ଓ୍ବାଶିଂଟନ,୨୮।୫: ଟେସଲା କମ୍ପାନୀର ମାଲିକ ଏଲନ ମସ୍କ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିଶ୍ୱସ୍ତ ପରାମର୍ଶଦାତାମାନଙ୍କ ମଧ୍ୟରୁ ଜଣେ। ତଥାପି, ଏବେ ଉଭୟଙ୍କ ପଥ ଅଲଗା ହୋଇଯାଇଛି। ବୁଧବାର ମସ୍କ ଟ୍ରମ୍ପ ସରକାରଙ୍କ ସରକାରୀ ଦକ୍ଷତା ବିଭାଗ (DOGE)ଠାରୁ ନିଜକୁ ଦୂରେଇ ଦେଇଛନ୍ତି। ସେ ତାଙ୍କ ପଦରୁ ଇସ୍ତଫା ଦେଇଛନ୍ତି। ଏ ବିଷୟରେ ଅନେକ କଥା କୁହାଯାଉଛି, ଯାହା ଟ୍ରମ୍ପ ଏବଂ ମସ୍କଙ୍କ ମଧ୍ୟରେ ଫାଟକୁ ଇଙ୍ଗିତ କରିପାରେ। ଏହାର ମୁଖ୍ୟ କାରଣ ଏକ ବିଲ ବୋଲି ବିଶ୍ୱାସ କରାଯାଉଛି, ଯାହା DOGEର କାର୍ଯ୍ୟ କ୍ଷମତାକୁ ନଷ୍ଟ କରିପାରେ। ମସ୍କ ମଧ୍ୟ ଏହାର କଡ଼ା ସମାଲୋଚନା କରିଛନ୍ତି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅର୍ଥନୈତିକ ବିଲ ‘ୱାନ ବିଗ ବିୟୁଟିଫୁଲ ବିଲ ଆକ୍ଟ’ ପ୍ରଚଳନ ଘୋଷଣା କରିଛନ୍ତି। ଏହା ଅଧୀନରେ ବହୁ ଟ୍ରିଲିୟନ ଡଲାରର ଟିକସ ଛାଡ଼, ପ୍ରତିରକ୍ଷା ଖର୍ଚ୍ଚରେ ବିପୁଳ ବୃଦ୍ଧି ଏବଂ ପ୍ରବାସ ନିୟନ୍ତ୍ରଣ ପଦକ୍ଷେପ ସହିତ ଜଡିତ ଖର୍ଚ୍ଚ ଅନ୍ତର୍ଭୁକ୍ତ କରାଯାଇଥିଲା। ଏହା ସରକାରୀ ଖର୍ଚ୍ଚ ବୃଦ୍ଧି କରିବା ପାଇଁ ଏକ ବିଲ। ଏହି ବିଲ ସମ୍ପର୍କରେ, ଏଲନ ମସ୍କ କହିଥିଲେ ଯେ, ଏହି ବିଲ ସରକାରୀ ନିଅଣ୍ଟକୁ ହ୍ରାସ କରିବ ନାହିଁ, ବରଂ ଏହାକୁ ଆହୁରି ବୃଦ୍ଧି କରିବ। ଏହା DOGE ଦଳର କାର୍ଯ୍ୟକୁ ଦୁର୍ବଳ କରିବ। ମୁଁ ଭାବୁଛି ଏହି ବିଲ ବଡ଼ କିମ୍ବା ସୁନ୍ଦର ହୋଇପାରେ, କିନ୍ତୁ ଉଭୟ ନୁହେଁ। ମୁଁ ଏହାର କିଛି ଅଂଶରେ ଖୁସି ନୁହେଁ, କିନ୍ତୁ ଦେଖିବା ପରବର୍ତ୍ତୀ ସମୟରେ କ’ଣ ହେଉଛି।
ଅନେକ ବିଶେଷଜ୍ଞ ବିଶ୍ୱାସ କରନ୍ତି ଯେ ୱାନ ବିଗ ବିୟୁଟିଫ ବିଲ ଯୋଗୁଁ ଦେଶର ନିଅଣ୍ଟ ବୃଦ୍ଧି ପାଇପାରେ। ଏକ ଆକଳନ ଅନୁଯାୟୀ, ବିଲ ଆଗାମୀ ୧୦ବର୍ଷ ମଧ୍ୟରେ ନିଅଣ୍ଟକୁ ୪ ଡଲାର ଟ୍ରିଲିୟନ ବୃଦ୍ଧି କରିପାରେ। ତଥାପି, ହ୍ବାଇଟ ହାଉସ ବିଶ୍ୱାସ କରେ ଯେ ଏହି ବିଲ ୧.୬ ଡଲାର ଟ୍ରିଲିୟନ ସଞ୍ଚୟ କରିବ। ଏହା ଅର୍ଥନୈତିକ ଅଭିବୃଦ୍ଧିକୁ ୫.୨% ବୃଦ୍ଧି କରିବ।
DOGE (ସରକାରୀ ଦକ୍ଷତା ବିଭାଗ) ସରକାରୀ ଖର୍ଚ୍ଚକୁ ନିୟନ୍ତ୍ରଣ କରିବା ପାଇଁ ଏଲନ ମସ୍କଙ୍କ ନେତୃତ୍ୱରେ ଏକ ବିଭାଗ ଥିଲା। ଏହାର ଉଦ୍ଦେଶ୍ୟ ଥିଲା ଅପ୍ରଭାବଶାଳୀ ଯୋଜନାଗୁଡ଼ିକୁ ହ୍ରାସ କରିବା, ବିଦେଶୀ ସହାୟତା ହ୍ରାସ କରିବା, ସାର୍ବଜନୀନ ପ୍ରସାରଣ ପାଣ୍ଠିକୁ ସନ୍ତୁଳିତ କରିବା। ତଥାପି, ମସ୍କ ବିଶ୍ୱାସ କରନ୍ତି ଯେ ଟ୍ରମ୍ପଙ୍କ ଏହି ବିଲ DOGE ର ନିର୍ଦ୍ଦେଶର ବିପରୀତ।
