ଭୁବନେଶ୍ୱର,୧୨।୬: ଭାଜପା ପୁଣିଥରେ ଓଡ଼ିଶାରେ ନୂଆ ଚେହେରା ଦେଇ ସମସ୍ତଙ୍କୁ ଚମକାଇଛି। ନାନାଦି ଚର୍ଚ୍ଚା ଉପରେ ପୂର୍ଣ୍ଣଚ୍ଛେଦ ପକାଇ ଦଳ କେନ୍ଦୁଝର ବିଧାୟକ ମୋହନ ଚରଣ ମାଝୀଙ୍କୁ ମୁଖ୍ୟମନ୍ତ୍ରୀ କରିଛି। ପୂର୍ବରୁ ଅନେକ ଲୋକପ୍ରିୟ ବିଧାୟକଙ୍କ ନାମ ଚର୍ଚ୍ଚାରେ ରହିଥିଲେ ହେଁ ସମସ୍ତଙ୍କୁ ପଛରେ ପକାଇ ମୋହନ କିଭଳି ମୁଖ୍ୟମନ୍ତ୍ରୀ ହେଲେ ତାହା ବିଚାରଯୋଗ୍ୟ।
ଆର୍ଏସ୍ଏସ୍ ସହ ସମ୍ପର୍କ
ମାଝି ଜଣେ ବିବାଦୀୟ ନେତା ନୁହନ୍ତି। ତାଙ୍କର ଆର୍ଏସ୍ଏସ୍ ସହ ଭଲ ସମ୍ପର୍କ ରହିଛି। କାରଣ ସେ ଜଣେ ଆର୍ଏସ୍ଏସ୍ କର୍ମୀ ଥିଲେ। ୪ ଥର ବିଧାୟକ ଥିବା ଏହି ନେତା ଓଡ଼ିଶା ଶାସନକୁ ନେଇ ଦଳର ରଣନୀତିରେ ସହାୟକ ଭୂମିକା ତୁଲାଇଥିଲେ। ତାଙ୍କର କାହା ସହ ବିବାଦ ନାହିଁ। ସେ ଜଣେ ଆଦିବାସୀ ଏବଂ ମାଝି। ମୋହନଙ୍କ ଝାଡ଼ଖଣ୍ଡ କନେକ୍ସନ ମଧ୍ୟ ଏଭଳି ନିଷ୍ପତ୍ତି ପଛର କାରଣ ବୋଲି କୁହାଯାଉଛି। ବୋଧହୁଏ ଏସବୁ ଲାଗି କନକ ବର୍ଦ୍ଧନ ସିଂ ଦେଓ, ପ୍ରଭାତି ପରିଡ଼ା, ସୁରେଶ ପୁଜାରୀ, ମନମୋହନ ସାମଲ, ମୁକେଶ ମହାଲିଙ୍ଗ ଏବଂ ସୁରମା ପାଢ଼ୀଙ୍କୁ ମୋହନ ପଛରେ ପକାଇଲେ।
୨୦୨୪ ନିର୍ବାଚନର ପ୍ରଭାବ:
ଲୋକ ସଭା ନିର୍ବାଚନରେ ଭାଜପାକୁ ବଡ଼ ଝଟ୍କା ମିଳିଛି। କାରଣ ଦଳ ୪୦୦ ପାର ସ୍ଲୋଗାନ ଦେଇଥିଲେ ହେଁ ଏକାକି ବହୁମତ ହାସଲ କରିପାରି ନାହିଁ। କେବଳ ୨୪୦ ଆସନରେ ଦଳ ସୀମିତ ରହିଛି। ଏବେ କେନ୍ଦ୍ରରେ ମେଣ୍ଟ ସରକାର ଚାଲିଛି। ଏଣୁ ଆଗାମୀ ଦିନରେ ଝାଡ଼ଖଣ୍ଡ ଏବଂ ମହାରାଷ୍ଟ୍ରରେ ବିଧାନସଭା ନିର୍ବାଚନ ହେବାକୁ ଯାଉଛି। ୨୦୧୯ରେ ଝାଡ଼ଖଣ୍ଡରେ ଏନ୍ଡିଏ ୧୪ରୁ ୧୨ ଆସନରେ ବିଜେତା ହୋଇଥିଲା, ହେଲେ ୨୦୨୪ ଲୋକ ସଭା ନିର୍ବାଚନରେ ଦଳକୁ ମାତ୍ର ୯ ଆସନ ମିଳିଛି। ରାଜ୍ୟରେ ପୂର୍ବମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଗିରଫ କରାଯିବାର ପ୍ରଭାବ ନିର୍ବାଚନରେ ପଡ଼ିଥିବା କୁହାଯାଉଛି।
ମାଝି ଏବଂ ଝାଡ଼ଖଣ୍ଡ କନେକ୍ସନ:
ଓଡ଼ିଶାରେ ମାଝିଙ୍କୁ ଶାସନ ଡୋର ଦେଇ ଭାଜପା ଝାଡ଼ଖଣ୍ଡରେ ଆଦିବାସୀ ଭୋଟରଙ୍କ ମନ ଜିଣିବାକୁ ଚେଷ୍ଟା କରିଛି। ରାଜ୍ୟରେ ଅକ୍ଟୋବର-ନଭେମ୍ବରରେ ବିଧାନସଭା ନିର୍ବାଚନ ହେବ। ୪୫% ଆଦିବାସୀ ଥିବା କେନ୍ଦୁଝର ବିଧାନସଭା ଆସନରୁ ମାଝି ବିଜେତା ହୋଇଛନ୍ତି, ଏହା ଏକ ଏସ୍ଟି ସଂରକ୍ଷିତ ଆସନ। କେନ୍ଦୁଝର ଜିଲା ଝାଡ଼ଖଣ୍ଡ ସୀମାଠାରୁ ମାତ୍ର ୫୦ କିମି ଦୂରରେ ଅବସ୍ଥିତ। ୨୦୧୧ ଜନଗଣନା ଅନୁଯାୟୀ ଏହା ଏକ ଆଦିବାସୀ ରାଜ୍ୟ, ଏଠାରେ ମୋଟ ଜନସଂଖ୍ୟାର ୨୬.୨% ଏସ୍ଟି ଅଛନ୍ତି।
ସଫଳତାର ଗ୍ୟାରେଣ୍ଟି କେତେ?
ଭାଜପା ଝାଡ଼ଖଣ୍ଡକୁ ଧ୍ୟାନରେ ରଖି ମୋହନଙ୍କ ଉପରେ ମୋହର ଲଗାଇଥିଲେ ହେଁ ଏଥିରେ ସଫଳତା ମିଳିବାର କୌଣସି ଗ୍ୟାରେଣ୍ଟି ନାହିଁ। ଭାଜପା ପୂର୍ବରୁ ଉତ୍ତରପ୍ରଦେଶ ଏବଂ ବିହାରରେ ଯାଦବ ଭୋଟକୁ ନିଜ ପକ୍ଷରେ କରିବା ଲାଗି ମଧ୍ୟପ୍ରଦେଶରେ ମୋହନ ଯାଦବଙ୍କୁ ମୁଖ୍ୟମନ୍ତ୍ରୀ କରିଥିଲା। ହେଲେ ସେତେଟା ଲାଭ ମିଳି ନ ଥିଲା। ଏମିତିରେ ମୋହନଙ୍କ ଉପରେ ଗୋଟି ଚାଳନା କରି ଭାଜପାକୁ ଝାଡ଼ଖଣ୍ଡରେ ଲାଭ ମିଳୁଛି କି ନାହିଁ ତାହା ଆଗାମୀ ଦିନରେ ସ୍ପଷ୍ଟ ହୋଇଯିବ।
