ଦେବଗଡ,୨୪।୮(ଶଶାଙ୍କ ଶେଖର ଝାଙ୍କର): ସ୍ତ୍ରୀକୁ ପିଟିପିଟି ହତ୍ୟା ଅଭିଯୋଗରେ ଜେଲ ଗଲେ ସ୍ବାମୀ । ଦେବଗଡ ଜିଲା କୁଣ୍ଢେଇଗୋଳା ଥାନା ପରା ଗ୍ରାମରେ ଏଭଳି ଏକ ଅଭାବନୀୟ ଘଟଣା ଦେଖାଦେଇଛି । ପରା ଗ୍ରାମର ଦୀପକ ମାହାର ତାଙ୍କ ସ୍ତ୍ରୀ ଭାରତୀ ମାହାରଙ୍କୁ ହତ୍ୟା କରିଥିବା ନେଇ ଗତ ୨୧ ତାରିଖ କୁଣ୍ଢେଇଗୋଳା ଥାନାରେ ଅଭିଯୋଗ ହୋଇଥିଲା । ଭାରତୀଙ୍କ ଭଉଣୀ ସୁକୁମାରୀ ନାଏକ କୁଣ୍ଢେଇଗୋଳା ଥାନାରେ ହତ୍ୟା ଅଭିଯୋଗ କରିଥିବାବେଳେ ପୋଲିସ କେସ ନମ୍ବର ୧୮୭/୨୫ ମାମଲା ରଜୁ କରି ତଦନ୍ତ ଆରମ୍ଭ କରିଥିଲା । ପୋଲିସ ଶନିବାର ଦୀପକଙ୍କୁ ଅଟକ ରଖି ପଚରାଉଚୁରା ପରେ ସେ ହତ୍ୟା କରିଥିବା ଜାଣିବାକୁ ପାଇଥିଲା ।
ଫଳରେ ସ୍ତ୍ରୀଙ୍କୁ ହତ୍ୟା ଅଭିଯୋଗରେ ଦୀପକଙ୍କୁ କୋର୍ଟଚାଲାଣ କରାଯାଇଥିବା ବେଳେ ମାନ୍ୟବର ଅଦାଲତ ତାଙ୍କୁ ଜେଲ ହାଜତକୁ ପଠାଇ ଦେଇଛନ୍ତି । ତେବେ ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ ଦୀପକ ଭୁବନେଶ୍ୱରରେ ରହି ଶ୍ରମିକ ଭାବେ କାମ କରୁଥିବା ବେଳେ କିଛି ଦିନ ହେଲା ଘରକୁ ଆସିଥିଲେ । ତେବେ ତାଙ୍କ ସ୍ତ୍ରୀ ଭାରତୀ ପ୍ରାୟ ସମୟରେ ଫୋନ ଯୋଗେ ଅନ୍ୟ କାହା ସହିତ କଥା ହେଉଥିବାରୁ ଦୀପକଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା ଓ ଏହାକୁ ନେଇ ଗତ ୨୦ ତାରିଖ ରାତ୍ରୀରେ ସ୍ବାମୀ ଓ ସ୍ତ୍ରୀ ମଧ୍ୟରେ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ ଦୀପକ ତାଙ୍କ ସ୍ତ୍ରୀଙ୍କୁ ଗାଳିଗୁଳଜ କରି ମାଡ ମାରିବା ସହ ହାତ ଧରି ଟାଣିଦେବାରୁ ସ୍ତ୍ରୀ କଂକ୍ରିଟ ଚଟଣାରେ ପଡି ଯାଇଥିଲେ । ଫଳରେ ମୁଣ୍ଡରେ ଗୁରୁତର ଆଘାତ ଲାଗିଥିଲା । ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ନମନ୍ତେ ତାଙ୍କୁ ଛେଣ୍ଡିପଦା ଡାକ୍ତରଖାନାକୁ ନିଆଯାଇଥିବାବେଳେ ଡାକ୍ତର ଭାରତୀଙ୍କର ମୃତ୍ୟୁ ଘୋଷଣା କରିଥିଲେ । ଏନେଇ ପରା ଗ୍ରାମର କୌଣସି ଜଣେ ବ୍ୟକ୍ତି ଭାରତୀଙ୍କ ବାପଘର ଲୋକଙ୍କୁ ଫୋନ ଯୋଗେ ଜଣାଇଥିଲେ ।
ସୂଚନା ପାଇ ଭାରତୀଙ୍କ ବାପଘର ଲୋକ ଆସିଥିବାବେଳେ ଭାରତୀଙ୍କ ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ । ଏଥିସହ ଭାରତୀଙ୍କୁ ତାଙ୍କ ସୱାମୀ ଦୀପକ ହତ୍ୟା କରିଥିବା ଅଭିଯୋଗ କରିଥିଲେ । ଅଭିଯୋଗ ଅଧାରରେ ପୋଲିସ ଦୀପକଙ୍କୁ ଗିରଫ କରି କୋର୍ଟଚାଲାଣ କରାଯାଇଛି।
