ନୂଆଦିଲ୍ଲୀ, ୧୧।୭: ବିକାଶ ଦୁବେଙ୍କ ଭଳି ମାଫିଆ ଡନ୍ କାହା ବଳରେ ବାହୁବଳୀ ହେଉଛନ୍ତି ସେ ନେଇ ଏବେ ଚର୍ଚ୍ଚା ଜାରି ରହିଛି। ବିକାଶଙ୍କ ସରେଣ୍ଡର ଘଟଣା, ଏହାପରେ ଏନ୍କାଉଣ୍ଟର ଏକ ଫିଲ୍ମର କାହାଣୀ ପରି ଜଣାପଡୁଛି। ଏହାର କିଛି ଦିନ ପୂର୍ବରୁ ୮ ଜଣ ପୋଲିସଙ୍କ ହତ୍ୟା ମଧ୍ୟ ବହୁ ପ୍ରଶାସନିକ ଅଧିକାରୀ ଏବଂ ରାଜନେତାଙ୍କୁ ସନ୍ଦେହ ଘେରକୁ ଆଣୁଛି। ତରବରିଆ ଭାବେ ଏନ୍କାଉଣ୍ଟର କରାଯାଇଥିବା କେତେକ ଏହି ଘଟଣା ପରେ ମତଦେଇଛନ୍ତି। ତେବେ ଏଭଳି ବାହୁବଳୀ ଗ୍ୟାଙ୍ଗ୍ଷ୍ଟରଙ୍କୁ ସୁରକ୍ଷା ଦେବା ପାଇଁ ବିଭିନ୍ନ ସମୟରେ ବହୁ ରାଜନୈତିକ ଦଳ ଅଣ୍ଟା ଭିଡୁଥିବାର ଉଦାହରଣ ମଧ୍ୟ ରହିଛି। ବିକାଶଙ୍କ କ୍ଷେତ୍ରରେ ମଧ୍ୟ ସମାନ ଘଟଣା ଘଟିଛି। ବିକାଶଙ୍କର ମଧ୍ୟ କିଛି ରାଜନୈତିକ ଦଳ ସହିତ ଭଲ ସମ୍ପର୍କ ଥିଲା। ଏହି ସମ୍ପର୍କ ନିର୍ବାଚନ ଜିତାଇବାଠାରୁ ଆରମ୍ଭ କରି ଭିନ୍ନ ଭିନ୍ନ ପ୍ରକାରର ବୋଲି ଅଭିଯୋଗ ହେଉଛି। ଏନ୍କାଉଣ୍ଟର ପରେ ବିରୋଧୀ ଦଳ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାରଙ୍କୁ ଘେରିବା ଆରମ୍ଭ କରିଛନ୍ତି। ଏନ୍କାଉଣ୍ଟର ଯୋଗୁ ବିକାଶଙ୍କ ସହିତ ଯୋଗସୂତ୍ରରେ ଥିବା ବଡ଼ ଅଧିକାରୀ ଏବଂ ରାଜନେତାଙ୍କ ନାମ ସବୁଦିନ ପାଇଁ ଅଜଣା ରହିଯାଇଥିବା ବିରୋଧୀ କହିଛନ୍ତି। ଏନେଇ କଂଗ୍ରେସ ରାଷ୍ଟ୍ରୀୟ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା କହିଛନ୍ତି ଯେ, ଅପରାଧୀଙ୍କର ତ ଅନ୍ତ ହୋଇଗଲା, ତେବେ ଅପରାଧ ଏବଂ ଅପରାଧୀଙ୍କୁ ସୁରକ୍ଷା ଦେଉଥିବା ଅଜଣା ବ୍ୟକ୍ତି ବିଶେଷଙ୍କ ନାମ ସବୁଦିନ ପାଇଁ ଅନ୍ଧାରରେ ରହିଗଲା। ବିକାଶଙ୍କୁ ପଚରାଉଚରା କରାଯାଇଥିଲେ ହୁଏତ ଭଲ ହୋଇଥାନ୍ତା। ବିକାଶଙ୍କ ନାମରେ ୬୦ରୁ ଅଧିକ ମାମଲା ରହିଥିଲା। ଉତ୍ତରପ୍ରଦେଶ ପୂର୍ବତନ ପୋଲିସ ମହାନିର୍ଦ୍ଦେଶକ ପ୍ରକାଶ ସିଂଙ୍କ ଅନୁସାରେ ରାଜ୍ୟରେ ଅପରାଧୀ ଏବଂ ରାଜନୈତିକ ଦଳ ମଧ୍ୟରେ ରହିଥିବା ସମ୍ପର୍କ ସମସ୍ତଙ୍କୁ ଜଣା। ୧୯୯୩ରେ ଗଠିତ ହୋଇଥିବା ବୋହରା କମିଟି ରିପୋର୍ଟ ସମ୍ପର୍କରେ ଆଲୋଚନା କରି କହିଛନ୍ତି ଯେ, ଏଥିରେ ଦର୍ଶାଯାଇଛି ଅପରାଧୀ, ରାଜନେତା ଏବଂ ପ୍ରଶାସନିକ ଅଧିକାରୀଙ୍କ ମଧ୍ୟରେ ଥିବା ଯୋଗାଯୋଗ ସମାଜ ପାଇଁ ବିପଦ ସୃଷ୍ଟି କରୁଛି। ତେବେ ଏହାର ସମାପ୍ତି ପାଇଁ ଗ୍ରହଣ କରାଯାଉଥିବା ପଦକ୍ଷେପ ପ୍ରଭାବଶାଳୀ ହୋଇ ପାରୁ ନ ଥିବା ସେ କହିଛନ୍ତି।
