅନ୍ତର୍ଗତ ମୃଦଙ୍ଗାପଲ୍ଲି ଗ୍ରାମର କଲ୍ୟାଣୀଙ୍କ କ୍ଷେତ୍ରରେ ପରିଲକ୍ଷିତ ହୋଇଛି ବ୍ୟତିକ୍ରମ। କିଡ୍ନୀ ରୋଗରେ ପଡ଼ି ୬ବର୍ଷ ତଳେ କଲ୍ୟାଣୀଙ୍କ ସ୍ବାମୀ ଆଦିକନ୍ଦ ସେନାପତି ଚାଲିଗଲେ ପରପାରିକୁ। ଏକ ଦୁର୍ଘଟଣାରେ ପୁଅ ପ୍ରେମାନନ୍ଦ ହରାଇଛନ୍ତି ବାମହାତ। ସ୍ବାସ୍ଥ୍ୟ ବିଭାଗ ପକ୍ଷରୁ ଦିଆଯାଇଥିବା ସାର୍ଟିଫିକେଟ୍ରେ ସେ ୭୫% ଭିନ୍ନକ୍ଷମ। ଘରେ ବୋହୂ ଏବଂ ଛୋଟ ନାତି। କଲ୍ୟାଣୀଙ୍କ ମିଳୁଥିବା ମାସିକ ୫୦୦ ଟଙ୍କା ବିଧବା ଭତ୍ତା, ପ୍ରେମାନନ୍ଦଙ୍କୁ ମିଳୁଥିବା ଦିବ୍ୟାଙ୍ଗ ଭତ୍ତା ଏବଂ ଟଙ୍କିକିଆ ଚାଉଳରେ ପରିବାର ଚଳିବା ମୁସ୍କିଲ୍ ହୋଇପଡୁଛି। ବୟସାଧିକ୍ୟ କାରଣରୁ କଲ୍ୟାଣୀ ଦୁର୍ବଳ ହୋଇଗଲେଣି। କାମ କରିପାରୁନାହାନ୍ତି। ଏଭଳି ସ୍ଥିତିରେ ମୁଣ୍ଡ ଉପରେ ଛାତ ନ ଥିବା ତାଙ୍କୁ ସବୁଠୁ ବେଶି ବିଚଳିତ କରୁଛି। ଆଗକୁ ବର୍ଷା ଆସୁଥିବାରୁ ପରିବାରକୁ ନେଇ କେଉଁଠାରେ ରହିବେ ତାହାକୁ ନେଇ ଚିନ୍ତାରେ ପଡ଼ିଛନ୍ତି ସେ। ସମସ୍ୟା ସମ୍ପର୍କରେ କଲ୍ୟାଣୀ କହିଛନ୍ତି, ଆବାସ ଯୋଜନାରେ ଘର ଖଣ୍ଡିଏ ପାଇବାକୁ ସେ ସବୁକ୍ଷେତ୍ରରେ ଯୋଗ୍ୟ। ପ୍ରଶାସନର ବାରମ୍ବାର ଦ୍ୱାରସ୍ଥ ହୋଇ ଏଥିଲାଗି ଗୁହାରି କରିଥିଲେ ମଧ୍ୟ ତାଙ୍କ ଉପରେ କାହାରି ସୁଦୃଷ୍ଟି ପଡୁନି। ସରକାର ଗରିବ ଲୋକଙ୍କ ପାଇଁ ଏତେ ଯୋଜନା କରିଛନ୍ତି। ହେଲେ ଆମ ପାଇଁ କିଏ ନାହିଁ ବୋଲି କ୍ଷୋଭର ସହ କହିଛନ୍ତି କଲ୍ୟାଣୀ।
ଏ ନେଇ ବିଡିଓ ଦାଶରଥି ଜେନା କୁହନ୍ତି, ହୁଏତ ଅଭିଯୋଗକାରିଣୀ ମହିଳା କଲ୍ୟାଣୀ ସେନାପତି ଠିକ୍ ସମୟରେ ଆବାସ ଯୋଜନାରେ ସାମିଲ ହେବା ପାଇଁ ଦରଖାସ୍ତ କରି ନ ଥିବେ। ତେଣୁ ତାଙ୍କୁ କାର୍ଯ୍ୟାଦେଶ ମିଳିପାରିନାହିଁ। ଦେଖିବା ଖଣ୍ଡେ ପାଲ ବ୍ୟବସ୍ଥା କରିଦେବା। ଅସହାୟା କଲ୍ୟାଣୀଙ୍କ ପରିବାର ପାଇଁ ବ୍ଲକ ପ୍ରଶାସନ ମୁଖ୍ୟଙ୍କ ଏଭଳି ମନ୍ତବ୍ୟ ଆବାସ ଯୋଜନାର ଠିକ୍ କାର୍ଯ୍ୟକାରିତା ଉପରେ ବିରାଟ ପ୍ରଶ୍ନବାଚୀ ସୃଷ୍ଟି କରିଛି। ଏ ଦିଗରେ ଜିଲାପାଳ ଦୃଷ୍ଟି ଦେବାକୁ ଅଞ୍ଚଳର ବୁଦ୍ଧିଜୀବୀ ଦାବି କରିଛନ୍ତି।