ବେଜିଂ,୩।୨: ଗତ କିଛି ଦିନ ଧରି ସୁନା ଏବଂ ରୂପା ମୂଲ୍ୟରେ ଯଥେଷ୍ଟ ପରିବର୍ତ୍ତନ ଆସିଛି। ବଜାରରେ ଏପରି ଏକ ସମୟ ଆସିଥିଲା ଯେତେବେଳେ ସୁନାର ମୂଲ୍ୟ ହଠାତ ୧୮,୦୦୦ ପ୍ରତି ଗ୍ରାମ ପହଞ୍ଚିଥିଲା ଏବଂ ପରେ ପରେ ଏହା ୧୪,୦୦୦ ପ୍ରତି ଗ୍ରାମକୁ ଖସି ଆସିଥିଲା। ଏହି ଅସ୍ଥିରତା ନିବେଶକମାନଙ୍କୁ ଦ୍ୱନ୍ଦ୍ୱରେ ପକାଇଛି। ଏହି ସମୟରେ, ଗୋଟିଏ ଦେଶରେ ସୁନା କିଣିବା ଅପେକ୍ଷା ବିକ୍ରୟ କରିବାର ଧାରା ଅଧିକ ବୃଦ୍ଧି ପାଇଛି। କଥାଟଶ ଆଶ୍ଚର୍ଯ୍ୟ ଲାଗୁଥିଲେ ବି ସତ। ଲୋକମାନେ ଏହାକୁ ବା ସୁନାକୁ ବିକ୍ରୟ କରିବା ପାଇଁ ଧାଡ଼ିରେ ଠିଆ ହେଉଛନ୍ତି। ଆସନ୍ତୁ ଜାଣିବା ଏହା କେଉଁ ଦେଶରେ ଘଟୁଛି ଏବଂ ଏହା ପଛରେ କ’ଣ କାରଣ।
ରେକର୍ଡ ସୁନା ମୂଲ୍ୟର ସବୁଠାରୁ ଆକର୍ଷଣୀୟ ପ୍ରଭାବ ଚାଇନାରେ ଦେଖିବାକୁ ମିଳୁଛି। ଏଠାରେ ଲୋକମାନେ ସେମାନଙ୍କର ପୁରୁଣା ଅଳଙ୍କାର ବିକ୍ରି କରୁଛନ୍ତି, ଏହାକୁ ଏକ ନିବେଶ ନୁହେଁ, ବରଂ ଏକ ‘ସୁବର୍ଣ୍ଣ ସୁଯୋଗ’ ବୋଲି ଭାବୁଛନ୍ତି। ସାଂଘାଇର ଏକ ପ୍ରମୁଖ ମଲ ସମ୍ପ୍ରତି ଏକ ସ୍ବୟଂଚାଳିତ ସୁନା ପୁନଃଚକ୍ରଣ ମେଶିନ ସ୍ଥାପନ କରିଛି, ଯାହା ସାଧାରଣ ଲୋକଙ୍କ ପାଇଁ ସିଧାସଳଖ ନଗଦ ରୋଜଗାର କରିବାର ଏକ ପଥ ଖୋଲି ଦେଇଛି।
କିଙ୍ଗହୁଡ ଗ୍ରୁପ ଦ୍ୱାରା ସ୍ଥାପିତ ଏହି ମେଶିନ ଏକ ATM ପରି କାମ କରେ। ଲୋକମାନେ ଏଥିରେ ସୁନା ଅଳଙ୍କାର, ମୁଦ୍ରା କିମ୍ବା ମୁଦି ପ୍ରବେଶ କରାନ୍ତି ବା ପକାନ୍ତି। ମେଶିନ ସ୍ବୟଂଚାଳିତ ଭାବରେ ସୁନାର ଓଜନ ଏବଂ ଶୁଦ୍ଧତା ଯାଞ୍ଚ କରେ ଏବଂ କିଛି ମିନିଟ ମଧ୍ୟରେ ନଗଦ ଦେଇଦିଏ। ଏହି ସୁବିଧା ଯୋଗୁ ମେଶିନ ବାହାରେ ଘଣ୍ଟା ଘଣ୍ଟା ଧରି ଧାଡ଼ି ଲାଗି ରହିଛି।
ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, ଲୋକମାନେ କେବଳ ଅତିରିକ୍ତ ଅଳଙ୍କାର ନୁହେଁ ବରଂ ପାରିବାରିକ ସମ୍ପତ୍ତି ମଧ୍ୟ ବିକ୍ରି କରୁଛନ୍ତି। ଜଣେ ୫୪ ବର୍ଷୀୟା ମହିଳା ତାଙ୍କ ଝିଅର ଜନ୍ମ ପାଇଁ କିଣାଯାଇଥିବା ସୁନା ମୁଦ୍ରା ବିକ୍ରୟ କରିବାକୁ ଆସିଥିଲେ। ଆଉ ଜଣେ ମହିଳା ତାଙ୍କ ସ୍ବର୍ଗତ ପିତାଙ୍କଠାରୁ ଉତ୍ତରାଧିକାରୀ ଭାବରେ ପାଇଥିବା ଏକ ମୁଦି ବିକ୍ରି କରୁଥିଲେ, ଯାହାର ମୂଲ୍ୟ ବର୍ତ୍ତମାନ ପ୍ରାୟ ୧୦,୦୦୦ ୟୁଆନ (ପ୍ରାୟ ୧.୩ ଲକ୍ଷ ଟଙ୍କା), ଦଶନ୍ଧି ପୂର୍ବରୁ ମାତ୍ର ୧,୦୦୦ ୟୁଆନରେ କିଣାଯାଇଥିଲା।
ଅନେକ ବୃଦ୍ଧ ଏବଂ ମଧ୍ୟବିତ୍ତ ଶ୍ରେଣୀର ଲୋକଙ୍କ ପାଇଁ, ଏହି ମେଶିନ ସେମାନଙ୍କର ପେନସନ ପୂରଣ କରିବାର ଏକ ମାଧ୍ୟମ ପାଲଟିଛି। ଜଣେ ବ୍ୟକ୍ତି ୧୯୫୦ ରୁ ୧୯୮୦ ମଧ୍ୟରେ କିଣାଯାଇଥିବା ତାଙ୍କ ଜେଜେବାପାଙ୍କ ମୁଦି ବିକ୍ରୟ କରିବାକୁ ଆସିଥିଲେ। ସେ କହିଥିଲେ, ‘ଯେତେବେଳେ ମୂଲ୍ୟ ଏତେ ଭଲ, ଏହାକୁ ରଖିବା ଅପେକ୍ଷା ବିକ୍ରୟ କରିବା ଭଲ।’
ଚାଇନା ବିଶ୍ୱର ସର୍ବବୃହତ ସୁନା କ୍ରେତା ଭାବରେ ବିବେଚନା କରାଯାଏ। ଭାରତ ପରି, ବିବାହ ଏବଂ ଜନ୍ମ ପରି ଅବସରରେ ସେଠାରେ ସୁନା କିଣାଯାଏ। କିନ୍ତୁ ମୂଲ୍ୟରେ ତୀବ୍ର ବୃଦ୍ଧି ଲୋକଙ୍କୁ କ୍ରେତାରୁ ବିକ୍ରେତା କରିଛି।
ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଚାଇନାରୁ ଆରମ୍ଭ ହୋଇଥିବା ଏହି ଧାରା ଭାରତରେ ମଧ୍ୟ ପହଞ୍ଚିପାରେ। ଯଦି ଲୋକମାନେ ପୁରୁଣା ଅଳଙ୍କାର ବିକ୍ରୟ କରିବା ଆରମ୍ଭ କରନ୍ତି, ତେବେ ଏହା ବଜାରରେ ଯୋଗାଣ ବୃଦ୍ଧି କରିବ ଏବଂ ସୁନା ମୂଲ୍ୟରେ ପରିବର୍ତ୍ତନ ଘଟିପାରେ। ତଥାପି, ସୁନା ବର୍ତ୍ତମାନ କେବଳ ଏକ ଅଳଙ୍କାର ଜିନିଷ ନୁହେଁ, ବରଂ ତୁରନ୍ତ ନଗଦର ଏକ ଉତ୍ସ ମଧ୍ୟ ହୋଇଯାଉଛି।
