ନୂଆଦିଲ୍ଲୀ,୨୬।୯: ରାଜସ୍ଥାନରେ ମୁଖ୍ୟମନ୍ତ୍ରୀ ପରିବର୍ତ୍ତନକୁ ନେଇ ସଚିନ ପାଇଲଟ ଏବଂ ଅଶୋକ ଗେହଲଟଙ୍କ କ୍ୟାମ୍ପ୍ ମୁହାଁମୁହିଁ ହୋଇଛି। ଗେହଲଟ କ୍ୟାମ୍ପର ବିଧାୟକମାନେ ମୁଖ୍ୟମନ୍ତ୍ରୀ ପଦ ପାଇଁ ସଚିନ ପାଇଲଟଙ୍କ ନାମକୁ ବିରୋଧ କରୁଛନ୍ତି। ଦଳ ମଧ୍ୟରେ ଥିବା ମତଭେଦକୁ ନେଇ ଅନ୍ୟ ଦଳ ରାଜସ୍ଥାନରେ କଂଗ୍ରେସକୁ ଟାର୍ଗେଟ କରିବା ଆରମ୍ଭ କରିଛନ୍ତି।
କଂଗ୍ରେସର ବିକଳ୍ପ ଭାବେ ଆମ୍ ଆଦମୀ ପାର୍ଟି(ଏଏପି) ଉଭା ହେବ କି ପ୍ରଶ୍ନରେ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଏଏପି ସୁପ୍ରିମୋ ଅରବିନ୍ଦ କେଜ୍ରିୱାଲ କହିଛନ୍ତି, ମୁଁ ଏହି ବିକଳ୍ପକୁ ବୁଝିପାରୁ ନାହିଁ, ଆମକୁ ଦେଶକୁ ଆଗକୁ ନେବାକୁ ପଡିବ। ଉଭୟ କଂଗ୍ରେସ ଏବଂ ଭାଜପା ଭଙ୍ଗା-ଯୋଡା ରାଜନୀତି କରୁଛନ୍ତି। ଏବେ ଆମ ଆଦମୀ ପାର୍ଟି ସମଗ୍ର ଦେଶରେ ଭରସା ସାଜିଛି। ଆମେ ରାଜନୀତି ଜାଣୁନାହୁଁ, ଜନସାଧାରଣଙ୍କ ପାଇଁ କାମ କରୁ, ବିଦ୍ୟାଳୟ ଏବଂ ଡାକ୍ତରଖାନା ନିର୍ମାଣ କରୁ। ଏହି କାରଣରୁ ଦିଲ୍ଲୀ ଏବଂ ପଞ୍ଜାବରେ ସରକାର ଗଠନ କରିଛୁ। ବର୍ତ୍ତମାନ ଗୁଜରାଟର ମଧ୍ୟ ଆମ ଆଦମୀ ପାର୍ଟି ସରକାର ଗଠନ ହେବ ବୋଲି ସେ ଦାବି କରିଛନ୍ତି।
ସୂଚନାଯୋଗ୍ୟ, କଂଗ୍ରେସ ଅଧ୍ୟକ୍ଷ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଘୋଷଣା କରିବା ପରେ ରାଜ୍ୟରେ ମୁଖ୍ୟମନ୍ତ୍ରୀ ପରିବର୍ତ୍ତନ ନେଇ ଆଲୋଚନା ଆରମ୍ଭ ହୋଇଛି। କାରଣ କଂଗ୍ରେସରେ ‘ଜଣେ ବ୍ୟକ୍ତି-ଗୋଟିଏ ପୋଷ୍ଟ’ର ନୀତି ରହିଛି। ଏହି ଆଧାରରେ ଗେହଲଟ କଂଗ୍ରେସ ଅଧ୍ୟକ୍ଷ ହେଲେ ମୁଖ୍ୟମନ୍ତ୍ରୀ ପଦରେ ରହିପାରିବେ ନାହିଁ। ତେଣୁ ତାଙ୍କ ସ୍ଥାନରେ ସଚିନ ପାଇଲଟ ହିଁ ଏହି ପଦ ପାଇଁ ମୁଖ୍ୟ ଦାବିଦାର କୁହାଯାଉଛି। କିନ୍ତୁ ଗେହଲଟଙ୍କ ସମର୍ଥକ ବିଧାୟକ ସଚିନଙ୍କୁ ଏହି ପଦରେ ବସାଇବାକୁ ରାଜି ନାହାନ୍ତି।
