କେନ୍ଦୁଝର,୨୫ା୪(ଦୀପକ ମିଶ୍ର)କେନ୍ଦୁଝର ବନଖଣ୍ଡର ୭ଟି ରେଞ୍ଜ ଅନ୍ତର୍ଗତ ବିଭିନ୍ନ ଜଙ୍ଗଲରେ ନିଆଁ ଲାଗିଛି। ଏଥିରେ ବହୁ ମୂଲ୍ୟବାନ୍ ଗଛ ନଷ୍ଟ ହେଉଥିବା ବେଳେ ବନ୍ୟପ୍ରାଣୀ ଉତ୍ତାପରେ କଲବଲ ହେଉଛନ୍ତି। ଜିଲାରେ ଅସହ୍ୟ ଗ୍ରୀଷ୍ମପ୍ରବାହ ଜାରି ରହିଥିବା ବେଳେ ୨୧ ତାରିଖରେ ସର୍ବାଧିକ ତାପମାତ୍ରା ୪୩.୬ ଡିଗ୍ରୀ ହୋଇଥିଲା। ପ୍ରତିଦିନ ତାପମାତ୍ରା ବଢୁଥିବା ବେଳେ ବନାଗ୍ନି ସ୍ଥିିତି ମଧ୍ୟ ବଢ଼ିବାରେ ଲାଗିଛି। ଚଳିତ ବର୍ଷ ବନ ବିଭାଗ ପକ୍ଷରୁ ୧୨୩୫ କି.ମି. ଫାୟାର ଲାଇନ କରାଯାଇଥିଲା। ତଥାପି ଜଙ୍ଗଲ ନିଆଁ ରୋକିବାକୁ ବନ ବିଭାଗ ସକ୍ଷମ ହୋଇନାହିଁ।
ସୂଚନା ଅନୁଯାୟୀ, ସିଦ୍ଧମଠ, କାକୁଡ଼ଇମ୍ବା, କାଞ୍ଜିପାଣି, ଚମକପୁର, ଠାକୁରାଣୀ, କଳାପାଟ, ଅଟେଇ ସଂରକ୍ଷିତ ଜଙ୍ଗଲରେ ନିଆଁ ଲାଗି ଔଷଧୀୟ ବୃକ୍ଷଲତା ସମେତ ଅନ୍ୟାନ୍ୟ ପୁରାତନ ଗଛ ପୋଡ଼ି ପାଉଁଶ ହୋଇଯାଇଛି। ଫାୟାର ଲାଇନ ରକ୍ଷଣାବେକ୍ଷଣ ଠିକ୍ ଭାବରେ ହେଉ ନ ଥିବାରୁ ଜଙ୍ଗଲରେ ନିଆଁ ଲାଗିଲେ ଅନ୍ୟ ସ୍ଥାନକୁ ବ୍ୟାପୁଛି। ବନ କର୍ମଚାରୀମାନେ ଯେତିକି ନିଆଁ ଲିଭାଉଛନ୍ତି ଅନ୍ୟପଟେ ସେତିକି ମାଡ଼ି ମାଡ଼ି ଚାଲିଛି। ଚଳିତ ବର୍ଷ ତେଲକୋଇ ରେଞ୍ଜ, ଘଟଗାଁ ଏବଂ ଚମ୍ପୁଆ ରେଞ୍ଜରେ ବଡ଼ଧରଣର ବନାଗ୍ନି ସୃଷ୍ଟି ହୋଇଛି। କେନ୍ଦୁଝର ଡିଭିଜନରେ ଅଧିକାଂଶ ଜଙ୍ଗଲରେ ନିଅଁା ମନ୍ୟୁଷକୃତ ହୋଇଥିବା ବନ ବିଭାଗ ପକ୍ଷରୁ କୁହାଯାଇଛି। ଶିକାର ଓ ପୋଡ଼ୁଚାଷ ପାଇଁ ଜଙ୍ଗଲରେ ନିଆଁ ଲଗାଉଛନ୍ତି। ଜଙ୍ଗଲ ନିଆଁ ପ୍ରଭାବରେ ବହୁ ସଂଖ୍ୟାରେ ବନ୍ୟଜନ୍ତୁ ଜଙ୍ଗଲ ଛାଡ଼ି ଜନବସତିକୁ ପଳାଇ ଆସୁଛନ୍ତି। ଫଳରେ ଶିକାରୀ, ଜଙ୍ଗଲ ପାଖ ଗ୍ରାମବାସୀ ବନ୍ୟପ୍ରାଣୀଙ୍କୁ ମାରି ଖାଉଥିବା ଜଣାଯାଇଛି। ଫରେଷ୍ଟ ସର୍ଭେ ଅଫ୍ ଇଣ୍ଡିଆ ଦେଇଥିବା ଉପଗ୍ରହ ତଥ୍ୟ ଅନୁସାରେ କେନ୍ଦୁଝର ବନଖଣ୍ଡରେ ଅଦ୍ୟାବଧି ୪୦୦ରୁ ଊର୍ଦ୍ଧ୍ୱ ସ୍ଥାନରେ ଜଙ୍ଗଲ ନିଆଁ ସୃଷ୍ଟି ହୋଇଛି। ଭୂୟାଁ ଜୁଆଙ୍ଗପୀଢ଼ ରେଞ୍ଜର ଶୁଆକାଟୀ ସେକ୍ସନ ଗୁଣ୍ଡୁଳା ଏବଂ କାଞ୍ଜିପାଣି ସେକ୍ସନର ବାଲି, ବେଣିଡିହି ଏବଂ ଟାଙ୍ଗରପଡ଼ା, ସଦର ରେଞ୍ଜ ଜଙ୍ଗିରା ସେକ୍ସନ କପ୍ତିଡିହା, ନଡ଼ାମ, ଡୁମୁରିଆ, ବାରାହଗଡ଼ ଏବଂ ତେଲକୋଇ ରେଞ୍ଜ ତାଳପଦା ସେକ୍ସନ ଓରିଆ ବିଟ୍ ଅଞ୍ଚଳରେ ପୋଡୁଚାଷ ପାଇଁ ଚଳିତ ବର୍ଷ ଜଙ୍ଗଲରେ ଜୁଆଙ୍ଗ ଲୋକ ନିଆଁ ଲଗାଉଛନ୍ତି। ବନାଗ୍ନି ରୋକିବାକୁ ଫେବୃଆରୀରୁ ବନ ବିଭାଗ ଗାଁ ଗାଁରେ ପାଲା, ସଚେତନତା ସଭା, ପଥପ୍ରାନ୍ତ ନାଟକ କରୁଥିଲେ ହେଁ ଜଙ୍ଗଲ ନିଆଁ ରୋକିବା ସମ୍ଭବପର ହେଉନାହିଁ। ଡିଏଫ୍ଓ ଏଚ୍. ଡି. ଧନ୍ରାଜ କହିଛନ୍ତି, ସମସ୍ତ ସ୍ଥାନରେ ନିଆଁ ମନୁଷ୍ୟକୃତ। ବନ ବିଭାଗ ପକ୍ଷରୁ ବ୍ୟାପକ ସଚେତନତା ସତ୍ତ୍ୱେ ଲୁଚାଛପାରେ ଜଙ୍ଗଲରେ ପୋଡୁଚାଷ, ମହୁଲ ଫୁଲ ସଂଗ୍ରହ, ବନ୍ୟପ୍ରାଣୀ ଶିକାର ଏବଂ ଜାଳେଣି କାଠ ସଂଗ୍ରହ ପାଇଁ ଏଭଳି ନିଆଁ ଲଗାଯାଉଛି। ନିଆଁ ଲିଭା କାର୍ଯ୍ୟରେ ୧୪୪ଟି ମେଶିନ,୧୦୪ ଜଣ କର୍ମଚାରୀ ଓ ୧୦ଟି ରକ୍ଷକ ଗାଡ଼ି ନିୟୋଜିତ କରାଯାଇଛି।
