ମୁମ୍ବାଇ,୨୦।୬ : ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ବିଜ୍ଞାପନ ସମସ୍ୟାର ସମାଧାନ କରିଥାଇ ପାରନ୍ତି, କିନ୍ତୁ ମହାରାଷ୍ଟ୍ରରେ ଶିନ୍ଦେ ବନାମ ଫଡନାଭିସ ପ୍ରସଙ୍ଗ ଏପର୍ଯ୍ୟନ୍ତ ଥଣ୍ଡା ପଡିନାହିଁ। ଶିନ୍ଦେ ଏବଂ ଫଡନାଭିସ ମଧ୍ୟରେ ଲୋକପ୍ରିୟତା ତୁଳନା କରିବାର ମନୋଭାବ ଭାଜପାର ରହିଛି। ମଙ୍ଗଳବାର ଭାଜପାର ମୁଖ୍ୟ ମୁଖପାତ୍ର କେଶବ ଉପାଧ୍ୟାୟ ଏକ ଲେଖା ଲେଖି ଶିନ୍ଦେ କ୍ୟାମ୍ପକୁ ସମାଲୋଚନା କରିଛନ୍ତି। ଏଥିରେ ସେ ଏକ ଚେତାବନୀ ଢଙ୍ଗରେ ସେ କହିଛନ୍ତି ଆମେ ୨୦୨୪ର ଯୁଦ୍ଧରେ ଜିତିବାକୁ ଚାହୁଁ, ଅହଂକାରରେ ପଡ଼ ନାହିଁ । ମିଳିତ ମେଣ୍ଟରେ ମତଭେଦ ସୃଷ୍ଟି କର ନାହିଁ’।
ବିଜ୍ଞାପନରେ ଶିନ୍ଦେ ଏବଂ ଫଡନାଭିସଙ୍କ ମଧ୍ୟରେ କରାଯାଇଥିବା ତୁଳନା ନେଇ କେଶବ ଉପାଧ୍ୟାୟ ଲେଖିଛନ୍ତି ଫଡନାଭିସ ୫ ବର୍ଷ ପାଇଁ ମୁଖ୍ୟମନ୍ତ୍ରୀ ଥିଲେ, ତେଣୁ ସେ ଉପମୁଖ୍ୟମନ୍ତ୍ରୀଙ୍କ ଦାୟିତ୍ୱ ଗ୍ରହଣ କରିବାକୁ ପ୍ରସ୍ତୁତ ନ ଥିଲେ। କିନ୍ତୁ କେନ୍ଦ୍ରୀୟ ନେତୃତ୍ୱ ଭାବିଥିଲେ ରାଜ୍ୟର କଲ୍ୟାଣ ପାଇଁ ସେ କ୍ୟାବିନେଟରେ ରହିବା ଉଚିତ। ତେଣୁ ଆମର ବରିଷ୍ଠ ନେତୃତ୍ୱଙ୍କ ନିର୍ଦ୍ଦେଶ ପରେ ସେ କ୍ୟାବିନେଟର ଏକ ଅଂଶ ହେବାକୁ ପରାମର୍ଶ ଗ୍ରହଣ କଲେ। ଆମର ଲକ୍ଷ୍ୟ ମହାରାଷ୍ଟ୍ର ନୁହେଁ ତେଣୁ ଆମେ ଏକନାଥ ଶିନ୍ଦେଙ୍କୁ ମୁଖ୍ୟମନ୍ତ୍ରୀ ପଦ ପ୍ରଦାନ କରିଛୁ। ତେଣୁ କେବଳ ଆମ ପାଇଁ ଭାଜପା କ୍ଷମତାରେ ଅଛି ବୋଲି କହିବାକୁ ସାହସ କରନ୍ତୁ ନାହିଁ।
ଆମେ କ୍ଷମତା ପାଇଁ କେବେ ଲୋଭୀ ହୋଇନାହୁଁ। ଲୋକପ୍ରିୟତା ପ୍ରସଙ୍ଗରେ ସେ କହିଛନ୍ତି ଆଜି ପର୍ଯ୍ୟନ୍ତ ଦେବେନ୍ଦ୍ର ଫଡନାଭିସ ହେଉଛନ୍ତି ଏକମାତ୍ର ନେତା ଯିଏକି ରାଜ୍ୟବାସୀଙ୍କ ମଧ୍ୟରେ ଲୋକପ୍ରିୟ। ସେ ଏହାକୁ ବିଜ୍ଞାପନ ମାଧ୍ୟମରେ ପ୍ରକାଶ କରିବାକୁ ଆବଶ୍ୟକ କରନ୍ତି ନାହିଁ । ତାଙ୍କଠାରୁ ଉଦାହରଣ ଶିଖନ୍ତୁ ଏବଂ ଛୋଟ ଛୋଟ ଜିନିଷ ଉପରେ ପରସ୍ପର ସହିତ ଲଢ଼େଇ କରନ୍ତୁ ନାହିଁ । ଜୁନ ୧୩ ରେ, ବେସରକାରୀ ଏଜେନ୍ସି ଦ୍ୱାରା କରାଯାଇଥିବା ସର୍ଭେ ବିଷୟରେ ପ୍ରତ୍ୟେକ ଖବରକାଗଜର ପ୍ରଥମ ପୃଷ୍ଠାରେ ଏକ ବଡ଼ ବିଜ୍ଞାପନ ଥିଲା ଏବଂ ଏଥିରେ ଦାବି କରାଯାଇଥିଲା ଫଡନାଭିସଙ୍କ ଅପେକ୍ଷା ଶିନ୍ଦେ ଅଧିକ ଲୋକପ୍ରିୟ ।
ବିଜ୍ଞାପନ ନେଇ ଭାଜପାର ଅସନ୍ତୋଷ ପରେ ଶିନ୍ଦେ କ୍ୟାମ୍ପ ଏହା ତାଙ୍କୁ ଜଣା ନ ଥିବା କହିଥିଲେ। ପରେ ସ୍ପଷ୍ଟ କରି ଥିଲେ ଏଭଳି ବିବାଦୀୟ ବିଜ୍ଞାପନ ସହିତ ଆମର କୌଣସି ସମ୍ପର୍କ ନାହିଁ। ସରକାରଙ୍କ କିଛି ଶୁଭେଚ୍ଛୁ ଏହି ବିଜ୍ଞାପନ ଦେଇଛନ୍ତି । ଆମେ ଏହାକୁ ସମର୍ଥନ କରୁନାହୁଁ।
ଏହାର ଗୋଟିଏ ଦିନ ପରେ ଶିନ୍ଦେ କ୍ୟାମ୍ପର ନଅଜଣ ମନ୍ତ୍ରୀଙ୍କ ଫଟୋ ସହିତ ଏକ ସରକାରୀ ବିଜ୍ଞାପନ ପ୍ରକାଶ ପାଇଥିଲା ୮୪ ପ୍ରତିଶତ ଲୋକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପସନ୍ଦ କରନ୍ତି ଏବଂ ୪୬ ପ୍ରତିଶତ ଲୋକ ଶିନ୍ଦେ-ଫଡନାଭିସଙ୍କ ନେତୃତ୍ୱକୁ ପସନ୍ଦ କରନ୍ତି।
ଏନେଇ ଫଡନାଭିସ କହିଥିଲେ ଆମର ସହଯୋଗୀତା ଏତେ ଦୁର୍ବଳ ନୁହେଁ, ଏହାକୁ ଏକ ଛୋଟ ବିଜ୍ଞାପନ ଦ୍ୱାରା ଭାଙ୍ଗି ଦିଆଯାଇପାରେ। ଅନ୍ୟପକ୍ଷରେ ଶିନ୍ଦେ ଫଡନାଭିସଙ୍କ ନେତୃତ୍ୱ ଗୁଣକୁ ପ୍ରଶଂସା କରି କହିଥିଲେ ଲୋକମାନେ ସେମାନଙ୍କୁ ଶୋଲେ ଫିଲ୍ମର ‘ଜୟ-ବୀରୁ’ ବୋଲି କହିଛନ୍ତି। ସେ ଏହା ମଧ୍ୟ କହିଛନ୍ତି ‘ୟେ ଫେଭିକଲ କା ଜୋଡ ହୈ ତୁଟେଗା ନାହି।
