କୋକସରା,୫ା୨(ଡି.ଏନ୍.ଏ.): ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଉଷ୍ଣତା ଏବେ ପଞ୍ଚାୟତରୁ ବ୍ଲକ ଯାଏ ଦେଖିବାକୁ ମିଳୁଛି। ଗାଁ ଗାଁରେ ସମିତିସଭ୍ୟ, ସରପଞ୍ଚ ପ୍ରାର୍ଥୀଙ୍କ ବ୍ୟାନର ପୋଷ୍ଟରରେ ଛାଇଗଲାଣି। ଏହି ରାଜନୈତିକ ବାତାବରଣ ମଧ୍ୟରେ ବ୍ଲକ ଅଧ୍ୟକ୍ଷ ଆସନ ପାଇଁ ଆଶାୟୀ ପ୍ରାର୍ଥୀଙ୍କ ସମିତି ଗଠନ ଅଙ୍କକଷା ଓ ରଣନୀତି ବି ପ୍ରସ୍ତୁତି ଚାଲିଛି। କୋକସରା ବ୍ଲକ ୨୨ଟି ପଞ୍ଚାୟତକୁ ନେଇ ରହିଛି। ଗତ ୨୦୧୭ ନିର୍ବାଚନରେ ବ୍ଲକ ଅଧ୍ୟକ୍ଷ ଆସନ ଅନୁସୂଚିତ ବର୍ଗଙ୍କ ରହିଥିଲା। ଚଳିତ ପଞ୍ଚାୟତ ନିର୍ବାଚନରେ ଏହି ଆସନ ଅଣସଂରକ୍ଷିତ ବର୍ଗ ମହିଳାଙ୍କ ପାଇଁ ରହିଛି। ବ୍ଲକର ୫ ପଞ୍ଚାୟତ ସମିତି ପଦବୀ ପାଇଁ ଅଣସଂରକ୍ଷିତ ମହିଳାଙ୍କ ପାଇଁ ରହିଛି ଏବଂ ୬ଟି ପଞ୍ଚାୟତ ଅଣସଂରକ୍ଷିତ ରହିଛି। କୋକସରା, ଆମପାଣି, ଡୁଡୁକାଠେଙ୍ଗା, ବଡ଼ପୋଡ଼ାଗୁଡ଼ା, ମାଝୀଗୁଡ଼ା ପଞ୍ଚାୟତ ଅଣସଂରକ୍ଷିତ ମହିଳାଙ୍କ ପାଇଁ ରହିଥିବା ବେଳେ କାଶୀବାହାଲ, ଡାଲଗୁମା, ଫୁଫଗାଁ, ମହିମା, ମୂଷାପାଲି ଓ ଲଡୁଗାଁ ପଞ୍ଚାୟତ ଅଣସଂରକ୍ଷିତ ବର୍ଗ ପାଇଁ ରହିଛି। ବ୍ଲକ ଅଧ୍ୟକ୍ଷ ଆସନ ପାଇଁ ଆଶାୟୀ ପ୍ରାର୍ଥିନୀ ଓ ସମର୍ଥକମାନେ ଏହି ପଞ୍ଚାୟତରୁ ନିର୍ବାଚନ ଲଢ଼ୁଛନ୍ତି। ତେବେ ଅଧ୍ୟକ୍ଷା ଦୌଡ଼ରେ ପୂର୍ବତନ ବ୍ଲକ ଅଧ୍ୟକ୍ଷା ରହିଥିବା ବିଜେଡି ସମର୍ଥିତ ରାଜଶ୍ରୀ ପ୍ରଧାନୀ ସେ ୨୦୧୨ ରୁ ୨୦୧୭ ପର୍ଯ୍ୟନ୍ତ ପଞ୍ଚାୟତ ସମିତି ଅଧ୍ୟକ୍ଷା ରହିଥିଲେ। ଚଳିତ ନିର୍ବାଚନରେ ମଧ୍ୟ ଡୁଡୁକାଠେଙ୍ଗା ଓ ଫୁଫଗାଁ ପଞ୍ଚାୟତରୁ ସମିତିସଭ୍ୟା ପାଇଁ ନିର୍ବାଚନ ଲଢ଼ୁଛନ୍ତି। ରାଜନୈତିକ ପରିବାର ପ୍ରଚ୍ଛଦପଟ୍ଟ ରହିଥିବା ଓ ପୂର୍ବ ଅନୁଭୂତି ଓ ଅଭିଜ୍ଞତା ରହିଥିବାରୁ ଅଧ୍ୟକ୍ଷା ଆସନ ପାଇଁ ସେ ଦାବିଦାର ବୋଲି ରାଜନୈତିକ ମହଲରେ ଆଲୋଚନା ହେଉଛି।
ଅନ୍ୟପଟେ ଲଡୁଗାଁ ପଞ୍ଚାୟତରୁ ସମିତିସଭ୍ୟା ପାଇଁ ନିର୍ବାଚନ ମଇଦାନକୁ ଆସିଥିବା ରୀତା ଅଗ୍ରଓ୍ବାଲ ଅଧ୍ୟକ୍ଷା ଦୌଡ଼ରେ ରହିଥିବା ନେଇ ମଧ୍ୟ ଚର୍ଚ୍ଚା ହେଉଛି। ରୀତାଙ୍କ ସ୍ବାମୀ ରାଜୀବ ଅଗ୍ରଓ୍ବାଲ ସମିତି ପାଇଁ ଫୁଫଗାଁ ପଞ୍ଚାୟରେ ପ୍ରାର୍ଥୀ ହୋଇଥିବା ବେଳେ ରୀତାଙ୍କ ଶାଶୁ ଶୋଭାଦେବୀ କୋକସରା ଓ ବଡ଼ ପୋଡ଼ାଗୋଡ଼ା ପଞ୍ଚାୟତରୁ ସମିତି ପାଇଁ ନିର୍ବାଚନ ମଇଦାନକୁ ଓହ୍ଲାଇଛନ୍ତି।
ତେବେ କୋକସରା ବ୍ଲକରେ ପଞ୍ଚାୟତ ନିର୍ବାଚନକୁ ୧୫ ଦିନ ବାକି ରହିଥିବା ବେଳେ ଅଧ୍ୟକ୍ଷା ଗଠନକୁ ନେଇ ଆଶାୟୀ ପ୍ରାର୍ଥୀ ଓ ସମର୍ଥକଙ୍କ ରଣନୀତି ତଥା କସରତ ନିଜ ସମର୍ଥକ ସମିତିସଭ୍ୟଙ୍କୁ ଜିତାଇବା ପାଇଁ ଜୋରଦାର ଗୋଟି ଚଳାଇଛନ୍ତି। ତେବେ ପୂର୍ବତନ ବ୍ଲକ ଅଧ୍ୟକ୍ଷା ରାଜଶ୍ରୀ ନା ରୀତା କୋକସରା ବ୍ଲକ ଅଧ୍ୟକ୍ଷା ହାତେଇବେ ନା ତୃତୀୟ ଅଦୃଶ୍ୟ ପ୍ରାର୍ଥୀ ବାଜି ମାରିବେ ତାହା ସମୟ କହିବ।
