ଭୁବନେଶ୍ବର, ୨୯ା୩(ବ୍ୟୁରୋ): ରାହୁଲ ଗାନ୍ଧୀଙ୍କ ପାଇଁ ଭାରତ ଏକାଠି ହୋଇଛି। ବିରୋଧୀ ଏକସ୍ବରରେ ଗଣତନ୍ତ୍ରରେ ଏଭଳି ନିଷ୍ପତ୍ତିକୁ ବିରୋଧ କରିବା ସହିତ ନିନ୍ଦା କରିଛନ୍ତି। ଏହି ନିଷ୍ପତ୍ତିର ବିରୋଧରେ ଦେଶବ୍ୟାପୀ ୧୮ଟି ଦଳ ସାମିଲ ହୋଇଛନ୍ତି। ପୁଣି ରାଜ୍ୟରେ ସମସ୍ତ ବିରୋଧୀ ଦଳ ଏକାଠି ହୋଇ ବିରୋଧ କରୁଛନ୍ତି। ମାତ୍ର ଓଡ଼ିଶାରେ ବିଜେଡି ଏହି ପ୍ରସଙ୍ଗରେ ପୁରା ଚୁପ୍। ସନ୍ଦେହ ଯାହା ଥିଲା କି ବିଜେଡି ଓ ଭାଜପା ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ, ତାହା ଏବେ ପ୍ରମାଣିତ ହେଲା ବୋଲି କଂଗ୍ରେସ ନେତା ବିଜୟ ପଟ୍ଟନାୟକ କହିଛନ୍ତି।
ଗଣମାଧ୍ୟମକୁ ପ୍ରତିକ୍ରିୟା ଦେଇ ମଙ୍ଗଳବାର ବିଜୟ ଆହୁରି କହିଛନ୍ତି, ବୋଧ ହୁଏ ବିଜେଡି ଓ ଭାଜପା ଉଭୟଙ୍କ ଚିନ୍ତାଧାରା ସମାନ। ଯଦି ବିଜେଡି ଓ ଭାଜପା ଉଭୟ ପ୍ରତିଦ୍ୱନ୍ଦ୍ୱୀ ତେବେ ବିଜେଡି କାହିଁକି ଏହି ପ୍ରସଙ୍ଗରେ ମୁହଁ ଖୋଲୁନାହିଁ। ଦରକାର ପଡିଲେ ଉଭୟ ଦଳ ବିରୋଧୀଙ୍କ କଣ୍ଠରୋଧ କରିବାକୁ ସିବିଆଇ, ଇଡି, ଭିଜିଲାନ୍ସ, ପୋଲିସ ଲଗାଇଥାନ୍ତି। ଏହା ସ୍ପଷ୍ଟ ଭାବେ ପ୍ରତିପାଦିତ ହେଉଛି ଯେ ଉଭୟ ଦଳ ପରସ୍ପର ପାଇଁ କାମ କରୁଛନ୍ତି। ନ ହେଲେ ବିଜେଡି କେବେ ହେଲେ ଚୁପ୍ ରହି ନ ଥାଆନ୍ତା। ଏନେଇ ବିଜେଡି ସ୍ପଷ୍ଟିକରଣ ଦେବା ଦରକାର ବୋଲି ବିଜୟ କହିଛନ୍ତି। ବିଜେଡିର ଜୟ ଜଗନ୍ନାଥ ଏବଂ ଭାଜପାର ଜୟ ଶ୍ରୀରାମ ପ୍ରସଙ୍ଗରେ ବିଜୟ କହିଛନ୍ତି, ସେମାନେ ଭଗବାନଙ୍କ ନାଁ ନେବା ପାଇଁ ଚାହୁଁଛନ୍ତି ମାନେ ଖୁସି ହେବା କଥା। କିନ୍ତୁ ବିଜେଡ଼ିକୁ ପ୍ରଶ୍ନ ରତ୍ନ ଭଣ୍ଡାର ବିଷୟରେ କ’ଣ କାର୍ଯ୍ୟାନୁଷ୍ଠାନ ନେଇଛନ୍ତି। ସେଠାରେ ଅଳଙ୍କାର ଅଛି ନା ନାହିଁ ଏ ସମ୍ପର୍କରେ ସ୍ପଷ୍ଟ କାହିଁକି ହେଉନି। ରତ୍ନ ଭଣ୍ଡାରର ଚାବି କୁଆଡ଼େ ହଜିଲା ତାହା ବଡ ପ୍ରଶ୍ନ। ବ୍ରହ୍ମ ବିଭ୍ରାଟ ସମ୍ପର୍କରେ ସ୍ପଷ୍ଟୀକରଣ ଆସିବା ଦରକାର। ଠାକୁରଙ୍କୁ ବନ୍ଦନା କରିବାରେ କାହାରି ଆପତ୍ତି ନାହିଁ। ହେଲେ ଧର୍ମକୁ ନେଇ ରାଜନୀତି କରିବା ଉଚିତ ନୁହେଁ। ଭାଜପା କାଳେ ଅଧିକ ମାଇଲେଜ ନେଇଯିବ ତାକୁ ନଜରରେ ରଖି ବିଜେଡି ଏପରି କରୁଥାଇପାରେ। କିନ୍ତୁ କଂଗ୍ରେସ ଧର୍ମ ନିରପେକ୍ଷ ଦଳ ବୋଲି ବିଜୟ କହିଛନ୍ତି।
