ଦୁବାଇ,୩୦।୧୦: ଟି -୨୦ ବିଶ୍ୱକପ ୨୦୨୧ ର ସୁପର -୧୨ ରାଉଣ୍ଡର ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଖେଳାଯାଇଥିବା ମ୍ୟାଚ୍ରେ ପାକିସ୍ତାନ ୫ ଉଇକେଟରେ ଜିତିଥିଲା। ଏହା ଟୁର୍ନାମେଣ୍ଟରେ ଦଳର କ୍ରମାଗତ ତୃତୀୟ ବିଜୟ। ଏଥିସହ ପାକିସ୍ତାନ ସେମିଫାଇନାଲରେ ନିଜର ସ୍ଥାନ ନିଶ୍ଚିତ କରିଛି। ସେମାନେ ୬ ପଏଣ୍ଟ ସହ ଗ୍ରୁପ ୨ ରେ ଶୀର୍ଷ ସ୍ଥାନ ଅଧିକାର କରିଛି। ତେବେ ଶୁକ୍ରବାର ଦୁବାଇରେ ଖେଳାଯାଇଥିବା ଏହି ମୁକାବିଲା ବେଶ ରୋମାଞ୍ଚକର ଥିଲା। ଏକ ସମୟରେ ତାଙ୍କ ଦଳ ମଧ୍ୟ ଅସୁବିଧାରେ ପଡ଼ିଥିବା ଦେଖାଯାଇଥିଲା। ସେତେବେଳେ ଖେଳାଳି ଆସିଫ ଅଲି ସ୍ଥିତିକୁ ସମ୍ଭାଳିବା ସହ ହିରୋ ପାଲଟିଛନ୍ତି।
ଦୁବାଇ ଇଣ୍ଟରନ୍ୟାସନାଲ କ୍ରିକେଟ ଷ୍ଟାଡିୟମରେ ଆଫଗାନିସ୍ତାନ ଟସ୍ ଜିତି ବ୍ୟାଟିଂ କରିବାକୁ ନିଶ୍ଚିତ କରିଥିଲା । ଦଳ ୨୦ ଓଭରରେ ୧୪୭ ରନ କରି ୬ ଉଇକେଟ ହରାଇଥିଲା। ୧୪୮ ରନ୍ର ବିଜୟଲକ୍ଷ୍ୟ ପାକିସ୍ତାନ ଦଳ ଆଗରେ ଥିଲା। ରିଜୱାନ (୮)ଙ୍କ ଉଇକେଟ ଯିବା ସହିତ ସେମାନଙ୍କର ଖରାପ ଆରମ୍ଭ ହୋଇଥିଲା । ହେଲେ ଅଧିନାୟକ ବାବର ଆଜାମ ଟୁର୍ନାମେଣ୍ଟରେ ଦ୍ୱିତୀୟ ଅର୍ଦ୍ଧଶତକ ମାରି ଦଳକୁ ସ୍ଥିତି ପରିବର୍ତ୍ତନ କରିଥିଲେ।ତାଙ୍କ ବ୍ୟତୀତ ଫଖର ଜମାନ ମଧ୍ୟ ୩୦ ରନର ଇନିଂସ ଖେଳିଥିଲେ।
ମ୍ୟାଚରେ ପାକିସ୍ତାନ ବିଜୟ ଆଡକୁ ବଢ଼ୁଥିବା ବେଳେ ମ୍ୟାଜିକାଲ ସ୍ପିନର ରସିଦ ଖାନ ବୋଲିଂ କରିବାକୁ ଆସିଥିଲେ । ପ୍ରଥମେ ମହମ୍ମଦ ହାଫିଜଙ୍କ ଉଇକେଟ ନେଇ ନିଜର ୧୦୦ ତମ ଟି -୨୦ ଅନ୍ତର୍ଜାତୀୟ ଉଇକେଟ ନେଇଥିଲେ। ଏହା ପରେ ରସିଦ ବାବର ଆଜାମ (୫୧) କୁ ୧୨୨ ସ୍କୋରରେ ବୋଲ୍ଡ କରିଥିବା ବେଳେ ୧୮ ତମ ଓଭର ଶେଷରେ ନବୀନ-ଉଲ-ହକ ମଧ୍ୟ ଶୋଏବ ମଲିକଙ୍କୁ ପାଭିଲିୟନକୁ ରାସ୍ତା ଦେଖାଇଥିଲେ। ସେତେବେଳେ କେବଳ ୨ ଓଭରରେ ପାକିସ୍ତାନକୁ ୨୪ ରନର ଆବଶ୍ୟକ ଥିଲା। ପଡ଼ିଆରେ ଥିଲେ ଆସିଫ ଅଲି ଏବଂ ଶାଦବ ଖାନ।
ଆଫଗାନିସ୍ତାନ ଏହି ମ୍ୟାଚକୁ ଜିତିଯିବା ପରି ମନେ ହେଉଥିଲା। ପେସର କରିମ ଜନତ ଆଫଗାନିସ୍ତାନ ପାଇଁ ବୋଲିଂ କରିବାକୁ ଆସିିଥିଲେ। କିନ୍ତୁ ତା’ପରେ ଯାହା ହେଲା ମ୍ୟାଚ୍କୁ ପୂରା ବଦଳାଇ ଦେଲା। ଆସିଫ ଏହି ଓଭରର ପ୍ରଥମ, ତୃତୀୟ, ଚତୁର୍ଥ ଏବଂ ପଞ୍ଚମ ବଲରେ ୪ ଟି ଛକା ମାରି ପାକିସ୍ତାନକୁ ବିଜେତା କରିଥିଲେ। ଆସିଫ ଅଲି ଚାରିଟି ଛକା ପଛରେ ୭ ଟି ବଲରେ ଅପରାଜିତ ୨୪ ରନ ଖେଳି ପାକିସ୍ତାନକୁ କ୍ରମାଗତ ତୃତୀୟ ବିଜୟ ପ୍ରଦାନ କରିଥିଲେ।
ଲଗାତାର ଦୁଇଟି ମ୍ୟାଚରେ ପାକିସ୍ତାନୀ ଦଳ ପାଇଁ ବ୍ୟାଟିଂ ଷ୍ଟାର ପାଲଟିଥିବା ୩୦ ବର୍ଷୀୟ ଆସିଫ ଅଲିଙ୍କର ଜନ୍ମ ୧ ଅକ୍ଟୋବର ୧୯୯୧ ରେ ପାକିସ୍ତାନର ଫୈସଲାବାଦରେ ହୋଇଥିଲା। ପ୍ରାୟ ୮ ବର୍ଷ ଧରି ସେ ଘରୋଇ କ୍ରିକେଟ ରେ ନିଜର ଶକ୍ତି ପ୍ରଦର୍ଶନ କରିଥିଲେ। କିନ୍ତୁ ତାଙ୍କୁ ଆନ୍ତର୍ଜାତୀୟ କ୍ରିକେଟ ଖେଳିବାର ସୁଯୋଗ ମିଳି ନ ଥିଲା। ୨୦୧୮ ରେ ସେ ପାକିସ୍ତାନ ସୁପର ଲିଗ୍ ରେ ଇସଲାମାବାଦ ୟୁନାଇଟେଡ ଟାଇଟଲ ଜିତିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରି ଲାଇମଲାଇଟ୍କୁ ଆସିଥିଲେ। ସେହି ବର୍ଷ ସେ ପାକିସ୍ତାନ ପାଇଁ ନିଜର ଦିନିକିଆ ଏବଂ ଟି୨୦ ଡେବ୍ୟୁ କରିବାର ସୁଯୋଗ ପାଇଥିଲେ। ସେ ସର୍ବଦା ’ପାୱାର୍ ହିଟର୍’ ଏବଂ ଫିନିସର୍ ଭାବରେ ଜଣାଶୁଣା । ବର୍ତ୍ତମାନ ଟି -୨୦ ବିଶ୍ୱକପରେ ମଧ୍ୟ ସେପରି କରୁଥିବା ଦେଖିବାକୁ ମିଳିଛି।
