ବୈପାରିଗୁଡ଼ା,୪।୧୨ (ଡି.ଏନ୍.ଏ.): ବନ୍ୟଜନ୍ତୁଙ୍କ ପାଇଁ ମରଣଯନ୍ତା ପାଲଟିଛି ରାଞ୍ଚି-ବିଜୟୱାଡା ରାସ୍ତା। ୨ ବର୍ଷ ମଧ୍ୟରେ ଶହ ଶହ ବିରଳ ପଶୁପକ୍ଷୀ ଦ୍ରୁତଗାମୀ ବସ୍ ଚକା ତଳେ ଚାପିହୋଇ ମୃତ୍ୟୁବରଣ କଲେଣି। ଏନେଇ ବନ ବିଭାଗର ନିଦ ଭାଙ୍ଗୁନାହିଁ। ୨ ବର୍ଷ ତଳେ ବୈପାରିଗୁଡ଼ା ଦେଇ ରାଞ୍ଚି-ବିଜୟୱାଡା ଜାତୀୟ ରାଜପଥ ନିର୍ମାଣ ହୋଇଛି। ରାସ୍ତାର ଓସାର ପ୍ରାୟ ୬୦ ଫୁଟ୍ ରହିଛି। ଉକ୍ତ ରାସ୍ତାର ଉଭୟ ପାର୍ଶ୍ୱରେ ଜୟପୁର ବନଖଣ୍ଡ ଅଧୀନ ଜୟପୁର ତଥା ବୈପାରିଗୁଡ଼ା ବନାଞ୍ଚଳର ପ୍ରାୟ ୪୦ କି.ମି. ଜଙ୍ଗଲ ରହିଛି। ଭୋର ସମୟରେ ଅନେକ ଦ୍ରୁତଗାମୀ ଯାତ୍ରୀବାହୀ ବସ୍ ଏହି ଜଙ୍ଗଲରାସ୍ତା ଦେଇ ଅତିକ୍ରମ କରେ। ଖାଦ୍ୟ ଅନ୍ବେଷଣରେ ବାହାରକୁ ଯାଇଥିବା ବନ୍ୟ ପ୍ରାଣୀମାନେ ପାହାନ୍ତିଆ ସମୟରେ ବସାକୁ ଫେରିବା ବେଳେ ରାସ୍ତା ପାରହେବାକୁ ପଡେ। ରାସ୍ତା ପାର ହେଉଥିବା ବେଳେ ବସ୍ ସେମାନଙ୍କ ଉପରେ ଚଢ଼ି ଚାଲିଯାଏ। ମଙ୍ଗଳବାର ସକାଳେ ଚନ୍ଦ୍ରପଡ଼ା ନିକଟରେ ଏକ ଠେକୁଆର ମୃତଦେହ ପଡିଥିବା ଦେଖିବାକୁ ମିଳିଥିଲା। କିଛିଦିନ ପୂର୍ବରୁ ପାଲିଗଡ଼ା ନିକଟବର୍ତ୍ତୀ ଜଙ୍ଗଲକୁ ଲାଗିଥିବା ଏହି ରାସ୍ତାରେ ଏକ ଶାଳିଆପତନିର ବସ୍ ଚାପାରେ ମୃତ୍ୟୁ ହୋଇଥିବା ଦେଖିବାକୁ ମିଳିଥିଲା। ଗତ ବର୍ଷ ଠିକ୍ ଏହି ସମୟରେ ମଧ୍ୟ ଅନେକ ବନ୍ୟପ୍ରାଣୀଙ୍କ ବସ୍ ଚାପାରେ ମୃତ୍ୟୁ ହୋଇଥିଲା। ପାର୍ଶ୍ୱବର୍ତ୍ତୀ ଜଙ୍ଗଲର ଠେକୁଆଙ୍କ ମୃତ୍ୟୁ ଘଟୁଥିବାରୁ ଏହି ପ୍ରଜାତିର ଜୀବଙ୍କ ସଂଖ୍ୟା କ୍ରମଶଃ ଲୋପ ପାଇବାକୁ ବସିଲାଣି। ଅନେକ ସମୟରେ ପେଚା, ବାଦୁଡ଼ି, ଚିଲ ଓ ବଣ ବିଲେଇ ଆଦି ମରିବାର ନଜିର ମଧ୍ୟ ରହିଛି। ସୂଚନାଯୋଗ୍ୟ, ଏ ସଂକ୍ରାନ୍ତରେ ଗତ ଜାନୁୟାରୀରେ ଏକ ବିସ୍ତୃତ ଖବର ‘ବନ୍ୟଜନ୍ତୁଙ୍କ ପାଇଁ ଡେଥ୍ ଜୋନ୍ ରାଞ୍ଚି-ବିଜୟୱାଡା ରାସ୍ତା’ଶୀର୍ଷକ ଏକ ଖବର ପ୍ରକାଶ ପାଇଥିଲା। ଉକ୍ତ ଖବରକୁ ନେଇ ତତ୍କାଳୀନ ବୈପାରିଗୁଡ଼ା ବନାଞ୍ଚଳ ଅଧିକାରୀ ରମେଶ ଚନ୍ଦ୍ର ରାଉତ ଦୁର୍ଘଟଣାକୁ ରୋକିବାକୁ ବିଭିନ୍ନ ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଥିଲେ। ଗାଡିଚାଳକଙ୍କ ପାଇଁ ସଚେତନତାଧର୍ମୀ ରେଡିୟମ ଫଳକ ସ୍ଥାନେ ସ୍ଥାନେ ଲଗାଯିବ। ଏହାକୁ ଉଲ୍ଲଂଘନ କଲେ କଠୋର ପଦକ୍ଷେପ ନିଆଯିବ ବୋଲି ସେ କହିଥିଲେ। ମାତ୍ର ତାହା ଏଯାଏ କାର୍ଯ୍ୟକାରୀ ହେଲାନାହିଁ।
