ଭୁବନେଶ୍ୱର,୨୬।୭: ଚଳିତ ନିର୍ବାଚନରେ ଆପାତତଃ ଭଲ କରିଥିଲେ ମଧ୍ୟ ଏବେ ବି ବହୁ ପଛରେ ପଡିଛି କଂଗ୍ରେସ । ନିର୍ବାଚନ ସରିବାର ମାସେ ପରେ ବି ରାଜ୍ୟ କଂଗ୍ରେସର ବିପର୍ଯ୍ୟୟ ସ୍ଥିତିରେ ଗତି କରୁଛି। ବିଧାନସଭା ଦିନକ ପୂର୍ବରୁ ଓଡିଶା ପ୍ରଦେଶ କଂଗ୍ରେସ ଭାଙ୍ଗି ବିଭିନ୍ନ ପଦ ପଦବୀରେ ନିଯୁକ୍ତି କରିଥିଲା । ଏଥିରେ ବିଧାୟକ ଦଳ ନେତା ଭାବେ ରାମଚନ୍ଦ୍ର କାଡାମଙ୍କୁ ନିଯୁକ୍ତ କରିଥିବା ବେଳେ ଉପନେତା ଭାବେ ଅଶୋକ ଦାସ , ଏବଂ ସିଏସ ରାଜନ ଏକ୍କା କଂଗ୍ରେସ ମୁଖ୍ୟ ସଚେତକ ଭାବେ ବଛାଯାଇଛନ୍ତି । ହେଲେ ଏବେବି ଖାଲି ପଡିଛି ଓଡିଶା ପ୍ରଦେଶ କଂଗ୍ରେସର ସଭାପତି ପଦ । ଯାହାକୁ ନେଇ ଅନେକଙ୍କ ନାଁ ଚର୍ଚ୍ଚରେ ଥିବା ବେଳେ ସେମାନଙ୍କ ମଧ୍ୟରୁ କିଏ ହେବେ ପିସିସି ସଭାପତି ଏନେଇ କଂଗ୍ରେସ ବିଧାୟକ ତାରା ପ୍ରସାନ ବାହିନୀ ପତି କ୍ଲିଅର କରିଛନ୍ତି।
କହିରଖୁଛୁ କି, ପିସିସି ସଭାପତି ପଦ ପାଇଁ ସପ୍ତଗିରି ଉଲାକାଙ୍କ ନାଁ ପ୍ରସ୍ତାବ ଦେଇଛନ୍ତି ତାରା । ଯାହା ଏବେ ଚର୍ଚ୍ଚାର ବିଷୟ ପାଲଟିଛି । ତେବେ ଏନେଇ ତାରା କହିଛନ୍ତି, ସପ୍ତଗିରି ଉଲାକା ପିସିସି ସଭାପତି ହେଲେ ଭଲ ହେବ । ରାମଚନ୍ଦ୍ର କାଡାମଙ୍କ ଅଧୀନରେ ବିଧାନସଭାର ଦାୟିତ୍ୱ ରହିଛି ତେଣୁ ସପ୍ତଗିରିଙ୍କ ଅଧୀନରେ କାମ କରିବାରେ ତାଙ୍କର କିଛି ଅସୁବିଧା ନାହିଁ ବୋଲି କହିଛନ୍ତି ତାରା । ଖାଲି ସେତିକି ନୁହେଁ ସପ୍ତଗିରିଙ୍କ ସମର୍ଥନରେ ଏଆଇସିସିଙ୍କୁ ଚିଠି ଲେଖିବେ ବୋଲି ତାରା କହିଛନ୍ତି । ଏହା ସହ ସେ ଏହା ବି କହିଛନ୍ତି, ଆମ ଭିତରେ ସମ୍ପର୍କକୁ ନେଇ ଯାହା ଚର୍ଚ୍ଚା ଚାଲିଛି, ତାହା ଦିନରେ ବାଡାବାଡ଼ି ଓ ରାତିରେ କୋଳାକୋଳି ଭଳି । ତେଣୁ ସେ ପିସିସି ସଭାପତି ହେଲେ ମୋର କିଛି ଅସୁବିଧା ନାହିଁ ବୋଲି କହିଛନ୍ତି ତାରା ।
ରାଜନୈତିକ ବିଶେଷଜ୍ଞମାନେ କହୁଛନ୍ତି, ରାଜ୍ୟ କଂଗ୍ରେସର ଏହି ଉଚ୍ଚ ପଦବୀ ପାଇଁ ଆଦିବାସୀ କାର୍ଡ ଖେଳିପାରେ ଦଳ। କୋରାପୁଟ ଏମପି ସପ୍ତଗିରି ଉଲାକା ହୋଇପାରନ୍ତି ପରବର୍ତ୍ତୀ ପିସିସି ସଭାପତି। ଚର୍ଚ୍ଚା ହେଉଛି, ରାଜ୍ୟ କଂଗ୍ରେସର ଏକମାତ୍ର ଏମପି ଭାବେ ସପ୍ତଗିରି ଉଲାକାଙ୍କ ପତିଆରା ବଢୁଛି। ବିଧାୟକ ଦଳ ନେତା ଚୟନ ବେଳେ ବି ଏକଥା ଦେଖିବାକୁ ମିଳିଛି। ଉଲାକାଙ୍କ ଗୋଷ୍ଠୀର ପଟାଙ୍ଗୀ ବିଧାୟକ ରାମଚନ୍ଦ୍ର କାଡାମଙ୍କୁ ଦାୟିତ୍ୱ ଦେଇଛି ଦଳ । ପିସିସି ସଭାପତି ରେସରେ ଉଲାକା ସବୁଠୁ ଆଗରେ ରହିଥିବା ତାରାଙ୍କ ବୟାନ ଚର୍ଚ୍ଚା ବଢାଇଛି ।
