ନୂଆଦିଲ୍ଲୀ,୧୬।୨: ଅପରେସନ୍ ସିନ୍ଦୂରର ଶକ୍ତ ପ୍ରହାର ସହିବାର ୮ ମାସ ପରେ ପାକିସ୍ତାନ ପୁଣି ଥରେ ଭାରତୀୟ ସୀମାରେ ଉତ୍ତେଜନା ସୃଷ୍ଟି କରିବାକୁ ପ୍ରୟାସ କରୁଛି। ଜାନୁଆରୀ ୯ ତାରିଖରୁ ଜମ୍ମୁ-କାଶ୍ମୀର ସୀମାନ୍ତରେ ଏକାଧିକ ପାକିସ୍ତାନୀ ଡ୍ରୋନ୍ ଦେଖାଯିବା ପରେ ଭାରତୀୟ ସେନା ହାଇଆଲର୍ଟରେ ରହିଛି। ଗୁରୁବାର ରାତିରେ ମଧ୍ୟ ପୁଞ୍ଚ୍ ଏବଂ ସାମ୍ବା ସେକ୍ଟରରେ ଡ୍ରୋନ୍ ଗତିବିଧି ନଜରକୁ ଆସିଛି।
ସେନା ଦିବସ ଅବସରରେ ସେନାମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ କହିଛନ୍ତି ଯେ, ଏହି ଡ୍ରୋନ୍ଗୁଡ଼ିକ ଆକାରରେ ବହୁତ ଛୋଟ ଏବଂ ସ୍ୱଳ୍ପ ଉଚ୍ଚତାରେ ଉଡୁଛି। ଏହାର ମୁଖ୍ୟ କାରଣଗୁଡ଼ିକ ହେଲା, ଭାରତୀୟ ସେନାର ପ୍ରସ୍ତୁତି ଏବଂ ପ୍ରତିକ୍ରିୟା ସମୟ ପରଖିବା ପାଇଁ ପାକିସ୍ତାନ ଏହି ଡ୍ରୋନ୍ ପଠାଉଛି। ଭାରତୀୟ ସୀମାରେ କୌଣସି ସ୍ଥାନରେ ଫାଙ୍କ ରହିଛି କି ନାହିଁ, ଯାହା ମଧ୍ୟ ଦେଇ ଆତଙ୍କବାଦୀଙ୍କୁ ପଠାଯାଇପାରିବ, ତାହା ଯାଞ୍ଚ କରିବା ପାକିସ୍ତାନର ମୁଖ୍ୟ ଲକ୍ଷ୍ୟ।
ପୂର୍ବରୁ ଜାନୁଆରୀ ୯ରେ ସାମ୍ବା ସେକ୍ଟରରୁ ଡ୍ରୋନ୍ ଦ୍ୱାରା ପକାଯାଇଥିବା ପିସ୍ତଲ, ଗୁଳି ଓ ଗ୍ରେନେଡ୍ ଜବତ ହୋଇଛି। ସ୍ଥାନୀୟ ଅଞ୍ଚଳରେ ଆତଙ୍କବାଦକୁ ପୁଣି ଜୀବିତ କରିବା ପାଇଁ ପାକିସ୍ତାନ ଏହି ମାଧ୍ୟମ ଆପଣାଉଛି।
ସେନାମୁଖ୍ୟଙ୍କ ଅନୁଯାୟୀ, ଜାନୁଆରୀ ୨୬ (ସାଧାରଣତନ୍ତ୍ର ଦିବସ) ପୂର୍ବରୁ ଭାରତ କିଛି ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିପାରେ ବୋଲି ପାକିସ୍ତାନ ଭୟ କରୁଛି। ତେଣୁ ସେମାନେ ରେକନାସାନ୍ସ ବା ଗୋଇନ୍ଦା ତଥ୍ୟ ସଂଗ୍ରହ ପାଇଁ ଏହି ଛୋଟ ଡ୍ରୋନ୍ ବ୍ୟବହାର କରୁଛନ୍ତି।
ଭାରତୀୟ ସେନା ଆଣ୍ଟି-ଡ୍ରୋନ୍ ସିଷ୍ଟମ ସକ୍ରିୟ କରିବା ସହ ଅନେକ ସ୍ଥାନରେ ଗୁଳି ଚାଳନା କରି ଡ୍ରୋନ୍କୁ ଘଉଡ଼ାଇ ଦେଇଛି। ପାକିସ୍ତାନକୁ ସ୍ପଷ୍ଟ ଚେତାବନୀ ଦିଆଯାଇଛି ଯେ, କୌଣସି ପ୍ରକାର ଦୁଃସାହସ କଲେ ତାହାର ପରିଣାମ ଭୟଙ୍କର ହେବ।
