କାଠମାଣ୍ଡୁ,୩୦।୬: ଭାରତ ଓ ନେପାଳ ମଧ୍ୟରେ ଗତ କିଛି ଦିନରୁ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି। କିନ୍ତୁ ଏହି ଦୁଇ ଦେଶ ମଧ୍ୟରେ ଥିବା ସମ୍ପର୍କ କାହିଁ କେତେ କାଳରୁ ରହିଆସିଛି। ନେପାଳର ନାଗରିକମାନେ ଭାରତରେ ଥିବା ମନ୍ଦିରକୁ ଦର୍ଶନ ପାଇଁ ଆସିଥାନ୍ତି। ସେହିପରି ଭାରତର ନାଗରିକମାନେ ମଧ୍ୟ ନେପାଳରେ ଥିବା ମନ୍ଦିରକୁ ଦର୍ଶନ ପାଇଁ ଯାଇଥାନ୍ତି। ତେବେ ନେପାଳରେ ଥିବା ପ୍ରସିଦ୍ଧ ମନ୍ଦିରମାନଙ୍କ ଭିତରେ ଏଭଳି ଏକ ମନ୍ଦିର ରହିଛି, ଯେଉଁଠାରେ ସାଧାରଣ ଲୋକ ଯାଇପାରିବେ କିନ୍ତୁ ନେପାଳର ରାଜପରିବାର ସେଠାକୁ ଯାଇପାରିବେ ନାହିଁ। ଏହା ଶୁଣିଲେ ଆଶ୍ଚର୍ଯ୍ୟ ଲାଗୁଥିବ, ହେଲେ କଥାଟି ସତ। କାଠମାଣ୍ଡୁରୁ ୮କିଲୋମିଟର ଦୂର ଶିବପୁରୀ ପାହାଡର ପାଦଦେଶରେ ରହିଛି ଭଗବାନ ବିଷ୍ଣୁଙ୍କ ମନ୍ଦିର। ଏହି ମନ୍ଦିରର ନାମ ହେଉଛି ବୁଦ୍ଧାନିକଣ୍ଠା।
ବୁଦ୍ଧାନିକଣ୍ଠାରେ ଭଗବାନଙ୍କ ବିଷ୍ଣୁଙ୍କ ଶୟନ ଅବସ୍ଥାରେ ପ୍ରତିମୂର୍ତ୍ତି ରହିଛି। ଏକ ପୋଖରୀରେ ପାଣି ଭିତରେ ବିଷ୍ଣୁ ଶୟନ ଅବସ୍ଥାରେ ଥିବା ବେଳେ ତାଙ୍କ ମୁଣ୍ଡରେ ୧୧ଟି ନାଗ ସାପ ବିରାଜମାନ କରିଛନ୍ତି। ଏହି ମୂର୍ତ୍ତିର ଲମ୍ବ ହେଉଛି ପ୍ରାୟ ୫ମିଟର। ଜଣେ କୃଷକ କାମ କରୁଥିବା ବେଳେ ଏହି ମୂର୍ତ୍ତିକୁ ପାଇଥିଲେ ବୋଲି କୁହାଯାଏ। ତେବେ ଏହି ମନ୍ଦିରକୁ ନେଇ କେତେକ ପୁରୁଣା କାହାଣୀ ରହିଛି। ସେଥିମଧ୍ୟରୁ ଗୋଟିଏ ରାଜପରିବାର ସହ ଜଡିତ ରହିଛି। କୁହାଯାଏ ଉକ୍ତ ମନ୍ଦିର ରାଜ ପରିବାରର ଲୋକଙ୍କ ପାଇଁ ଅଭିଶପ୍ତ। ଅଭିଶାପ ଭୟରେ ରାଜପରିବାରର ଲୋକେ ଏଠାକୁ ଆସନ୍ତି ନାହିଁ। କୁହାଯାଏ, ରାଜ ପରିବାରଙ୍କୁ ଏକ ଅଭିଶାପ ମିଳିଥିଲା। ଏହି ଅଭିଶାପ ଅନୁସାରେ ରାଜ ପରିବାରର କୌଣସି ସଦସ୍ୟ ମନ୍ଦିରରେ ସ୍ଥାପିତ ହୋଇଥିବା ମୂର୍ତ୍ତିର ଦର୍ଶନ କରନ୍ତି, ତେବେ ତାଙ୍କର ମୃତ୍ୟୁ ହୋଇଯିବ। ଏଥିଯୋଗୁ ରାଜପରିବାରର ଲୋକମାନେ କୌଣସି ମନ୍ଦିରରେ ସ୍ଥାପିତ ହୋଇଥିବା ମୂର୍ତ୍ତିଙ୍କ ପୂଜାର୍ଚ୍ଚନା କରନ୍ତି ନାହିଁ।
