ନୂଆଦିଲ୍ଲୀ, ୩୦।୭: ପାକିସ୍ତାନ କ୍ରିକେଟ୍ ଦଳର ପ୍ରାକ୍ତନ ଅଧିନାୟକ ଶାହିଦ ଆଫ୍ରିଦୀ ଅଧିକାଂଶ ସମୟରେ ଭାରତ ବିରୋଧୀ ମନ୍ତବ୍ୟ ଦେଇ ଚର୍ଚ୍ଚାରେ ରହିଥାନ୍ତି। ଯେଉଁଥି ପାଇଁ ଭାରତୀୟ କ୍ରିକେଟ୍ ପ୍ରେମୀ ତାଙ୍କୁ ପସନ୍ଦ କରି ନ ଥାନ୍ତି। ନିକଟରେ କଶ୍ମୀର ପ୍ରସଙ୍ଗକୁ ନେଇ ଆଫ୍ରିଦୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ଏମିତି ବୟାନ ବାଜି କରିଥିଲେ। ଯାହା ଫଳରେ ସେ ତାଙ୍କର ବନ୍ଧୁ ବୋଲାଉଥିବା ଯୁବରାଜ ସିଂ ଓ ହରଭଜନ ସିଂ ମଧ୍ୟ ତାଙ୍କଠାରୁ ସମ୍ପର୍କ ଛିନ୍ନ କରିଥିଲେ। ତେବେ ଆଫ୍ରିଦୀ ଏବେ ସୋସିଆଲ ମିଡିଆରେ ଏମିତି କିଛି କହିଛନ୍ତି, ଯେଉଁଥି ପାଇଁ ସେ ଭାରତୀୟ ପ୍ରଶଂସକଙ୍କ ମନ ଜିଣିପାରିଛନ୍ତି। ଜଣାପଡ଼ିଛି ଯେ, ଆଫ୍ରିଦୀ ବୁଧବାର ସୋସିଆଲ ମିଡିଆ ଟୁଇଟର୍ରେ ପ୍ରଶଂସକଙ୍କ ସହ ‘ପ୍ରଶ୍ନ-ଉତ୍ତର’ ଅଧିବେଶନ କରିଥିଲେ। ଯେଉଁଥିରେ ପ୍ରଶଂସକମାନେ ତାଙ୍କୁ ଅନେକ ପ୍ରସଙ୍ଗରେ ପ୍ରଶ୍ନ ପଚାରିଥିଲେ ଏବଂ ସେ ସମସ୍ତ ପ୍ରଶ୍ନର ମଧ୍ୟ ଉତ୍ତର ରଖିଥିଲେ। ଏହି ସମୟରେ ଜଣେ ପ୍ରଶଂସକ ଆଫ୍ରିଦୀଙ୍କୁ ପଚାରିଥିଲେ, ‘ଧୋନୀ ଓ ପଣ୍ଟିଂ’ ମଧ୍ୟରେ କିଏ ଭଲ ଅଧିନାୟକ। ଉତ୍ତରରେ ଆଫ୍ରିଦୀ ପଣ୍ଟିଂଙ୍କ ତୁଳନାରେ ଧୋନୀଙ୍କୁ ଜଣେ ଭଲ ଅଧିନାୟକ ବୋଲି କହିଛନ୍ତି। ଏହାର କାରଣରେ ଆଫ୍ରିଦୀ କହିଥିଲେ, ଧୋନୀ ଯୁବ ଖେଳାଳିଙ୍କୁ ନେଇ ଗଠିତ ଗୋଟିଏ ଟିମ୍କୁ ଠିଆ କରାଇବାରେ ସଫଳ ହୋଇଥିଲେ। ଏଠାରେ ଉଲ୍ଲେଖଯୋଗ୍ୟ, ଆଫ୍ରିଦୀ ଭାରତୀୟ ଦଳର ପ୍ରାକ୍ତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ପ୍ରଶଂସା କରିବା ଏହା ପ୍ରଥମ ଘଟଣା ନୁହେଁ। ଏଥିପୂର୍ବରୁ ୨୦୧୪ରେ ମଧ୍ୟ ଆଫ୍ରିଦୀ କହିଥିଲେ, ‘ଧୋନୀ ଯେଉଁଭଳି ଭାବରେ ଦଳକୁ ନେଇକି ଯାଉଛନ୍ତି ତାହା ଆଶ୍ଚର୍ଯ୍ୟଜନକ। ସେ ଟିମ୍ରେ ଏକ ଭଲ କମ୍ବିନେଶନ ବନାଇ ରଖୁଛନ୍ତି। ଧୋନୀ ସର୍ବଦା ଜଣେ ଭଲ ଅଧିନାୟକ ରହି ଆସିଛନ୍ତି।’
