ଦୁବାଇ,୯।୧୧: ଭାରତୀୟ ଦଳର ମୁଖ୍ୟ କୋଚ୍ ଭାବେ ରବି ଶାସ୍ତ୍ରୀଙ୍କ କାର୍ଯ୍ୟକାଳ ଶେଷ ହୋଇଛି। ଟି୨୦ ବିଶ୍ୱକପ୍ ୨୦୨୧ ଶାସ୍ତ୍ରୀଙ୍କ ଶେଷ ଟୁର୍ନମେଣ୍ଟ ଥିଲା। ଏଥିରେ ଭାରତ ସେମିଫାଇନାଲ ଦୌଡ଼ରୁ ବାଦ ପଡ଼ିଛି। ତେବେ ମ୍ୟାଚ୍ ପରେ ଶାସ୍ତ୍ରୀ ନିଜର ବିଦାୟୀ ଖବରଦାତା ସମ୍ମିଳନୀରେ ଜଣେ ଖାସ୍ ବ୍ୟକ୍ତିଙ୍କ ପ୍ରତି ନିଜର ସମ୍ମାନ ଜଣାଇଛନ୍ତି। ସେ ହେଉଛନ୍ତି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ପୂର୍ବ ଅଧ୍ୟକ୍ଷ ଶ୍ରୀନିବାସନ। ୨୦୧୪ରେ ଇଂଲଣ୍ଡରେ ଭାରତ ଟେଷ୍ଟ ସିରିଜ ହାରିବା ପରେ ଶ୍ରୀନିବାସନ ଶାସ୍ତ୍ରୀଙ୍କୁ ଦଳର ନିର୍ଦ୍ଦେଶକ ଭାବେ ନିଯୁକ୍ତ କରିଥିଲେ।
ଖବରଦାତା ସମ୍ମିଳନୀରେ ଶାସ୍ତ୍ରୀ କହିଛନ୍ତି, ମୋତେ ଲାଗୁଛି ବ୍ୟକ୍ତିଗତ ଭାବେ ଏହା ମୋ’ ପାଇଁ ଭଲ ଯାତ୍ରା ଥିଲା। ମୁଁ ଜାଣେ ଭାରତୀୟ ଡ୍ରେସିଂ ରୁମ୍ରେ ଏହା ମୋର ଶେଷ ଦିନ। ମୁଁ ଏବେ ସବୁ ଖେଳାଳିଙ୍କ ସହ କଥା ହୋଇଛି। ମୋତେ ଏହି ସୁଯୋଗ ଦେବା ଲାଗି ବିସିସିଆଇକୁ ଧନ୍ୟବାଦ ଦେବାକୁ ଚାହୁଁଛି। କୋଚ୍ ଭାବେ କାମ କରିପାରିବି ବୋଲି ସେ ମୋ ଉପରେ ବିଶ୍ୱାସ ରଖିଥିଲା। ନୂଆ କୋଚ୍ ରାହୁଲ ଦ୍ରାବିଡଙ୍କୁ ଶୁଭକାମନା ଦେଉଛି। ବିଶେଷକରି ଶ୍ରିନିବାସନଙ୍କୁ ଅଧିକ ଧନ୍ୟବାଦ ଜଣାଇବାକୁ ଚାହୁଁଛି। ସେ ଭାରତୀୟ କ୍ରିକେଟ ଇତିହାସରେ ଶକ୍ତିଶାଳୀ ବିସିସିଆଇ ଅଧ୍ୟକ୍ଷଙ୍କ ମଧ୍ୟରୁ ଜଣେ ଥିଲେ। ସେ ଏଭଳି ଜଣେ ବ୍ୟକ୍ତି ଥିଲେ ଯିଏ ମୋତେ ୨୦୧୪ରେ ଜୋର ଦେଇ ଏହି ଦାୟିତ୍ୱ ସମ୍ଭାଳିବାକୁ କହିଥିଲେ। ଏହି କାମ କରିପାରିବି ବୋଲି ମୋର ବିଶ୍ୱାସ ନ ଥିଲା। ହେଲେ ସେ ମୋର କ୍ଷମତା ଉପରେ ବିଶ୍ୱାସ କରିଥିଲେ। ଭାବୁଛି ତାଙ୍କୁ ନିରାଶ କରି ନ ଥିବି। ଯଦି ଆପଣ ଏହା ଶୁଣୁଥିବେ ତେବେ କହିବାକୁ ଚାହିଁବି କୌଣସି ଏଜେଣ୍ଡା ବିନା ମୁଁ ନିଜ କାମ କରିଛି ବୋଲି ଶାସ୍ତ୍ରୀ କହିଛନ୍ତି।
