ନୂଆଦିଲ୍ଲୀ,୨୭ା୧୧: ବର୍ତ୍ତମାନ ଭାରତରେ ବିବାହ ଉତ୍ସବଗୁଡ଼ିକ ଅଧିକ ବ୍ୟାପକ, ବିଳାସପୂର୍ଣ୍ଣ ଏବଂ ଖର୍ଚ୍ଚବହୁଳ ହେବାରେ ଲାଗିଛି। ତେବେ ଏହି ବଡ଼ ‘ଭାରତୀୟ ବିବାହ’ ସହିତ ଜଡ଼ିତ ବଡ଼ ଆର୍ଥିକ ବିପଦକୁ ଦୃଷ୍ଟିରେ ରଖି ନିକଟରେ ବିବାହ ବୀମା (Wedding Insurance) ଗ୍ରହଣ କରିବା ଏକ ନୂଆ ଟ୍ରେଣ୍ଡ ଭାବେ ଉଭା ହୋଇଛି।
ଏକ ରିପୋର୍ଟ ଅନୁଯାୟୀ, ଆଜି ଭାରତରେ ହେଉଥିବା ହାରାହାରି ବିବାହରେ ପ୍ରାୟ ୨୮.୫ ଲକ୍ଷ ଟଙ୍କା ଖର୍ଚ୍ଚ ହେଉଛି। ପ୍ରତିବର୍ଷ ଏକ କୋଟିରୁ ଅଧିକ ବିବାହ ହେଉଥିବା ବେଳେ, ଅଚାନକ ସମସ୍ୟା ଯୋଗୁଁ ବଡ଼ ଆର୍ଥିକ କ୍ଷତିର ଆଶଙ୍କା ରହୁଛି।
ବର୍ତମାନ ସମୟରେ ଅନ୍ତିମ ମୁହୂର୍ତ୍ତରେ ଅନେକ ସମସ୍ୟା ସୃଷ୍ଟି ହେଉଛି। ଯେପରିକି କ୍ୟାଟରର୍, ଫଟୋଗ୍ରାଫର କିମ୍ବା ଡେକୋରେଟରଙ୍କର ହଠାତ୍ ଅନୁପସ୍ଥିତ ରହିବା। ବିବାହ ସ୍ଥାନ ଦୁଇଥର ବୁକିଂ ହେବା କିମ୍ବା କୌଣସି କ୍ଷତି ହେବା। ଅସମୟରେ ବର୍ଷା କିମ୍ବା ଝଡ଼ ଯୋଗୁଁ ଆଉଟଡୋର୍ କାର୍ଯ୍ୟକ୍ରମ ବନ୍ଦ ହେବା ଅଳଙ୍କାର କିମ୍ବା ଉପହାର ଚୋରି ହେବା କିମ୍ବା ପରିବାରର କୌଣସି ମୁଖ୍ୟ ସଦସ୍ୟ ହଠାତ୍ ଅସୁସ୍ଥ ହେବା।
ବଜାର ବିଶେଷଜ୍ଞମାନେ କୁହନ୍ତି ଯେ, “ଲୋକମାନେ କାର୍, ଘର, ଏବଂ ଫୋନ୍ର ବୀମା କରିବାରେ ଦ୍ୱିଧା କରନ୍ତି ନାହିଁ। କିନ୍ତୁ ଏସବୁଠାରୁ ଅଧିକ ଖର୍ଚ୍ଚ ହେଉଥିବା ବିବାହଗୁଡ଼ିକର ବୀମା କରାଯାଉ ନ ଥିଲା। ଏବେ ଏହି ମାନସିକତା ବଦଳୁଛି।”
ବିବାହ ବୀମା ସାଧାରଣତଃ ଏକ ବ୍ୟାପକ ‘ଇଭେଣ୍ଟ୍ ଇନସୁରାନ୍ସ ପଲିସି’ ଅଧୀନରେ ଆସିଥାଏ ଏବଂ ଏଥିରେ ପ୍ରାୟ ସବୁ ମୁଖ୍ୟ ବିଷୟବସ୍ତୁ ସାମିଲ ହୋଇଥାଏ। ବିପର୍ଯ୍ୟୟ, ଅଗ୍ନିକାଣ୍ଡ, କିମ୍ବା ପାରିବାରିକ ଜରୁରୀ ପରିସ୍ଥିତି (ଯେପରିକି ଗୁରୁତ୍ୱପୂର୍ଣ୍ଣ ସଦସ୍ୟଙ୍କ ମୃତ୍ୟୁ/ଅସୁସ୍ଥତା) ଯୋଗୁଁ କାର୍ଯ୍ୟକ୍ରମ ବାତିଲ ହେଲେ କ୍ଷତିପୂରଣ। କ୍ୟାଟରର୍ କିମ୍ବା ଫଟୋଗ୍ରାଫର କାର୍ଯ୍ୟକ୍ରମରେ ନ ଆସିଲେ। ବିବାହ ସ୍ଥଳରେ ଚୋରି, ଅଳଙ୍କାର କିମ୍ବା ଉପହାର ନିଖୋଜ ହେଲେ।
ଏଥିପାଇଁ ତୃତୀୟ ପକ୍ଷର ଦାୟିତ୍ୱ (Third-party liabilities) ଏବଂ ନଗଦ ଟଙ୍କା ପରିବହନ ବୀମା ମଧ୍ୟ କିଣାଯାଇପାରିବ। ତେବେ ଏହି ବିବାହ ବୀମା ବେଶ୍ ସୁଲଭ ମୂଲ୍ୟରେ ଉପଲବ୍ଧ। ପ୍ରିମିୟମ ସାଧାରଣତଃ ବୀମାଭୁକ୍ତ ରାଶିର ୦.୨% ରୁ ୨% ମଧ୍ୟରେ ରହିଥାଏ। ଉତ୍ସବର ବ୍ୟାପକତା, ଅତିଥିଙ୍କ ସଂଖ୍ୟା ଏବଂ ସ୍ଥାନ ଉପରେ ଏହାର ମୂଲ୍ୟ ନିର୍ଭର କରେ।
ଡେଷ୍ଟିନେସନ୍ ୱେଡିଂ ବୃଦ୍ଧି ପାଇବା ଏହି ବୀମା କ୍ଷେତ୍ରକୁ ବଡ଼ ପ୍ରୋତ୍ସାହନ ଦେଇଛି। ଏହି ବିବାହଗୁଡ଼ିକରେ ଯାତ୍ରା, ରହଣି ଏବଂ ବାହାର ଭେଣ୍ଡର ଜଡ଼ିତ ଥିବାରୁ ବିପଦର ଆଶଙ୍କା ବହୁଗୁଣିତ ହୋଇଥାଏ। ତେଣୁ ବିମାନ ବିଳମ୍ବ, ଲଜିଷ୍ଟିକ କ୍ଷତି ଏବଂ ପାଣିପାଗ ଜନିତ ଅନିଶ୍ଚିତତା ପାଇଁ ସ୍ୱତନ୍ତ୍ର ପ୍ୟାକେଜ୍ ମିଳୁଛି।
ସାରାଂଶରେ କହିଲେ, ବିବାହ ବୀମା ଦୁର୍ଘଟଣାକୁ ରୋକି ପାରିବ ନାହିଁ, କିନ୍ତୁ ଏହା ସୁନିଶ୍ଚିତ କରେ ଯେ ଏକ ଅପ୍ରତ୍ୟାଶିତ ସଙ୍କଟ ଆପଣଙ୍କ ଖୁସିର ମୁହୂର୍ତ୍ତକୁ ଆର୍ଥିକ କ୍ଷତି ଦ୍ୱାରା ଘୋଡ଼ାଇ ନ ଦେଉ।
