ରାଞ୍ଚି,୩୦।୧: ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ମିଳିଛନ୍ତି। ତାଙ୍କ ବାସଭବନରେ ତଦନ୍ତ ଲାଗି ପହଞ୍ଚିଥିବା ଇଡି ଟିମ୍ ତାଙ୍କୁ ଖୋଜିଲେ ବି ପାଇ ନ ଥିଲା। ଏବେ ନାଟକୀୟ ଢ଼ଙ୍ଗରେ ସେ ରାଞ୍ଚି ପହଞ୍ଚିଛନ୍ତି। ଏପରିକି ବିଧାୟକମାନଙ୍କ ସହ ବୈଠକ କରିଛନ୍ତି। ଏହି ସମୟରେ ତାଙ୍କ ନିକଟରେ ପତ୍ନୀ କଳ୍ପନା ସୋରେନ ଉପସ୍ଥିତ ଥିଲେ। ଏଣୁ କଳ୍ପନାଙ୍କୁ ସେ ଝାଡ଼ଖଣ୍ଡର ମୁଖ୍ୟମନ୍ତ୍ରୀ କରି ପାରନ୍ତି ବୋଲି ଚର୍ଚ୍ଚା ଜୋର ଧରିଛି।
ଏହି ଘଟଣାକ୍ରମକୁ ନେଇ ଭାଜପା ଏମ୍ପି ନିଶିକାନ୍ତ ଦୁବେ ସୋରେନଙ୍କ ଉପରେ ଅଭିଯୋଗ ଆଣି କହିଛନ୍ତି, ସୋରେନ ପତ୍ନୀଙ୍କୁ ମୁଖ୍ୟମନ୍ତ୍ରୀ କରିବାକୁ ଚାହୁଁଛନ୍ତି। ଏଣୁ ରାଜ୍ୟରେ ଏବେ ରାଷ୍ଟ୍ରପତି ଶାସନ ଲାଗୁ କରିବାର ସଠିକ୍ ସମୟ। ରାଜ୍ୟପାଳଙ୍କୁ ଭାରତୀୟ ସମ୍ବିଧାନ ଅନୁଚ୍ଛେଦ ୩୫୫ ଅନୁଯାୟୀ ରିପୋର୍ଟ ପଠାଇବାକୁ ସେ ଅନୁରୋଧ କରିଛନ୍ତି।
ତେବେ କ’ଣ ଆପଣ ଜାଣନ୍ତି ଅନୁଚ୍ଛେଦ ୩୫୫ କ’ଣ?
ସମ୍ବିଧାନର ଅନୁଚ୍ଛେଦ ୩୫୫ କେନ୍ଦ୍ର ସରକାରଙ୍କୁ ରାଜ୍ୟମାନଙ୍କୁ ବାହ୍ୟ ଆକ୍ରୋଶରୁ ରକ୍ଷା କରିବା ଏବଂ ଆଭ୍ୟନ୍ତରୀଣ ଶାନ୍ତି ବଜାୟ ରଖିବା ଲାଗି ସୁଯୋଗ ଦେଇଥାଏ। ଏହି ବ୍ୟବସ୍ଥା ମାଧ୍ୟମରେ କେନ୍ଦ୍ର ସରକାର ରାଜ୍ୟରେ ଥିବା ସରକାରଙ୍କୁ ବରଖାସ୍ତ ନ କରି ଆଇନଶୃଙ୍ଖଳା ନିୟନ୍ତ୍ରଣ କରିବାର କ୍ଷମତା ପାଇଛନ୍ତି। ପ୍ରତ୍ୟେକ ରାଜ୍ୟ ସରକାରଙ୍କୁ ସମ୍ବିଧାନ ଅନୁଯାୟୀ କାର୍ଯ୍ୟ କରିବାକୁ ନିର୍ଦ୍ଦେଶ ଦେବା କେନ୍ଦ୍ରର କର୍ତ୍ତବ୍ୟ। ଏହିପରି ଝାଡ଼ଖଣ୍ଡର ପରିସ୍ଥିତିକୁ ଦେଖି ଏକ ବଡ଼ ନିଷ୍ପତ୍ତି ନିଆଯାଇପାରେ।
କେବଳ ଏତିକି ନୁହେଁ, ଧାରା ୩୫୬ ରାଷ୍ଟ୍ରପତିଙ୍କୁ କ୍ଷମତା ପ୍ରଦାନ କରେ। ଯଦି ରାଜ୍ୟରେ ପରିସ୍ଥିତି ଏପରି ହୋଇଛି ଯେ ସରକାର ଏହାକୁ ସମ୍ବିଧାନ ଅନୁଯାୟୀ ଚଳାଇବାରେ ସକ୍ଷମ ନୁହନ୍ତି, ତେବେ ରାଷ୍ଟ୍ରପତିଙ୍କ ନିୟମ ଲାଗୁ ହୋଇପାରେ। ଯଦି ରାଜ୍ୟ ସରକାର କେନ୍ଦ୍ରର ନିର୍ଦ୍ଦେଶ ପାଳନ କରିବାରେ ବିଫଳ ହୁଅନ୍ତି, ତେବେ ରାଷ୍ଟ୍ରପତିଙ୍କୁ ଏକ ସ୍ପଷ୍ଟ ବାର୍ତ୍ତା ପଠାଯିବ ଯେ ସେଠାରେ ଥିବା ସରକାର ସମ୍ବିଧାନ ଅନୁଯାୟୀ ଚାଲିପାରିବ ନାହିଁ।
