ରାତିର କାଳିମା ଭିତରେ ଟିମ୍ ଟିମ୍ କରୁଥିବା ତାରାର ଦୃଶ୍ୟ କାହାକୁ ବା ଭଲ ନ ଲାଗେ?
ହେଲେ କେବେ ଭାବିଛନ୍ତି ଏଇ ତାରାସବୁଟିମ୍ ଟିମ୍ ହେବାପରି କାହିଁକିଦେଖା ଯାଆନ୍ତି?
ତାରା ସବୁବେଳେ ମଣିଷକୁ ଆକର୍ଷିତ କରି ଆସିଛି। ପିଲାଠୁ ବୁଢା ପର୍ଯ୍ୟନ୍ତ ଏହା ସମସ୍ତଙ୍କ ପାଇଁ କୌତୁହଳର ବିଷୟ। ରାତିର କାଳିମା ଭିତରେ ଟିମ୍ ଟିମ୍ କରୁଥିବା ତାରାର ଦୃଶ୍ୟ କାହାକୁ ବା ଭଲ ନ ଲାଗେ? ହେଲେ କେବେ ଭାବିଛନ୍ତି ଏଇ ତାରାସବୁ ଟିମ୍ ଟିମ୍ ହେବାପରି କାହିଁକି ଦେଖା ଯାଆନ୍ତି?
ତାରା ଟିମ୍ ଟିମ୍ ହେବା ପଛର କାରଣ ହେଉଛି ଆମର ବାୟୁମଣ୍ଡଳ, ଯାହାକି ନାଇଟ୍ରୋଜେନ, ଅକ୍ସିଜେନ୍ ପରି ଅନେକ ଗ୍ୟାସ୍ ମିଶ୍ରଣରେ ତିଆରି। ଏହି ବାୟୁମଣ୍ଡଳ ଆମକୁ ସୁରକ୍ଷା ଦେଉଥିବା କମ୍ବଳ ପରି କାମ କରେ, ପୃଥିବୀର ତାପମାତ୍ରାକୁ ନିୟନ୍ତ୍ରଣରେ ବି ରଖେ। ଯେମିତିକି ଅଧିକ ଗରମ କି ଅଧିକ ଶୀତ ଅନୁଭୂତ ନ ହୁଏ। ତା’ସହ ଅନ୍ତରୀକ୍ଷରୁ ଆସୁଥିବା ହାନିକାରକ ବିକିରଣରୁ ଆମକୁ ରକ୍ଷା କରେ, ଅନ୍ତରୀକ୍ଷରୁ ଆସୁଥିବା ଆବର୍ଜନାକୁ ବି ଜଳାଇ ପାଉଁସ କରିଦିଏ। ତେବେ ଏହି ବାୟୁମଣ୍ଡଳ ଆମକୁ ଅନ୍ତରୀକ୍ଷର ଜିନିଷକୁ ସ୍ପଷ୍ଟ ଦେଖିବାରେ ବାଧା ଉପୁଜାଇବାର ବି କାମ କରିଥାଏ। ଏହା ଅନ୍ତରୀକ୍ଷରୁ ଆସୁଥିବା ପ୍ରକାଶକୁ ବିକୃତ କରିଥାଏ ଫଳରେ ଅନ୍ତରୀକ୍ଷର ଅନେକ ଜିନିଷ ଆମେ ସ୍ପଷ୍ଟ ଦେଖିପାରି ନ ଥାଉ। ସେଥିପାଇଁ ଆମକୁ ଟେଲିସ୍କୋପ ଆବଶ୍ୟକ ହୁଏ। ରାତିରେ ଏହି ବାୟୁମଣ୍ଡଳ ଲାଗି ହିଁ ଅନେକ ଖଗୋଳିୟ ପିଣ୍ଡ କେବେ ଦେଖାଯାଏ ତ କେବେ ସ୍ପଷ୍ଟ ଦେଖାଯାଏନି। ବାୟୁମଣ୍ଡଳରେ ଗ୍ୟାସ୍ର ବିଭିନ୍ନ ପରସ୍ତ ଥାଏ। ଏହି ପରସ୍ତର ତାପମାତ୍ରା ଓ ବାୟୁର ଘନତ୍ୱ ଭିନ୍ନ ଭିନ୍ନ ହୋଇଥାଏ। ଯେବେ ତାରାଙ୍କ କିରଣ ବାୟୁମଣ୍ଡଳରେ ପ୍ରବେଶ କରେ ଏହି ଗରମ ଓ ଥଣ୍ଡା ବାୟୁର ପରସ୍ତ ଦେଇ ଯିବାକୁ ହୁଏ। ଆଉ ଏହି ପରସ୍ତ ସବୁ ଏକ ବଡ଼ ମୋଟା ଲେନ୍ସର କାମ କରିଥାଏ। ଯାହାଦ୍ୱାରା ପ୍ରକାଶର ପରାବର୍ତନର ପ୍ରକ୍ରିୟା ହୋଇଥାଏ ଓ ଆଲୋକର ଦିଗ ବିକୃତ ହୋଇଯାଏ। ତେବେ ଏହି ପରସ୍ତସବୁ ସ୍ଥିର ଲେନ୍ସ ନୁହେଁ ବରଂ ଗତିମାନ ଲେନ୍ସ ପରି କାମ କରିଥାଏ। ଯାହାଦ୍ୱାରା ତାରାମାନଙ୍କର କିରଣ ଟିମ୍ ଟିମ୍ ହେଲାପରି ଦେଖାଯାଏ। ଏହାବାଦ ତାରାଙ୍କ କିରଣ ବହୁ ଦୂରରୁ ଆସିଥାଏ ଫଳରେ ସେଠାରୁ ଆଲୋକ ଏକ ବିନ୍ଦୁରୁ ଆସିବା ପରି ଦେଖାଯାଏ। ଯାହାଦ୍ୱାରା ତାରାର ଟିମ୍ ଟିମ୍ ଅଧିକ ପ୍ରଭାବି ଦେଖାଯାଇଥାଏ।
