ବାରାଣସୀ,୨୯।୧୦: ଉତ୍ତର ପ୍ରଦେଶର ୧୧ଟି ବିଧାନ ପରିଷଦ ଆସନ ପାଇଁ ଫଳାଫଳ ଘୋଷଣା କରାଯାଇଛି। ଏଥିରେ ଭାରତୀୟ ଜନତା ପାର୍ଟି (ଭାଜପା) ୬ଟି ଆସନ ଜିତିଥିବା ବେଳେ ସମାଜବାଦୀ ପାର୍ଟି (ଏସପି) ୫ଟି ଆସନ ହାସଲ କରିଛି। ଭାଜପା ପାଇଁ ସବୁଠାରୁ ବଡ଼ ଝଟକା ବାରଣାସୀରେ ଲାଗିଛି, ଯାହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସଂସଦୀୟ ନିର୍ବାଚନ ମଣ୍ଡଳୀ ଅଟେ। ଏଠାରେ ସମାଜବାଦୀ ପାର୍ଟି ‘ଶିକ୍ଷକ’ ଏବଂ ‘ସ୍ନାତକ’ ଉଭୟ ନିର୍ବାଚନ ମଣ୍ଡଳୀର ଆସନ ଜିତି ନେଇଛି।
ଲାଲ ବିହାରୀ ଯାଦବ (ଏସପି) ଶିକ୍ଷକ ନିର୍ବାଚନ ମଣ୍ଡଳୀରୁ ଏବଂ ଆଶୁତୋଷ ସିହ୍ନା (ଏସପି) ସ୍ନାତକ ନିର୍ବାଚନ ମଣ୍ଡଳୀରୁ ବିଜୟୀ ହୋଇଛନ୍ତି। ୧୬ ରାଉଣ୍ଡ ଭୋଟ ଗଣତି ପରେ, ଆଶୁତୋଷ ସିହ୍ନା ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ତଥା ଭାଜପାର କେଦାରନାଥ ସିଂହଙ୍କୁ ୧୭,୨୧୧ ଖଣ୍ଡ ଭୋଟରେ ପରାସ୍ତ କରିଛନ୍ତି। ଏହା ସହିତ ସିହ୍ନା କ୍ରମାଗତ ଦ୍ୱିତୀୟ ଥର ପାଇଁ ବିଧାନ ପରିଷଦ ସଦସ୍ୟ (MLC) ଭାବରେ ନିର୍ବାଚିତ ହୋଇଛନ୍ତି।
୨୦୦୬ ମସିହାରେ, ଆଶୁତୋଷ ସିହ୍ନା ହରିଶ ଚନ୍ଦ୍ର ପୋଷ୍ଟ ଗ୍ରାଜୁଏଟ କଲେଜରେ ଛାତ୍ର ସଂସଦର ଉପ-ସଭାପତି ଭାବରେ ନିର୍ବାଚିତ ହୋଇଥିଲେ ଏବଂ ସେ ସେତେବେଳେ ରେକର୍ଡ ସଂଖ୍ୟକ ଭୋଟ ପାଇଥିଲେ। ୨୦୦୭ ମସିହାରେ, ସେ ଏକ ‘ଛାତ୍ର-ଯୁବ ସମ୍ମିଳନ’ ଆୟୋଜନ କରିଥିଲେ। ଏହି କାର୍ଯ୍ୟକ୍ରମରେ ସମାଜବାଦୀ ପାର୍ଟିର ଜାତୀୟ ସଭାପତି ତଥା ଉତ୍ତର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ। ସେହି ସମୟରେ ଅଖିଳେଶ ଯାଦବ ଦଳର ଜାତୀୟ ଯୁବ ବ୍ୟାପାର ଦାୟିତ୍ୱରେ ଥିଲେ ଏବଂ ସେ ଜଣେ ସାଂସଦ ମଧ୍ୟ ଥିଲେ।
ବିଏସପି(BSP) ସରକାରଙ୍କ କାର୍ଯ୍ୟକାଳ ମଧ୍ୟରେ ବିଭିନ୍ନ ଆନ୍ଦୋଳନରେ ସକ୍ରିୟ ଅଂଶଗ୍ରହଣ କରିଥିବା କାରଣରୁ ତାଙ୍କୁ ୨୦୦୭ ଏବଂ ୨୦୧୧ ମସିହାରେ ଗିରଫ କରାଯାଇଥିଲା। ୨୦୦୭ ମସିହାର ବଲିଆ ଲୋକ ସଭା ଉପ-ନିର୍ବାଚନ ସମୟରେ ସେ ସମାଜବାଦୀ ପାର୍ଟି ସପକ୍ଷରେ ପ୍ରଚାର କରିଥିଲେ।
ଆଇନଜୀବୀମାନଙ୍କର ପ୍ରମୁଖ ଦାବିଗୁଡ଼ିକ ନେଇ ହୋଇଥିବା ବିଭିନ୍ନ ପ୍ରତିବାଦ ଓ ବିକ୍ଷୋଭରେ ସେ ସକ୍ରିୟ ଭାବେ ଅଂଶଗ୍ରହଣ କରିଥିଲେ; ଯେପରିକି ଯୁବ ଆଇନଜୀବୀଙ୍କ ପାଇଁ ଚାମ୍ବର ଓ ଷ୍ଟାଇପେଣ୍ଡ (ଭତ୍ତା) ବ୍ୟବସ୍ଥା, ବରିଷ୍ଠ ଆଇନଜୀବୀଙ୍କ ପାଇଁ ପେନସନ, ଏବଂ ଅକାଳ ବିୟୋଗ ଘଟିଥିବା ଆଇନଜୀବୀଙ୍କ ପରିବାରବର୍ଗଙ୍କୁ ଆର୍ଥିକ ସହାୟତା ପ୍ରଦାନ।
ଏହା ବ୍ୟତୀତ, ସେ ପୁରୁଣା ପେନସନ ଯୋଜନାକୁ ପୁନଃ ପ୍ରଚଳନ କରିବା ପାଇଁ ହୋଇଥିବା ଆନ୍ଦୋଳନରେ ମଧ୍ୟ ଭାଗ ନେଇଥିଲେ। ଏଥିସହ ସରକାରୀ ଅନୁଦାନ ପାଉନଥିବା ଶିକ୍ଷାନୁଷ୍ଠାନର ଶିକ୍ଷକ, ଶିକ୍ଷାମିତ୍ର (ପାରା-ଶିକ୍ଷକ), ପ୍ରଶିକ୍ଷକ, ପ୍ରେରକ ଏବଂ ଅନ୍ୟାନ୍ୟ ସରକାରୀ କର୍ମଚାରୀଙ୍କ ପାଇଁ ସମ୍ମାନଜନକ ମାନଦେୟ ବ୍ୟବସ୍ଥା କରିବା ଦାବିରେ ହୋଇଥିବା ଆନ୍ଦୋଳନରେ ମଧ୍ୟ ସେ ସାମିଲ ହୋଇଥିଲେ।
୭ ଡିସେମ୍ବର ୨୦୨୦ରେ, ଆଶୁତୋଷ ସିହ୍ନା ସମାଜବାଦୀ ପାର୍ଟିର ପ୍ରତିନିଧି ଭାବରେ ବାରଣାସୀ ଡିଭିଜନ ନିର୍ବାଚନ ମଣ୍ଡଳୀରୁ ଉତ୍ତର ପ୍ରଦେଶ ବିଧାନ ପରିଷଦର ସଦସ୍ୟ ଭାବେ ନିର୍ବାଚିତ ହୋଇଥିଲେ। ୨୦୨୩-୨୪ ଅବଧି ମଧ୍ୟରେ ସେ ‘ସଂସଦୀୟ ଓ ସାମାଜିକ ସଦ୍ଭାବନା କମିଟି’ର ଅଧ୍ୟକ୍ଷ ଭାବରେ ଦାୟିତ୍ୱ ନିର୍ବାହ କରିଥିଲେ।