କୋଲକାତା,୨୮।୬: କୋଲକାତାରେ ଜଣେ ଆଇନ ଛାତ୍ରୀଙ୍କୁ ଗଣବଳାତ୍କାର କରାଯାଇଛି। ଏହି ଘଟଣାରେ ଆଇନ କଲେଜର ଜଣେ ପୂର୍ବତନ ଛାତ୍ରଙ୍କ ସମେତ ୩ ଜଣଙ୍କୁ ଗିରଫ କରାଯାଇଛି। ଅଭିଯୁକ୍ତମାନଙ୍କୁ ଏକ ସ୍ଥାନୀୟ କୋର୍ଟରେ ହାଜର କରିବା ପରେ ୪ ଦିନିଆ ରିମାଣ୍ଡରେ ନେଇଥିବା ଶୁକ୍ରବାର ପୋଲିସ ସୂଚନା ଦେଇଛି। ଅଭିଯୁକ୍ତମାନଙ୍କ ମଧ୍ୟରୁ ଜଣେ ଶାସକ ତୃଣମୂଳ କଂଗ୍ରେସ (ଟିଏମ୍ସି)ର ହୋଇଥିବାରୁ ଏହି ମାମଲାକୁ ନେଇ ରାଜନୀତି ସରଗରମ ହୋଇଛି।
ଗତବର୍ଷ ଅଗଷ୍ଟରେ କୋଲକତାସ୍ଥିତ ଆର୍.ଜି. କର ମେଡିକାଲ କଲେଜରେ ଜଣେ ଇନ୍ଟର୍ନଙ୍କୁ ବଳାତ୍କାର ଓ ହତ୍ୟା କରାଯିବା ଘଟଣାର ସ୍ମୃତି ମନରୁ ନ ଲିଭୁଣୁ ସାଉଥ୍ କାଲକାଟା ଲ’ କଲେଜରେ ଗତ ବୁଧବାର ଆଉ ଏକ ଗଣବଳାତ୍କାର ଘଟଣା ଘଟିଛି। ୩୧ ବର୍ଷୀୟ ମୁଖ୍ୟ ଅଭିଯୁକ୍ତ ମୋନୋଜିତ୍ ମିଶ୍ରା ୨୪ ବର୍ଷୀୟା ଛାତ୍ରୀ ଜଣଙ୍କୁ ବିବାହ କରିବାକୁ ଚାପ ପକାଉଥିଲେ। ଛାତ୍ରୀ ପୂର୍ବରୁ ଜଣଙ୍କ ସମ୍ପର୍କରେ ଥିବା କହି ବିବାହ କରିବାକୁ ମନା କରିଦେଇଥିଲେ। ତେଣୁ ମୋନୋଜିତ୍ ତାଙ୍କୁ ବଳାତ୍କାର କରିବାକୁ ଯୋଜନା ଚଳାଇଥିଲେ। ବୁଧବାର ଅପରାହ୍ନ ୪ଟାରେ ଛାତ୍ରୀ କୌଣସି କାମରେ ଲ’ କଲେଜକୁ ଯାଇଥିଲେ। ମୋନୋଜିତ୍ ତାଙ୍କୁ ସେଠାରେ ଅଟକାଇ ରଖି ପ୍ରଥମେ ଯୌନ ସମ୍ବନ୍ଧ ରଖିବାକୁ କହିଥିଲେ। ସେ ବିରୋଧ କରିବାରୁ ସନ୍ଧ୍ୟା ୭ଟା ୩୦ରେ ମୋନୋଜିତ୍ ଓ ଅନ୍ୟ ୨ ଜଣ ଛାତ୍ର ସମ୍ପୃକ୍ତ ଛାତ୍ରୀଙ୍କୁ କଲେଜର ଗାର୍ଡ ରୁମ୍କୁ ନେଇ ଗଣବଳାତ୍କାର କରିଥିଲେ। ରାତି ୧୦ଟା ୫୦ ମିନିଟ୍ ପର୍ଯ୍ୟନ୍ତ ଥମି ନ ଥିଲା ସେମାନଙ୍କ ବର୍ବରତା। ଥାନାରେ ଛାତ୍ରୀ ଜଣକ ଦେଇଥିବା ଏତଲା ଅନୁସାରେ ବଳାତ୍କାର ନ କରିବାକୁ ସେ ଅଭିଯୁକ୍ତମାନଙ୍କ ଗୋଡ଼ ଧରି ନେହୁରା ହୋଇଥିଲେ। କିନ୍ତୁ ସେମାନେ ତାଙ୍କ କଥା ଆଦୌ ଶୁଣି ନ ଥିଲେ। ସେମାନେ ପୀଡ଼ିତାଙ୍କୁ ବଳାତ୍କାର କରିବା ପୂର୍ବରୁ କଲେଜର ମୁଖ୍ୟ ଫାଟକରେ ତାଲା ପକାଇ ଦେଇଥିଲେ। ଏପରି କି ସେଠାରେ ମୁତୟନ ହୋଇଥିବା ସୁରକ୍ଷା କର୍ମୀ ମଧ୍ୟ ସେମାନଙ୍କ ଭୟରେ ପୀଡ଼ିତାଙ୍କୁ ସାହାଯ୍ୟ କରିପାରି ନ ଥିଲେ। ବଳାତ୍କାର ସମୟରେ ସେମାନେ ମୋବାଇଲରେ ସେହି ଦୃଶ୍ୟର ଭିଡିଓ ଶୁଟିଂ କରିଥିଲେ ଏବଂ ତାଙ୍କ ମୁହଁ ବନ୍ଦ ପାଇଁ ବ୍ଲାକ୍ମେଲିଂ କରିଥିଲେ। ବଳାତ୍କାର ଶିକାର ହେବା ପରେ ସେମାନେ ଛାତ୍ରୀଙ୍କୁ ହକି ଷ୍ଟିକ୍ରେ ଆକ୍ରମଣ କରିଥିଲେ। ଘଟଣା ସମ୍ପର୍କରେ କାହାକୁ କିଛି କହିଲେ ଭିଡିଓ ଭାଇରାଲ କରିଦେବେ ବୋଲି ଧମକ ଦେଇଥିଲେ।
ଗୁରୁବାର ମାମଲା ରୁଜୁ ପରେ କସ୍ବା ଥାନା ପୋଲିସ ମୁଖ୍ୟ ଅଭିଯୁକ୍ତ ମୋନୋଜିତ୍ ମିଶ୍ରା ଓ ଅନ୍ୟ ୨ ଜଣଙ୍କୁ ଗିରଫ କରିଛି। ମୋନୋଜିତ୍ ଉକ୍ତ କଲେଜର ଜଣେ ପୂର୍ବତନ ଛାତ୍ର। ସେ ଟିଏମ୍ସି ଛାତ୍ର ପରିଷଦ ଦକ୍ଷିଣ କୋଲକାତା ଜିଲା ୟୁନିଟ୍ର ସାଧାରଣ ସମ୍ପାଦକ। ମୋନୋଜିତ୍ ସେସନ୍ସ କୋର୍ଟରେ ଓକିଲାତି କରିବା ସହ ଉକ୍ତ କଲେଜରେ ଅସ୍ଥାୟୀ ଭାବେ ନିଯୁକ୍ତି ମଧ୍ୟ ପାଇଥିଲେ। ଅନ୍ୟ ୨ ଅଭିଯୁକ୍ତ ହେଲେ ଉକ୍ତ କଲେଜର ୧୯ ବର୍ଷୀୟ ଛାତ୍ର ଜଇବ ଅହମଦ ଏବଂ ୨୦ ବର୍ଷୀୟ ପ୍ରମିତ୍ ମୁଖାର୍ଜୀ। ଇତିମଧ୍ୟରେ ପୋଲିସ ଓ ଫୋରେନ୍ସିକ୍ ବିଶେଷଜ୍ଞମାନେ ଘଟଣାସ୍ଥଳକୁ ଯାଇ ତଦନ୍ତ ଚଳାଇଛନ୍ତି। ଅଭିଯୁକ୍ତମାନଙ୍କ ୩ ମୋବାଇଲ ଫୋନ୍କୁ ଜବତକରି ଫୋରେନ୍ସିକ୍ ଟେଷ୍ଟ ପାଇଁ ପଠାଯାଇଛି।
ଅନ୍ୟପକ୍ଷେ ଛାତ୍ରୀଙ୍କୁ ଗଣବଳାତ୍କାର ଘଟଣା ସାମ୍ନାକୁ ଆସିବା ପରେ ଭାଜପା ଓ ବାମପନ୍ଥୀ ଦଳ ଶାସକ ଟିଏମ୍ସିକୁ ଟାର୍ଗେଟ କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ତାଙ୍କ ପୁତୁରା ତଥା ଦଳର ଦ୍ୱିତୀୟ ନେତା ଅଭିଷେକ ବାନାର୍ଜୀଙ୍କ ସହ ମୋନୋଜିତ୍ଙ୍କ ଫଟୋକୁ ଭାଜପା ପକ୍ଷରୁ ଶେୟାର କରାଯାଇଛି। ଭାଜପା ଆଇଟି ସେଲ୍ ମୁଖ୍ୟ ଅମିତ୍ ମାଲବ୍ୟ ଓ ଜାତୀୟ ମୁଖପାତ୍ର ପ୍ରଦୀପ ଭଣ୍ଡାରୀ ଆର୍.ଜି. କର ମାମଲା ସହ ସଦ୍ୟ ଘଟଣାର ଅବତାରଣା କରି ମମତାଙ୍କୁ ସମାଲୋଚନା କରିଛନ୍ତି। ଟିଏମ୍ସି ପକ୍ଷରୁ କୁହାଯାଇଛି ଯେ, ମୋନୋଜିତ୍ଙ୍କୁ ଦଣ୍ଡିତ କରିବାରେ ଆଇନ ନିଜ କାର୍ଯ୍ୟ କରିବ। ଏହି ଘଟଣାକୁ ନେଇ ବାମପନ୍ଥୀ ଛାତ୍ର ସଂଘ ଏସ୍ଏଫ୍ଆଇ ଏବଂ ଡିଓ୍ବାଇଏଫ୍ଆଇ ପକ୍ଷରୁ କସ୍ବା ଥାନା ସମ୍ମୁଖରେ ବିକ୍ଷୋଭ ପ୍ରଦର୍ଶନ ବେଳେ ପୋଲିସ ସହ ସଂଘର୍ଷ ହୋଇଛି। ସଂଘର୍ଷରେ ଅନେକ ବିକ୍ଷୋଭକାରୀ ଆହତ ହୋଇଛନ୍ତି। ଅନେକଙ୍କୁ ସିଟି ପୋଲିସର ଲାଲବଜାର ମୁଖ୍ୟାଳୟରେ ଅଟକ ରଖାଯାଇଛି।
