ମସ୍କୋ,୧୧।୮: ରୁଷିଆ ଆଣିଲା ବିଶ୍ୱର ପ୍ରଥମ କରୋନା ଟିକା। ଏନେଇ ମଙ୍ଗଳବାର ରୁଷିଆ ପ୍ରଧାନମନ୍ତ୍ରୀ ଭ୍ଲାଡିମିର ପୁଟିନ୍ ଘୋଷଣା କରିଛନ୍ତି। ହେଲେ ଏହାର ଟିକାକୁ ସନ୍ଦେହଜନକ ଦୃଷ୍ଟିରେ ଦେଖାଯାଉଛି। କାରଣ କରୋନା ଟିକା ପ୍ରସ୍ତୁତ ନେଇ ଶହେରୁ ଅଧିକ ଦେଶ ପ୍ରୟାସ ଚଳାଇଛନ୍ତି। ଏଣୁ ରୁଷିଆ ପ୍ରସ୍ତୁତ କରିଥିବା ଟିକାକୁ ନେଇ ଅନେକ ପ୍ରଶ୍ନ ଉଙ୍କି ମାରୁଛି। ଜାଣନ୍ତୁ ଏହା ପଛରେ ଥିବା କିଛି କାରଣ..
ପ୍ରଥମଟି ହେଲା ଟିକା ପ୍ରସ୍ତୁତ ହୋଇଥିବା ନେଇ ଘୋଷଣା ହୋଇଥିଲେ ହେଁ ସମସ୍ତ ତଥ୍ୟ ସାର୍ବଜନିକ କରାଯାଇନାହିଁ। ହେଲେ ବ୍ରିଟେନ୍ ଏବଂ ଆମେରିକା କରୁଥିବା ଗବେଷଣା ସଶ୍ଳିଷ୍ଟ ସମସ୍ତ ତଥ୍ୟ ସର୍ବସାଧାରଣ ଡୋମେନ୍ରେ ଉପଲବ୍ଧ ରହିଛି। ସେଭଳି କିଛି ପ୍ରଶ୍ନ ହେଲା,, କେବେ ଏହାର ପରୀକ୍ଷା ଆରମ୍ଭ ହେଲା, କେତେ ଦିନ ପର୍ଯ୍ୟନ୍ତ ଚାଲିଲା? କେତେ ଲୋକ ଏଥିରେ ଅନ୍ତର୍ଭୁକ୍ତ ଥିଲେ? ଟିକାକରଣର ପାର୍ଶ୍ୱ ପ୍ରତିକ୍ରିୟା କ’ଣ? ଟିକା ପ୍ରୟୋଗ କରିବା ପରେ କେତେ ଲୋକ କରୋନାରେ ସଂକ୍ରମିତ ହୋଇଥିଲେ ଏବଂ ରୋଗରେ ପୀଡ଼ିତ ହେବାରୁ ରକ୍ଷା ପାଇଥିଲେ ଆଦି।
କୌଣସି ଟିକାର ତୃତୀୟ ପର୍ଯ୍ୟାୟ ପରୀକ୍ଷା(ଅନ୍ତିମ ପରୀକ୍ଷଣ) ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହି ସମୟରେ ହଜାର ହଜାର ଲୋକଙ୍କ ଉପରେ ଟିକାକୁ ପ୍ରୟୋଗ କରାଯାଇ ପ୍ରଭାବ ଅନୁସନ୍ଧାନ କରାଯାଏ। ହେଲେ ରୁଷିଆର କରୋନା ଟିକାର କ୍ଲିନିକାଲ ପରୀକ୍ଷା ଏପର୍ଯ୍ୟନ୍ତ ସଫଳ ହୋଇନାହିଁ।
ରୁଷିଆ ଟିକାକରଣର ପ୍ରାରମ୍ଭିକ ପରୀକ୍ଷା ମାଙ୍କଡ଼ ଏବଂ ପରେ ମଣିଷଙ୍କ ଉପରେ କରାଯାଇଥିଲା। ଏହି ପରୀକ୍ଷଣରେ ରୁଷିଆକୁ ସଫଳତା ମିଳିଥିବା କୁହାଯାଇଛି। ହେଲେ ଟିକା ପ୍ରସ୍ତୁତ କରିଥିବା ଗାମାଲେୟା ଇନ୍ଷ୍ଟିଚ୍ୟୁଟ୍ ଏହି ଟିକାର ନିରାପତ୍ତା ଏବଂ ବିପଦ ସମ୍ପର୍କିତ ନିୟନ୍ତ୍ରିତ ପରୀକ୍ଷଣ କରିନାହିଁ।
ରାଜନୀତି ଅଥବା ପ୍ରଚାର ଉଦ୍ଦେଶ୍ୟରେ ରୁଷିଆ ଶୀଘ୍ର ଟିକା ପ୍ରସ୍ତୁତ ହୋଇଥିବା ନେଇ ଘୋଷଣା କରିଛି ବୋଲି ବିଶ୍ୱସ୍ତରର ସଂଗଠନମାନ ଚିନ୍ତା ପ୍ରକାଶ କରିଛନ୍ତି। ବିଶ୍ୱ ସ୍ବାସ୍ଥ୍ୟ ସଂଗଠନ ଏବଂ ରୁଷ୍ କର୍ତ୍ତୃପକ୍ଷଙ୍କ ସହ ବିଚାରବିମର୍ଶ ଚାଲିଥିବା ଜଣାପଡ଼ିଛି।
ଡବ୍ଲୁଏଚ୍ଓ ପକ୍ଷରୁ ଜାରି କରାଯାଇଥିବା ଟିକା ପ୍ରସ୍ତୁତି ତାଲିକାରେ ରୁଷିଆ ଟିକାର ନାମ ନାହିଁ। ଏଣୁ ଟିକାକୁ ନେଇ ସନ୍ଦେହ ପ୍ରକାଶ କରାଯାଉଛି।
ଅପରପକ୍ଷେ ପ୍ରଧାନମନ୍ତ୍ରୀ ପୁଟିନ୍ଙ୍କ ଝିଅଙ୍କ ଦେହରେ ପ୍ରଥମ ଟିକାରକଣ କରାଯାଇଛି। ସେ ଏବେ ସୁସ୍ଥ ଥିବା କୁହାଯାଉଛି।
