ନୂଆଦିଲ୍ଲୀ,୧୪।୨: ପରିବେଶକର୍ମୀ ଗ୍ରେଟା ଥନବର୍ଗ ଟୁଲକିଟ ମାମଲାରେ ଦିଲ୍ଲୀ ପୋଲିସ ରବିବାର ବେଙ୍ଗାଲୁରୁରୁ ୨୧ ବର୍ଷୀୟା ଜଳବାୟୁ କାର୍ଯ୍ୟକର୍ତ୍ତା ଦିଶା ରବିଙ୍କୁ ଗିରଫ କରିଛି। ଚାଷୀଙ୍କ ସହ ଜଡିତ ଥିବା ଟୁଲକିଟକୁ ଦିଶା ରବି ଏଡିଟ କରି ପଠାଇଥିବା ଅଭିଯୋଗ ହୋଇଛି। ଏହାପୂର୍ବରୁ ଦିଶା ରବିଙ୍କ ନାମ କୌଣସି ସ୍ଥାନରେ ଶୁଣାଯାଇ ନ ଥିଲା, କିନ୍ତୁ ପୋଲିସ ଗିରଫ କରିବା ପରେ ତାଙ୍କୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ତେବେ ଦିଶା ରବି କିଏ ଜାଣନ୍ତୁ
ଦିଶା ରବି କିଏ
ଦିଶା ରବି ବେଙ୍ଗଲୁରୁର ପ୍ରତିଷ୍ଠିତ କଲେଜ ମାଉଣ୍ଟ କାର୍ମେଲର ଛାତ୍ରୀ। ୨୦୧୮ରେ ଗ୍ଲୋବାଲ କ୍ଲାଇମେଟ୍ ଷ୍ଟ୍ରାଇକ ମୁଭମେଣ୍ଟ ଆରମ୍ଭ କରିଥିବା ସଂଗଠନ ଏଫ୍ଏଫ୍ଏଫ୍ର ସହ-ପ୍ରତିଷ୍ଠାତା। ସେ ମାଉଣ୍ଟ କାର୍ମେଲ କଲେଜରୁ ବିଜ୍ନେସ୍ ଆଡମିନିଷ୍ଟ୍ରେସନ୍ରେ ସ୍ନାତକ ହାସଲ କରିଥିଲେ। ସେ ଏବେ ଗୁଡ ମାଇଲ୍ଡ କମ୍ପାନୀ ସହିତ ଜଡିତ ଅଛନ୍ତି । ଦିଶାଙ୍କ ପିତା ରବି ମୈସୁରରେ ଜଣେ ଆଥଲେଟିକ୍ସ ପ୍ରଶିକ୍ଷକ ଏବଂ ତାଙ୍କ ମା ଜଣେ ଗୃହିଣୀ। ଦେଶରେ ‘ଫ୍ରାଇଡେ ଫର୍ ଫ୍ୟୁଚର୍’ ଅଭିଯାନର ପ୍ରତିଷ୍ଠାତା ସଦସ୍ୟମାନଙ୍କ ମଧ୍ୟରୁ ଦିଶା ରବି ଅନ୍ୟତମ। ନିଜ ଜେଜେବାପାଙ୍କୁ ଦେଖି ଜଳବାୟୁ କାର୍ଯ୍ୟକର୍ତ୍ତା ହେବାକୁ ମନବଳାଇଥିଲେ ଦିଶା। କାରଣ ତାଙ୍କ ଜେଜେବାପା ଜଣେ କୃଷକ ଥିଲେ, ଜଳବାୟୁ ପରିବର୍ତ୍ତନ ଯୋଗୁ ଚାଷ କାର୍ଯ୍ୟ ବାଧା ହେଉଥିବାରୁ ଦିଶା ଏହି କ୍ଷେତ୍ରରେ କାର୍ଯ୍ୟ କରିବାକୁ ଆଗେଇ ଆସିଥିଲେ।
ସୂଚନାଯୋଗ୍ୟ, ଭାରତରେ କୃଷକଙ୍କ ଆନ୍ଦୋଳନ ସମର୍ଥନରେ ପରିବେଶକର୍ମୀ ଗ୍ରେଟା ଥନବର୍ଗ ଟୁଇଟ କରିଥିଲେ। ଗ୍ରେଟା ନିଜର ଟୁଇଟରେ ଲେଖିଥିଲେ, ଆମେ ଭାରତର କୃଷକ ଆନ୍ଦୋଳନ ପ୍ରତି ଏକଜୁଟ ଅଛୁ। ଏହା ସହିତ ସେ ଦ୍ବିତୀୟ ଟୁଇଟରେ ଏକ ଡକ୍ୟୁମେଣ୍ଟ ଶେୟାର କରିଥିଲେ, ଯେଉଁଥିରେ ଭାରତ ସରକାରଙ୍କ ଉପରେ ଅନ୍ତର୍ଜାତୀୟ ଚାପ ପକାଇବାର କାର୍ଯ୍ୟଯୋଜନାକୁ ଶେୟାର କରିଥିଲେ ଓ ୫ଟି ପର୍ଯ୍ୟାୟରେ ଚାପ ପକାଇବାର କଥା କହିଥିଲେ। ତେବେ ପରେ ଗ୍ରେଟା ଥନବର୍ଗ ନିଜର ଟୁଇଟ ଡିଲିଟ କରିଦେଇଥିଲେ। ଗ୍ରେଟା ଥନବର୍ଗ ପୁରୁଣା ଟୁଇଟ ଡିଲିଟ କରିବା ପରେ ଏକ ନୂଆ ଟୁଇଟରେ ଅପଡେଟେଡ ଟୁଲକିଟ ଶେୟାର କରିଥିଲେ। ନୂଆ ଟୁଲକିଟରେ ବହୁ ପରିବର୍ତ୍ତନ କରାଯାଇଛି। ଏଥିରେ ୨୬ ଜାନୁଆରୀରେ ଭାରତ ସହିତ ବିଦେଶରେ ବହୁ ପରିମାଣରେ ପ୍ରଦର୍ଶନର ପ୍ଲାନକୁ ହଟାଇ ଦିଆଯାଇଥିଲା। ଟୁଲକିଟ ମାଧ୍ୟମରେ ସାରା ବିଶ୍ୱରେ ଭାରତର ଭାବମୂର୍ତ୍ତିକୁ ଖରାପ କରିବାକୁ ଚେଷ୍ଟା କରିବାର ଯୋଜନା ଚାଲିଥିଲା। ଦିଲ୍ଲୀ ପୋଲିସର ସାଇବର ସେଲ ଦେଶ ବିରୋଧରେ ଷଡଯନ୍ତ୍ର, ହିଂସା ସୃଷ୍ଟି କରିବା ଏବଂ ଘୃଣା ବ୍ୟାପିବା ପାଇଁ ଉଦ୍ଦିଷ୍ଟ ଟୁଲକିଟ୍ ମାମଲାରେ ବେପୃୟାରୀ ୪ରେ ଏକ ମାମଲା ରୁଜୁ କରିଥିଲା। ଏହି ମାମଲାରେ ରବିବାର ପ୍ରଥମ ଗିରଫ କରାଯାଇଛି। ଦିଲ୍ଲୀ ପୋଲିସର ସ୍ପେଶାଲ ସେଲ ଦ୍ୱାରା ଗିରଫ ହେବାବେଳେ ଦିଶା ରବି ଘରୁ କାମ କରୁଥିଲେ।
