ନୂଆଦିଲ୍ଲୀ,୨୮ା୧୧: ଭାରତୀୟ ରେଳବାଇ କେବଳ ଅନ୍ଲାଇନ୍ ଟିକେଟ୍ କିଣୁଥିବା ଯାତ୍ରୀମାନଙ୍କୁ ଦୁର୍ଘଟଣା ବୀମା ସୁବିଧା କାହିଁକି ଯୋଗାଉଛି, କିନ୍ତୁ ଅଫ୍ଲାଇନ୍ରେ ଟିକେଟ୍ ବୁକ୍ କରୁଥିବା ଯାତ୍ରୀମାନଙ୍କୁ କାହିଁକି ନୁହେଁ, ସେ ନେଇ ସୁପ୍ରିମକୋର୍ଟ ରେଳବାଇକୁ ଜବାବ ମାଗିଛନ୍ତି।
ନ୍ୟାୟମୂର୍ତ୍ତି ଅହସାନୁଦ୍ଦୀନ ଅମାନୁଲ୍ଲା ଏବଂ ନ୍ୟାୟମୂର୍ତ୍ତି କେ ବିନୋଦ ଚନ୍ଦ୍ରନଙ୍କୁ ନେଇ ଗଠିତ ଖଣ୍ଡପୀଠଙ୍କୁ କୋର୍ଟରେ ଉପସ୍ଥିତ ଥିବା ରେଳବାଇ ପକ୍ଷରୁ ଅତିରିକ୍ତ ସଲିସିଟର ଜେନେରାଲ ବିକ୍ରମଜିତ ବାନାର୍ଜୀ ସୂଚନା ଦେଇଥିଲେ ଯେ ଦୁର୍ଘଟଣା କ୍ଷେତ୍ରରେ କେବଳ ଅନ୍ଲାଇନ୍ ଟିକେଟ୍ କ୍ରୟ କରୁଥିବା ଯାତ୍ରୀମାନଙ୍କୁ ବୀମା ସୁରକ୍ଷା ମିଳିଥାଏ।
ଖଣ୍ଡପୀଠ କହିଛନ୍ତି: “ଅନ୍ଲାଇନ୍ ଓ ଅଫ୍ଲାଇନ୍ ଟିକେଟ୍ କ୍ରୟ ମଧ୍ୟରେ ଏହି ଭିନ୍ନତା ବା ଭେଦଭାବର କାରଣ କ’ଣ, ସେ ନେଇ ବାନାର୍ଜୀ ରେଳବାଇ ଠାରୁ ନିର୍ଦ୍ଦେଶ ଆଣିବା ଆବଶ୍ୟକ।”
ସୁପ୍ରିମକୋର୍ଟ ଭାରତୀୟ ରେଳବାଇ ସମ୍ବନ୍ଧୀୟ ଏକ ମାମଲାର ଶୁଣାଣି କରୁଥିଲେ। ଖଣ୍ଡପୀଠ ରେଳବାଇ ଦ୍ୱାରା ଦାଖଲ କରାଯାଇଥିବା ରିପୋର୍ଟକୁ ଯାଞ୍ଚ କରି କହିଛନ୍ତି ଯେ ପ୍ରାରମ୍ଭିକ ପର୍ଯ୍ୟାୟରେ ଟ୍ରାକ୍ ଏବଂ ରେଳ କ୍ରସିଂର ସୁରକ୍ଷା ଉପରେ ଧ୍ୟାନ ଦେବା ଉଚିତ, ଯେଉଁଥିରୁ ଅନ୍ୟାନ୍ୟ ଦିଗଗୁଡ଼ିକ ଉପରେ ସୁଧାର ଆସିପାରିବ।
କୋର୍ଟ ରେଳବାଇକୁ ଜାନୁଆରୀ ୧୩ ତାରିଖରେ ହେବାକୁ ଥିବା ପରବର୍ତ୍ତୀ ଶୁଣାଣିରେ ବୀମା ପ୍ରସଙ୍ଗରେ ଉତ୍ତର ଦେବାକୁ କହିଛନ୍ତି।
