ନୂଆଦିଲ୍ଲୀ, ୨୬।୪ : ଭାଜପା ଶାସିତ ହିମାଚଳ ପ୍ରଦେଶ ଏବଂ ଉତ୍ତରାଖଣ୍ଡ ସରକାରଙ୍କୁ ଧର୍ମସଂସଦରେ ଦିଆଯାଇଥିବା ହେଟ୍ସ୍ପିଚ୍ ନେଇ ସୁପ୍ରିମକୋର୍ଟ (ଏସ୍ସି) ମଙ୍ଗଳବାର ତାଗିଦ୍ କରିଛନ୍ତି। ହେଟ୍ସ୍ପିଚ୍ ନେଇ କାହିଁକି ଆଇନଗତ ପଦକ୍ଷେପ ନିଆଗଲା ନାହିଁ ବୋଲି ଶୀର୍ଷକୋର୍ଟ ପ୍ରଶ୍ନ କରିଛନ୍ତି। ଏହା ସହିତ ବୁଧବାର ରୁୁର୍କିରେ ହେବାକୁ ଥିବା ଧର୍ମ ସଂସଦରେ ଯେପରି କୌଣସି ଆପତ୍ତିଜନକ ମନ୍ତବ୍ୟ ଦିଆ ନଯାଏ ସେଥିପ୍ରତିତ ସତର୍କ ରହିବାକୁ ଉତ୍ତରାଖଣ୍ଡର ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ ଶୀର୍ଷ ଅଦାଲତ ହିମାଚଳ ପ୍ରଦେଶ ସରକାରଙ୍କୁ ମଧ୍ୟ ଏନେଇ ପ୍ରଶ୍ନ ପଚାରିଛନ୍ତି।
ପୃଥକ ଶୁଣାଣିରେ ସୁପ୍ରିମକୋର୍ଟ ଚଳିତ ମାସ ଆରମ୍ଭରେ ହୋଇଥିବା ଏକ କାର୍ଯ୍ୟକ୍ରମ ଉପରେ ହିମାଚଳ ପ୍ରଦେଶ ସରକାରଙ୍କ ଠାରୁ ଉତ୍ତର ଲୋଡିଛନ୍ତି। ଧର୍ମ ସଂସଦରେ ମୁସଲମାନମାନଙ୍କ ପ୍ରତି ଘୃଣା ଭାଷଣ ଦିଆଯାଇଥିଲା ଏବଂ ହିନ୍ଦୁମାନଙ୍କୁ ହିଂସା କରିବାକୁ କୁହାଯାଇଥିଲା। ହିମାଚଳ ପ୍ରଦେଶରେ ଭାଜପା ସରକାରଙ୍କୁ ଏଭଳି ମନ୍ତବ୍ୟ ପ୍ରଦାନ କରିଥିବା ଲୋକଙ୍କ ବିରୋଧରେ କାହିଁକି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ ବୋଲି ସର୍ବୋଚ୍ଚ ନ୍ୟାୟାଳୟ ପ୍ରଶ୍ନ କରିଛନ୍ତି। ସରକାରଙ୍କୁ ଏଭଳି କାର୍ଯ୍ୟକଳାପକୁ ବନ୍ଦ କରିବାକୁ ପଡିବ। କୌଣସି ପ୍ରତିଷେଧକ ବ୍ୟବସ୍ଥା ନିଆଯାଇଛି କି ନାହିଁ ତାହା ରାଜ୍ୟ ସରକାର ଆମକୁ ଜଣାଇବାକୁ ପଡିବ ବୋଲି କୋର୍ଟ କହିଛନ୍ତି।
ମେ ୯ ରେ ପୁନର୍ବାର ଏହି ମାମଲାର ଶୁଣାଣି ପାଇଁ ତାଲିକାଭୁକ୍ତ କରି ଏଥିରେ କୁହାଯାଇଛି ଯେ ସରକାରଙ୍କୁ ଆସନ୍ତା ୭ ତାରିଖ ସୁଦ୍ଧା ଏକ ସତ୍ୟପାଠ ଦାଖଲ କରିବାକୁ ପଡିବ।
ଏଭଳି ଘଟଣାକୁ ରୋକିବା ପାଇଁ କଣ ପଦକ୍ଷେପ ନିଆଯାଇଛି ତାହା ଆମକୁ ଜଣାଇବାକୁ ପଡିବ ବୋଲି କୋର୍ଟ କହିଛନ୍ତି। ଜଷ୍ଟିସ ଏମ ଖାନୱିଲକର, ଜଷ୍ଟିସ ଅଭୟ ଏସ ଓକା ଏବଂ ଜଷ୍ଟିସ ସିଟି ରବିକୁମାରଙ୍କ ନେତୃତ୍ୱରେ ଗଠିତ ଏକ ତିନିଜଣିଆ ଖଣ୍ଡପୀଠ ଉତ୍ତରାଖଣ୍ଡ ସରକାର ଦେଇଥିବା ଆଶ୍ୱାସନାକୁ ଦୃଷ୍ଟିରେ ରଖି କହିଛନ୍ତି ଯେ ଏହି ଘଟଣାରେ ଅଧିକାରୀମାନେ ନିଶ୍ଚିତ ଯେ ଏହି ଘଟଣାରେ କୌଣସି ଆପତ୍ତି ଜନକ ବିବୃତ୍ତି ଦିଆଯିବ ନାହିଁ ଏବଂ କୋର୍ଟର ନିଷ୍ପତ୍ତି ଅନୁଯାୟୀ ସମସ୍ତ ପଦକ୍ଷେପ ନିଆଯିବ।
ଖଣ୍ଡପୀଠ କହିଛନ୍ତି ଯେ ଆମେ ଉତ୍ତରାଖଣ୍ଡର ମୁଖ୍ୟ ସଚିବଙ୍କୁ ଉପରୋକ୍ତ ପ୍ରତିଶ୍ରୁତିଗୁଡିକୁ ସାର୍ବଜନୀନ ଭାବରେ ଜଣାଇବାକୁ ଏବଂ ତାଙ୍କୁ ଆବଶ୍ୟକ ପଦକ୍ଷେପ ଗ୍ରହଣ ବିଷୟରେ ଅବଗତ କରାଇବାକୁ ନିର୍ଦ୍ଦେଶ ଦେଉଛୁ। ସୂଚନାଯୋଗ୍ୟ, ଗତ ବର୍ଷ ଡିସେମ୍ବରରେ ହରିଦ୍ୱାରରେ ଅନୁଷ୍ଠିତ ହୋଇଥିବା ତିନି ଦିନିଆ ଧର୍ମ ସଂସଦ ନେଇ ଏଫଆଇଆର୍ ରୁଜୁ କରାଯାଇଥିଲା। ସଂସଦରେ ଏକ ସମ୍ପ୍ରଦାୟଙ୍କୁ ଟାର୍ଗେଟ କରି ଘୃଣା ବକ୍ତବ୍ୟ ଦିଆଯାଇଥିଲା।
