ଇସଲାମାବାଦ୍,୬/୫:ପହଲଗାମ ଆତଙ୍କବାଦୀ ଆକ୍ରମଣକୁ ନେଇ ପ୍ରତିଦିନ ନୂଆ ନୂଆ ଖୁଲାସା ସାମ୍ନାକୁ ଆସୁଛି। ଏହି ଆତଙ୍କବାଦୀ ଆକ୍ରମଣ ସଂପର୍କରେ ଏବେ ପାକିସ୍ତାନୀ ସେନାର ଜଣେ ପୂର୍ବତନ ମେଜର ଏକ ବଡ଼ ଖୁଲାସା କରିଛନ୍ତି। ପାକିସ୍ତାନୀ ସେନାର ପୂର୍ବତନ ମେଜର ଆଦିଲ ରାଜା କହିଛନ୍ତି ଯେ, ୨୨ ଏପ୍ରିଲ ୨୦୨୫ରେ ଜମ୍ମୁ-କଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣ ପାକିସ୍ତାନର ସେନା ମୁଖ୍ୟ ଜେନେରାଲ ଆସିମ ମୁନିରଙ୍କ ନିର୍ଦ୍ଦେଶରେ ଘଟିଥିଲା ଏବଂ ଏହି ଆତଙ୍କବାଦୀ ଆକ୍ରମଣର ମୁଖ୍ୟ ମାଷ୍ଟରମାଇଣ୍ଡ ହେଉଛନ୍ତି ସେ।
ଆଦିଲ ରାଜା ଏହା ମଧ୍ୟ ଦାବି କରିଛନ୍ତି ଯେ, ଜମ୍ମୁ-କଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣର ସୂଚନା ମୁନିର ଚାଇନା ଏବଂ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ଶରିଫଙ୍କ ସହିତ ମଧ୍ୟ ଶେୟାର କରିଥିଲେ।
ଆଦିଲ ରାଜା ପହଲଗାମରେ ଆତଙ୍କବାଦୀ ଆକ୍ରମଣ ପଛରେ ଥିବା କାରଣ ମଧ୍ୟ ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ, ଆସିମ ମୁନିର ପହଲଗାମରେ ପର୍ଯ୍ୟଟକମାନଙ୍କ ଉପରେ ଆତଙ୍କବାଦୀ ଆକ୍ରମଣ କରାଇଥିଲେ କାରଣ ସେ ପରବର୍ତ୍ତୀ ଜିଆ-ଉଲ-ହକ ହେବାକୁ ଚାହୁଁଛନ୍ତି ଏବଂ ଏହି ଆକ୍ରମଣ ସେ ନିଜର ପ୍ରତିଷ୍ଠା ବୃଦ୍ଧି କରିବା ପାଇଁ କରାଇଥିଲେ।ଏହା ବ୍ୟତୀତ, ସେନା ମୁଖ୍ୟ ଆତଙ୍କବାଦୀ ସଂଗଠନମାନଙ୍କୁ ପୁନର୍ଜନ୍ମ ଦେଉଛନ୍ତି, ଯାହା ଦ୍ୱାରା ଭାରତ ଉପରେ ବଡ଼ ଆକ୍ରମଣ କରାଯାଇ ପାରିବ।
ଉଲ୍ଲେଖନୀୟ ଯେ, ୨୨ ଏପ୍ରିଲ ୨୦୨୫ରେ ଜମ୍ମୁ-କଶ୍ମୀରର ଅନନ୍ତନାଗ ଜିଲାର ପହଲଗାମରେ ପାକିସ୍ତାନୀ ଆତଙ୍କବାଦୀମାନେ ଉପତ୍ୟକା ବୁଲିବାକୁ ଆସିଥିବା ୨୬ ଜଣ ନିରୀହ ପର୍ଯ୍ୟଟକଙ୍କୁ ଗୁଳି କରି ହତ୍ୟା କରିଥିଲେ। ଏହି ଘଟଣାରେ ଅନେକ ଲୋକ ଗୁରୁତର ଭାବେ ଆହତ ମଧ୍ୟ ହୋଇଥିଲେ।
