ମସ୍କୋ,୧୪।୩: କ୍ୱିଭର ଯୁଦ୍ଧବିରତି ପ୍ରସ୍ତାବ ଉପରେ ତାଙ୍କର ପ୍ରଥମ ସାର୍ବଜନୀନ ମନ୍ତବ୍ୟରେ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ବିଶ୍ୱ ନେତାମାନଙ୍କ ପ୍ରୟାସକୁ ପ୍ରଶଂସା କରିଛନ୍ତି। ସେ ୟୁକ୍ରେନ-ରୁଷିଆ ବିବାଦର ଅନ୍ତ ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବ୍ରାଜିଲ ରାଷ୍ଟ୍ରପତି ଲୁଇଜ ଇନାସିଓ ଲୁଲା ଡା ସିଲଭା ଏବଂ ଅନ୍ୟାନ୍ୟ ନେତାମାନଙ୍କୁ ଧନ୍ୟବାଦ ଜଣାଇଥିଲେ।
ଆମେ ଶତ୍ରୁତା ଶେଷ କରିବା ପ୍ରସ୍ତାବ ସହିତ ସହମତ, କିନ୍ତୁ ଏହି ଶେଷ ଦୀର୍ଘକାଳୀନ ଶାନ୍ତି ଆଣିବା ଏବଂ ସଙ୍କଟର ମୂଳ କାରଣଗୁଡ଼ିକୁ ଦୂର କରିବା ଉଚିତ,’ ଗୁରୁବାର ବେଲାରୁଷ ରାଷ୍ଟ୍ରପତି ଆଲେକଜାଣ୍ଡାର ଲୁକାସେଙ୍କୋଙ୍କ ସହ ଏକ ମିଳିତ ସାମ୍ବାଦିକ ସମ୍ମିଳନୀରେ ପୁଟିନ କହିଛନ୍ତି।
ୟୁକ୍ରେନର ଅସ୍ତ୍ରବିରତି ଉପରେ ଭାଷଣ ଦେଇ ପୁଟିନ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ପ୍ରୟାସକୁ ଉଲ୍ଲେଖ କରି କହିଛନ୍ତି, ‘ୟୁକ୍ରେନ ସୌଦି ଆରବରେ ଆମେରିକାର ଚାପରେ ଅସ୍ତ୍ରବିରତି ପାଇଁ ନିଜର ଇଚ୍ଛା ପ୍ରକାଶ କରିଥାଇପାରେ।’ ସେ କହିଛନ୍ତି ଯେ ୟୁକ୍ରେନୀୟ ପକ୍ଷ ସମ୍ଭବତଃ ଆମେରିକାର ଚାପରେ ଏହି ନିଷ୍ପତ୍ତି ନେଇଛି, ଯାହା ଯୁଦ୍ଧକ୍ଷେତ୍ରରେ ପରିସ୍ଥିତି ଖରାପ ହେବା ଦ୍ୱାରା ପ୍ରେରିତ ହୋଇପାରେ। ପୁଟିନ ସ୍ପଷ୍ଟ କରିଛନ୍ତି ଯେ ରୁଷିଆ ଶାନ୍ତି ଆଲୋଚନାକୁ ସମର୍ଥନ କରେ, କିନ୍ତୁ ଏହି ସର୍ତ୍ତରେ ଯେ ଏହା ଏକ ଦୀର୍ଘକାଳୀନ ସମାଧାନ ପ୍ରଦାନ କରିବ ଏବଂ ସଂଘର୍ଷର ମୂଳ କାରଣଗୁଡ଼ିକୁ ଦୂର କରିବ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୂର୍ବରୁ ରୁଷିଆ-ୟୁକ୍ରେନ ବିବାଦର ସମାଧାନ ପାଇଁ ପ୍ରୟାସକୁ ସମର୍ଥନ କରିଥିଲେ। ସେ ସ୍ପଷ୍ଟ କରିଥିଲେ ଯେ ଭାରତ ନିରପେକ୍ଷ ନୁହେଁ, କିନ୍ତୁ ଶାନ୍ତିର ସପକ୍ଷରେ ରହିଛି। ମୋଦି କହିଛନ୍ତି, ‘ଭାରତର ସ୍ଥିତି ହେଉଛି ଆଲୋଚନା ମାଧ୍ୟମରେ ବିବାଦର ସମାଧାନ ହେବା ଉଚିତ। ଏହା ଯୁଦ୍ଧର ଯୁଗ ନୁହେଁ।’ ମୋଦି ମଧ୍ୟ ଟ୍ରମ୍ପଙ୍କ ପ୍ରୟାସକୁ ପ୍ରଶଂସା କରି କହିଛନ୍ତି ଯେ ଭାରତ ଉଭୟ ଦେଶର ନେତାଙ୍କ ସହ ଯୋଗାଯୋଗରେ ଅଛି ଏବଂ ଏହି ବିବାଦର ଶାନ୍ତିପୂର୍ଣ୍ଣ ସମାଧାନ ହେବା ଉଚିତ।
